កីឡាករដែលវិវត្តមកជាតារាសម្តែង សុខ ដែន (អាវខៀវខោក្រហម)
Tue, 24 June 2014
សូ វុទ្ធី
ភ្នំពេញប៉ុស្តិ៍
ភ្នំពេញៈ ក្នុងក្តីរំពឹងដែលកំពុងត្រៀមជើងឡើងទទួលតំណែងតួឯកធំ ប៉ះជាមួយដៃគូប្រយុទ្ធមកពីជប៉ុនដែលមានខ្សែក្រវាត់៥ដាន់ ក្នុងភាពយន្តដុំរឿង «លត់ដែកថែប» ដែលជាខ្សែភាពយន្តវាយប្រហារបែបភាពយន្តហុងកុងនោះ តារាសម្តែងល្បីខាងប្រើក្បាច់គុនបុរាណខ្មែរ សុខ ដែន បានសារភាពថា មួយរយៈនេះយីអ៊ុនធ្លាក់យ៉ាងខ្លាំង ពេលខ្លះស្ទើរតែមិនហ៊ានចេញក្រៅផង។
តារាសម្តែងល្បីខាងប្រើក្បាច់គុន បុរាណខ្មែរ ដែលមានកំណើតពីទឹកដីខេត្តស្វាយរៀង មានឈ្មោះដើម សុខ សុវណ្ណដែន បានលើកឡើងថា៖ «មួយពេលរយៈនេះ ពិសេសក្រោយពីម្តាយខ្ញុំស្លាប់ទៅ យីអ៊ុនដូចជាមិនសូវល្អសោះ ណាមួយការងារសិល្បៈដែលជាឆ្នាំងបាយក៏មិនសូវជាសមប្រកប ហើយថែមពីលើនេះទៀតការបើករបររកស៊ីផ្ទាល់ខ្លួនតូចតាចនោះក៏ត្រូវខាតបង់ទៀតផង»។
សុខ ដែន បញ្ជាក់ថា៖«មួយរយៈមុនមានគេហៅថតច្រើនដែរ មិនមែនថាអត់ទេ តែមិនដឹងជាម៉េចទេ បានមិនត្រូវតម្លៃគ្នា រឿងខ្លះគេដាក់តួខ្ញុំមិនសមនឹងសម្តែង។ ផលិតករចង់ដាក់ខ្ញុំសម្តែងតែតួបងធំ ដែលខ្ញុំមិនស្រឡាញ់ ហើយក៏មិនសម្តែងតែម្តង»។ ជាមួយការសារភាពនេះ នៅក្នុងគណនីហ្វេសប៊ុក គេក៏ឃើញតារាសម្តែងខ្មែរមានជំនាញខាងប្រើក្បាច់គុនចម្រុះបានយ៉ាងល្អមិនចាញ់តារាសម្តែងចិនហុងកុង លោក សុខ ដែន បានសរសេរសារបង្ហោះ ហាក់ចង់បង្ហាញពីជីវិត និងអាជីពរបស់ខ្លួន។
លោកសរសេរថា៖«ប៉ុន្មានខែកន្លងមកនេះ ខ្ញុំមានអារម្មណ៍ថាពិបាកចិត្តខ្លាំង ដោយសារបញ្ហាផ្ទាល់ខ្លួនខ្លះដែលខ្ញុំមិនអាចប្រាប់គេបាន»។
ក្នុងអារម្មណ៍បែបអស់សង្ឃឹម តារាក្បាច់គុនដែលធ្លាប់ជាកីឡាករកាយសម្ព័ន្ធ ដូរមកចាប់អាជីពសម្តែងភាពយន្ត សុខ ដែន ក្នុងជំនួបជាមួយភ្នំពេញប៉ុស្តិ៍ បានអះអាងថា៖ «ការចាប់យកអាជីពជាតារាសម្តែង ក្រោយពីបោះបង់ពីកីឡាកាយសម្ព័ន្ធមកខ្ញុំបានលេចវត្តមានក្នុងខ្សែភាពយន្តប្រហែលជាង៥០រឿង ប៉ុន្តែមិនធ្លាប់បានទទួលតំណែងជាតួធំអីទេ ក្រៅពីសម្តែងជាតួបងធំ និងតួរាយរងនោះ។ ប៉ុន្តែពេលនេះខ្ញុំក៏ផ្តើមមានរាសីឡើងវិញ មានទឹកមាត់លេបហើយ ខណៈផលិតកម្មថ្មីមួយបានជ្រើសរើសខ្ញុំមកធ្វើជាតួឯកធំហើយត្រូវតាមចំណង់ដែលខ្ញុំចង់សម្តែងទៀតផង»។
ថ្មីៗនេះនៅតាមកម្មវិធីប្រគំតន្រ្តីចុងសប្តាហ៍ គេតែងឃើញវត្តមានតារាក្បាច់គុន សុខ ដែន ឡើងបង្ហាញទេពកោសល្យក្បាច់គុន ពិសេសក្បាច់គុនល្បុក្កតោ ហើយរាល់ពេលឡើងឆាកសិល្បៈនោះ លោក សុខ ដែន ដែលពិធីករ ពិធីការិនី ហៅថា លោកគ្រូក្បាច់គុន សុខ សុវណ្ណដែន នោះ ក៏បានប្រកាសផងដែរថា នៅពេលខ្លីខាងមុខនេះលោកនឹងទទួលការថតភាពយន្តជាតួឯកលើកដំបូង ដោយមានឱកាសថតជាមួយតួមកពីជប៉ុន ក្នុងរឿង លត់ដែកថែប។
តារាសម្តែង សុខ ដែន បានបញ្ជាក់ថា៖ «ពេលនេះខ្ញុំទទួលបានការពេញចិត្តក្នុងសមត្ថភាព ជាតារាសម្តែងម្នាក់ដែលមានទេពកោសល្យខាងលេងក្បាច់គុន ហើយផលិតកម្ម ផ្លើស(plus) ហៅសម្តែងជាតួឯកធំក្នុងសាច់រឿង លត់ដែកថែប ដែលសម្តែងជាមួយតួប្រុសមកពីប្រទេសជប៉ុន ម្ចាស់ខ្សែក្រវាត់ខ្មៅ៥ដាន់»។
លោកបន្តថា៖ «រឿងនេះជាខ្សែភាពយន្តប្រយុទ្ធដោយប្រើក្បាច់គុនតាំងពីដើមរហូតដល់ចប់។ សាច់រឿងទាំងមូលភាគច្រើនគឺជាឈុតឆាកប្រយុទ្ធ តែម្តង»។ សុខ ដែន បញ្ជាក់បន្ថែមដោយភាពជាក់លាក់ថា៖«ខ្ញុំពេញចិត្តសម្តែងរឿងបែបហ្នឹង ខ្ញុំនឹងខំប្រឹងសម្តែងឲ្យបានល្អ បើទោះជាលំបាកយ៉ាងណាក៏តស៊ូដែរ»។
យ៉ាងណាសម្រាប់តារាភាពយន្តខ្មែរ ដែលត្រៀមជើងសាកក្បាច់គុនជាមួយម្ចាស់ខ្សែក្រវាត់ខ្មៅ៥ដាន់មកពីជប៉ុននោះ មិនមែនមានតែតារាក្បាច់គុនជំនាន់ថ្មីលោក សុខ សុវណ្ណដែន តែម្នាក់ឯងទេ ក្នុងនោះក៏មានតារាភាពយន្តជើងចាស់ដែលល្បីខាងប្រើក្បាច់គុន លោក ខ្លូត រតនា ម្នាក់ទៀតផងដែរ។
សុខ ដែន បានប្រាប់ថា៖«តាមរយៈរឿងនោះនឹងកែប្រែមុខមាត់ខ្ញុំឲ្យមានប្រជាប្រិយក្នុងការសម្តែងនេះ ពិសេសតាមរយៈការសម្តែងរួមជាមួយតារាក្បាច់គុនជំនាន់ដើមលោកគ្រូ ខ្លូត រតនា ហើយក៏សង្ឃឹមថានឹងមានទីផ្សារកាន់តែប្រសើរជាងពេលបច្ចុប្បន្ននេះ»៕
ក្នុងនាមជាតារាងត្រូវចេះសម្តែងទាំងអស់ មិនថាកាច ស្លូត ហ៊ើហា មានក្រអ្នកជំនញនោះទេគឺត្រូវចេះទាំងអស់
មិនមែនប្រកាន់ចរិយ៉ាងនេះទេ
Chucky Chan or Chen Long is one of the world famous stars, and he usually performs only in action movies. Nothing wrong with that…