Mon, 28 July 2014 (10:47)
សូ វុទ្ធី
ភ្នំពេញប៉ុស្តិ៍
ភ្នំពេញ: សូម្បីតែមិត្តភក្តិជិតស្និទ្ធក្នុងអាជីពសិល្បៈ និងសាច់ញាតិ ក៏មានការងឿងឆ្ងល់នឹងអវត្តមានតារាសម្តែង ល្បីតួកាចឆ្នាសឆ្នើមអ្នកនាង ស្វែង សុជាតា ពីសង្វៀនសិល្បៈ ក្រៅពីបន្សល់ដានដ៏គួរឲ្យសង្វេគថា អ្នកនាងមានជំងឺឈឺធ្ងន់តែមិនដឹងទៅព្យាបាលនៅពេទ្យណានោះ។
ពេលនេះ កន្លែងជាក់លាក់ដែលតារាសម្តែងមេម៉ាយកូនពីររួតរឹតដោយជំងឺប្រចាំកាយកំពុងស្នាក់នៅនោះ ត្រូវបានរូបនាងបញ្ជាក់ប្រាប់ ភ្នំពេញ ប៉ុស្តិ៍ ដោយផ្ទាល់មាត់ថា អ្នកនាងបានទៅសម្ងំសាងផ្នួសព្យាបាលជំងឺនៅលើ ភ្នំគូលែន នៅ ខេត្តសៀមរាប។
សិល្បករ សិល្បការិនីរួមទាំងពីខាងសមាគមសិល្បៈផង បានសម្តែងការព្រួយបារម្ភ និងការងឿងឆ្ងល់ការបាត់ដំណឹងឈឹងពីឆាកសិល្បៈ របស់តារាសម្តែង ស្វែង សុជាតា តាមរយៈ ភ្នំពេញ ប៉ុស្តិ៍ ដោយផ្តោតការចាប់អារម្មណ៍ខ្លាំងទៅលើបញ្ហាសុខភាព។ សូម្បីតែខាងសមាគមសិល្បៈក៏លើកឡើងថា៖ «ចង់ដឹងថា គាត់ទៅស្នាក់នៅព្យាបាលជំងឺនៅទីណា នឹងបានទៅសួរសុខទុក្ខ និងកៀងគររកជំនួយខ្លះៗ ទៅជួយឧបត្ថម្ភដល់គាត់»។
ចម្ងល់នេះត្រូវបានស្រាយបំភ្លឺយ៉ាងស្រឡះចែស ខណៈអ្នកនាង ស្វែង សុជាតា បានទំនាក់ទំនងមក ភ្នំពេញ ប៉ុស្តិ៍ ហើយបានប្រាប់ថា៖ «ពេលនេះខ្ញុំកំពុងរស់នៅលើភ្នំមួយនៅ ខេត្តសៀមរាប និងបានសាងផ្នួសហើយ ក្នុងចេតនា រៀនធម៌ ដើម្បីឲ្យស្ងប់អារម្មណ៍ពីផ្លូវលោក»។
តារាសម្តែងស្រីរមែងបរាជ័យលើជីវិតស្នេហាផ្ទួនៗ ក្រោយពីធ្លាក់ខ្លួនជាស្រីមេម៉ាយ នៅឃុំគ្រងកូនពីរតែម្នាក់ឯងរូបនេះ មិនត្រឹមតែទទួលស្គាល់នូវដំណឹងដែលគេថា នាងឈឺធ្ងន់នោះទេ អ្នកនាងបានប្រាប់ទៀតថា៖ «មួយរយៈប្រមាណជាពីរខែ កន្លងមកនេះ ក៏មានគេល្បីថា ខ្ញុំនេះស្លាប់ មិនមែនត្រឹមតែឈឺធ្ងន់នោះទេ»។
បន្ថែមលើការលើកឡើងនេះ តារាសម្តែងដែលធ្លាប់ទទួលពានតារាឆ្នើមខាងកាចឆ្នាស មានកំណើតពី ខេត្តព្រៃវែង រូបនេះអះអាងទៀតថា៖ «បន្ទាប់ពីបានសាងផ្នួសស្លៀកសពាក់ស និងយកធម៌ជាផ្លូវស្ងប់នោះ មិនត្រឹមតែធូរស្រាលពីជំងឺដែលញាំញីគ្មានពេលស្រាកស្រាន្តមុននោះទេ សុខភាពក៏ល្អជាងមុន ហើយធាត់ ឡើងសាច់ឡើងឈាមច្រើនផង»។
ថ្លែងពីដំណើរទៅរកទីសុខស្ងប់ និងស្រាកស្រាន្ត តារាសម្តែងវ័យជាង ៣០ ឆ្នាំរូបនេះ ក៏បានអះអាងពីដំណើរទៅដល់បែបអរូបីថា៖ «ដំបូងឡើយក៏មិនបានដឹងខ្លួនដែរថា ទៅដល់នោះ»។
អ្នកនាងបន្តថា៖ «មិនដឹងថា មានមូលហេតុអ្វីបានទៅដល់ទីនោះដែរ ឃើញតាមបែបសុបិន និមិ្មតផ្លូវក្នុងគេមកប្រាប់ថា មានតែទៅសាងផ្នួសទេ ទើបស្ងប់ក្នុងផ្លូវលោកិយនិងបានជាពីជំងឺក្នុងរាងកាយពេលនោះ ពេលដែលដឹងខ្លួនក៏ទៅដល់លើភ្នំគូលែននោះតែម្តងទៅ»។
អ្នកនាងពន្យល់ទៀតថា៖ «ដោយសារតែហេតុនេះ បានជាទាំងអ្នកសិល្បៈអ្នកផ្ទះនៅព្រៃវែង មិនដឹងថា ខ្ញុំទៅណាទេ។ ប៉ុន្តែក្រោយមកខ្ញុំបានឲ្យដំណឹងមកផ្ទះថា ខ្ញុំបានបួសនៅលើភ្នំគូលែន តែហាមអ្នកផ្ទះមិនឲ្យប្រាប់អ្នកណាសូម្បីសិល្បៈ ទើបដំណឹងនេះមិនចេញក្រៅនោះ»។
ការលះបង់សម្លៀកបំពាក់ស៊ីវិល័យទៅសាងផ្នួសស្លៀកសពាក់សរបស់អ្នកនាង ស្វែង សុជាតា នោះមិនកើតឡើងក្នុងចេតនាចាកពីផ្លូវលោកិយលុះជីវិតក្ស័យនោះទេ។
អ្នកនាង ស្វែង សុជាតា ប្រាប់ពីគម្រោងរបស់នាងថា៖ «ការមកបួសសាងផ្នួសស្លៀកសពាក់ស នេះនៅតែរយៈពេលបីខែទៀតប៉ុណ្ណោះ និងចាកផ្នួសមកជាគ្រហស្ថ នឹងមកបន្តការងារសិល្បៈវិញធម្មតា»៕
ស្អាតផង ទៅបួសគួរអោយស្ដាយណាស់!
She relax her mind and wants to stay away from guys. Three more months end , she’ll be stronger and stronger ………………….. She’ll marry with australian guy.
សាងផ្នួសព្រោះស្នេហ៍…