ដោយ៖ ណាត សុភាព
ថ្ងៃពុធ ទី9 កក្កដា 2014
http://vodhotnews.com
សមាគមការពារសិទ្ធិមនុស្សអាដហុក ថ្កោលទោសចំពោះការប្រើប្រាស់កម្លាំងខុសច្បាប់ម្តងហើយម្តងទៀត ដោយអាជ្ញាធររាជធានីភ្នំពេញ ក្នុងការបង្ក្រាប និងបំបែកសេរីភាពជួបជុំបញ្ចេញមតិរបស់ប្រជាពលរដ្ឋ ដែលធានាដោយរដ្ឋធម្មនុញ្ញ។
សេចក្ដីថ្លែងការណ៍ថ្កោលទោសនេះធ្វើឡើង នៅថ្ងៃទី៨ ខែកក្កដា ក្រោយពេលដែលអាជ្ញាធរខណ្ឌចំការមន ខណ្ឌពោធិ៍សែនជ័យ និងខណ្ឌទួលគោក ប្រើប្រាស់កម្លាំងសន្តិសុខខុសច្បាប់ ធ្វើការវាយបង្ក្រាបទៅលើក្រុមបាតុករអហិង្សា និងរារាំងមិនឲ្យក្រុមបាតុករដាក់ញតិទៅស្ថានទូតវៀតណាម។
VOD មិនអាចសុំការបំភ្លឺពីអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានទេនៅថ្ងៃពុធនេះ ដោយលោកអះអាងថា ជាប់រវល់។ ចំណែកឯអភិបាលរាជធានីភ្នំពេញ លោកប៉ា សុជាតិវង្ស VOD មិនអាចទាក់ទងសុំអធិប្បាយបានទេ ដោយសារទូរស័ព្ទចូល តែមិនមានអ្នកទទួល។
ស្របពេលដែលពលរដ្ឋខ្មែរ ប្រមូលផ្តុំគ្នាតវ៉ាកាលពីថ្ងៃអង្គារម្សិលមិញ សមត្ថកិច្ចចម្រុះប្រដាប់ដោយខែល និងដំបងឆក់ច្រើនរយនាក់ បានដេញវាយបំបែកក្រុមបាតុករ បណ្តាលឲ្យរបួសមនុស្សប្រហែល១០នាក់ ខណៈពួកគេព្យាយាមយកញត្តិដាក់ទៅស្ថានទូតវៀតណាម ដើម្បីទាមទារឲ្យអ្នកនាំពាក្យស្ថានទូតនេះ សុំទោសជាសាធារណៈអំពីអ្វីដែលអ្នកនាំពាក្យរូបនេះ និយាយជាសាធារណៈថា ទឹកដីកម្ពុជាក្រោម ជាទឹកដីប្រទេសវៀតណាមតាំងពីដើមមក មិនមែនបានមកពីការកាត់ទឹកដីដោយបារាំងនៅថ្ងៃទី ៤ ខែមិថុនា ឆ្នាំ១៩៤៩ នោះទេ។
មេធាវីក្រុមអ្នកច្បាប់ការពារសិទ្ធិកម្ពុជា លោក ហុង គឹមសួន ពន្យល់តាមនីតិវិធីច្បាប់ថា ក្រុមសន្តិសុខខណ្ឌ ដែលបង្ក្រាបក្រុមបាតុករ ក្រោមការបញ្ជារបស់ថ្នាក់លើ គឺខុសច្បាប់ព្រហ្មទណ្ឌ។ ដូច្នេះ ជនរងគ្រោះមានសិទ្ធិប្តឹងទៅតុលាការដែនដីនោះ ដើម្បីចាត់ការតាមផ្លូវច្បាប់។
សមាគមអាដហុក ឲ្យដឹងទៀតថា ចាប់ពីដើមឆ្នាំ២០១៤ អាជ្ញាធររាជធានីភ្នំពេញ ក៏ដូចជារាជរដ្ឋាភិបាលកម្ពុជា បានវាយបង្ក្រាបក្រុមបាតុករ មិនឲ្យមានការជួបប្រជុំនៅតាមទីសាធារណៈចាប់ពី១០នាក់ឡើងទៅ ជាពិសេសទៅទៀតនោះ រដ្ឋាភិបាលកម្ពុជា បានបិទទីលានប្រជាធិបតេយ្យ ដែលជានិមិត្តរូបនៃសេរីភាពបញ្ចេញមតិ មិនឲ្យប្រជាពលរដ្ឋមានសិទ្ធិក្នុងការប្រើប្រាស់សម្រាប់បញ្ចេញមតិ ដែលបញ្ជាក់ថា រដ្ឋាភិបាលកម្ពុជាកំពុងដើរចាកគន្លងប្រជាធិបតេយ្យ៕
សូមសរសេរមកលោក ណាត សុភាព តាមរយៈ sopheap@vodhotnews.com
no , do not say that. every thing this leader doing is always right always doing by law the law of HUN SEN and his followers??????????????????????????