ដោយ៖ ញឹម សុខន
ថ្ងៃអង្គារ ទី8 កក្កដា 2014
http://vodhotnews.com
ប្រជាពលរដ្ឋប្រមាណ១០០នាក់ ប្រដាប់ដោយកាំបិត ពូថៅ និងដំបង នៅថ្ងៃអង្គារនេះ កំពុងប្រមូលផ្តុំគ្នានៅភូមិឡពាង ស្រុកកំពង់ត្រឡាច ខេត្តកំពង់ឆ្នាំង ត្រៀមតទល់ជាមួយកម្លាំងសមត្ថកិច្ច មិនឲ្យចាប់ខ្លួនតំណាងពួកគេក្នុងជម្លោះដីធ្លី។
តំណាងអ្នកភូមិ លោក សៀង ហេង ឲ្យVODដឹងថា នៅទី៨ ខែកក្កដា ឆ្នាំ២០១៤នេះ កម្លាំងសមត្ថកិច្ចប្រមាណ២០០នាក់ ប្រដាប់ដោយខែល ដំបង និងអាវុធ នៅបន្តដាក់ពង្រាយឡោមព័ទ្ធ ភូមិឡពាង ដើម្បីចាប់ខ្លួនតំណាងពួកគេម្នាក់គឺអ្នកស្រី អ៊ុំ សុភី។
បុរសរូបនោះបន្តថា ពេលនេះអ្នកភូមិច្រើននាក់ បានប្រមូលផ្តុំគ្នានៅផ្ទះ អ្នកស្រី អ៊ុំ សុភី ទាំងយប់ទាំងថ្ងៃ ដើម្បីការពារតំណាងពួកគេ មិនឲ្យមានការចាប់ខ្លួន។
អ្នកស្រី អ៊ុំ សុភី ឲ្យដឹងដែរថា ការដែលសមត្ថកិច្ចព្យាយាមចាប់ខ្លួនអ្នកស្រី ដោយសារតែអ្នកស្រីចេញមុខ ប្រឆាំងនឹងក្រុមហ៊ុន KDC របស់លោកស្រី ជា ខេង ដែលកំពុងប្រើអំណាចរំលោភយកដីអ្នកភូមិជាង១០០ហិកតា។
ស្ត្រីរូបនោះបន្តថា អ្នកភូមិរងគ្រោះ គ្រាន់តែប្រើសិទ្ធិការពារដីរបស់ខ្លួន កុំឲ្យក្រុមហ៊ុនអ្នកមានអំណាចរំលោភយកតែប៉ុណ្ណោះ តែបែរជាមានទោសត្រូវចាប់ខ្លួនទៅវិញ។ អ្នកស្រីយល់ថា នេះជារឿងអយុត្តិធម៌ សម្រាប់អ្នកក្រីក្រនៅក្នុងឃុំតាជេស។
អធិការរងនគរបាលស្រុកកំពុងត្រឡាចលោក ហ៊ុល វាសនា អះអាងថា ពិតជាមានកម្លាំងសមត្ថកិច្ចដាក់ពង្រាយតាមគោលដៅនៅទីនោះមែន ប៉ុន្តែលោកមិនដឹងថាមានពលរដ្ឋប៉ុន្មាននាក់ទេ ដែលត្រូវនាំខ្លួនទៅតុលាការ ដោយលោកជំរុញឲ្យទៅសួរស្នងការខេត្ត។
ស្នងការរងផ្នែកព្រហ្មទណ្ឌលោក ប្រាក់ វឌ្ឍី សុំមិនធ្វើអត្ថាធិប្បាយ ដោយជំរុញឲ្យទៅសួរអភិបាលខេត្តកំពង់ឆ្នាំងលោក ឈូរ ច័ន្ទឌឿន ដែលVODមិនអាចទាក់ទងបាន។
ជម្លោះដីធ្លីរវាងអ្នកភូមិឡពាង និងក្រុមហ៊ុនKDC របស់លោកស្រី ជា ខេង ភរិយាលោកស៊ុយ សែម រដ្ឋមន្ត្រីក្រសួងរ៉ែ និងថាមពល មកពីគណបក្សប្រជាជនកម្ពុជា បានអូសបន្លាយជិត៨ឆ្នាំហើយ នៅតែមិនអាចរកដំណោះស្រាយបាន បើទោះបីក្រុមហ៊ុន បានផ្តល់សំណងជាទឹកប្រាក់ ដល់អ្នកភូមិមួយចំនួន ដើម្បីបញ្ចប់ជម្លោះក៏ដោយ។
មន្ត្រីសម្របសម្រួលរបស់អង្គការលីកាដូ ប្រចាំខេត្តកំពង់ឆ្នាំង លោក គង់ ច័ន្ធមុនី ដែលតាមដានករណីនេះ ឲ្យដឹងថា មកដល់ពេលនេះ សមត្ថកិច្ចមិនទាន់ចុះអនុវត្តសាលក្រម ដើម្បីចាប់ខ្លួនតំណាងអ្នកភូមិនៅឡើយទេ ប៉ុន្តែលោកយល់ថា ការអនុវត្តសាលក្រមដែលបង្កឲ្យមានហិង្សា ជាការរំលោភសិទ្ធមនុស្សធ្ងន់ធ្ងរ។
លោកអំពាវនាវឲ្យគ្រប់ភាគីពាក់ព័ន្ធបន្តដោះស្រាយបញ្ហានេះ ដោយការយោគយល់គ្នា ដើម្បីស្វែងរកដំណោះស្រាយដោយសន្តិវិធី៕
សូមសរសេរមកលោក ញឹម សុខន តាមរយៈ sokhorn@vodhotnews.com
Violence will not solve any problems but increase the problems instead. Who wants to see the bloodshed? Only the poor who will lose!
All khm
it come to the time that this Cambodian do not dare to the law enforcement of CPP of HUN SEN , it is not a good sine for our nation. if HUN SEN not changing his direction??????????????
ជាតំណាងចាប់ៗដូចជាគតិបណ្ឌិតក្តិតក្រមស្រែងកូនក្មេង