Thu, 31 July 2014
ប៉ិច សុធារី
ភ្នំពេញប៉ុស្តិ៍
ភ្នំពេញៈ បុគ្គលិកសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ពីររូបគឺលោក អ៊ុំ វិសាល និងអ្នកស្រី រឿន ច័ន្ទថន កាលពីម្សិលមិញ បានដាក់ពាក្យបណ្តឹងទាស់ទៅឧទ្ធរណ៍ប្រឆាំងនឹងសេចក្តីសម្រេចរបស់សាលាដំបូងរាជធានីលើបណ្តឹងសុំរក្សាការពារដែលសុំដកតួនាទីជាប្រធានសហជីពពីលោក អាត់ ធន់ ជាបណ្តោះអាសន្ន រហូតមានការរៀបចំការបោះឆ្នោតនិងរៀបចំរចនាសម្ព័ន្ធដឹកនាំសហជីពនេះថ្មី។
ការដាក់ពាក្យប្តឹងជំទាស់នេះ ធ្វើឡើងបន្ទាប់ពីចៅក្រមសាលាដំបូងរាជធានីភ្នំពេញ លោក លី លីមម៉េង សម្រេចលើកចោលបណ្តឹងសុំរក្សាការពាររបស់ម្ចាស់បំណុលឈ្មោះ អ៊ុំ វិសាល និងអ្នកស្រី រឿន ច័ន្ទថន កាលពីថ្ងៃ ទី១៥ ខែកក្កដា ដោយបានលើកនូវសំអាងហេតុបួន ទី១ ម្ចាស់បំណុលនៅពុំទាន់អនុវត្តនីតិវិធីដោះស្រាយវិវាទដូចចែងក្នុងលក្ខន្តិកៈរបស់សហជីពនៅឡើយ។
ទី២ លោក អាត់ ធន់ ពុំទាន់មានសាលក្រមបញ្ជាក់ថា មានពិរុទ្ធនៅឡើយ បើទោះជាលោកជាប់បណ្តឹងព្រហ្មទណ្ឌនៅតុលាការក៏ដោយ។
ទី៣ ម្ចាស់បំណុល ត្រូវក្រុមប្រឹក្សាតំណាងសហជីព ស៊ីខៅឌូ បញ្ឈប់ពីបុគ្គលិកស្ថាបនិកឬបុគ្គលិកសហជីពនេះ ដោយសារតែធ្វើឲ្យប៉ះពាល់ធ្ងន់ធ្ងរដល់ស្ថាប័ន និង ទី៤ ការប្តឹងទាមទាររបស់ម្ចាស់បំណុលពុំមានលក្ខណៈត្រឹមត្រូវ គប្បីតុលាការសម្រេចលើកចោល។
លោក អ៊ុំ វិសាល បានឲ្យដឹងថា លោកបានដាក់ពាក្យប្តឹងជំទាស់ទៅឧទ្ធរណ៍កាលពីម៉ោង ៤ រសៀលថ្ងៃពុធ ព្រោះថា ការសម្រេចរបស់សាលាដំបូង មិនឆ្លុះបញ្ចាំងអំពីភាពជាក់ស្តែងនៃការប្រព្រឹត្តអំពើពុករលួយរបស់ថ្នាក់ដឹកនាំសហជីព និងមិនធ្វើវិភាគទៅលើអ្វីដែលបានកើតឡើង ទាក់ទិននឹងមូលដ្ឋានចែងក្នុងលក្ខន្តិកៈរបស់សម្ព័ន្ធសហជីព ស៊ីខៅឌូ ឲ្យបានត្រឹមត្រូវទេ។
លោកនិយាយថា៖ «ការបកស្រាយហ្នឹងវាអត់ច្បាស់លាស់ អ៊ីចឹងបានជាយើងប្តឹងជំទាស់ទៅនឹងការទម្លាក់ចោលរបស់លោកចៅក្រម»។
ទាក់ទងនឹងករណីនេះ លោក អាត់ ធន់ ប្រធានសហជីព ស៊ីខៅឌូ លើកឡើងថា នេះជាសិទ្ធិក្នុងការប្តឹងបន្ត នៅពេលដែលពួកគេមិនពេញចិត្តនឹងសេចក្តីសម្រេចនេះ។
លោកបាននិយាយថា៖ «គាត់អត់ខ្មាសអៀនសោះ តុលាការសម្រេចរួចហើយ ហើយបើទោះជាការប្តឹងនេះ តុលាការសម្រេចឲ្យគាត់ឈ្នះក្តី ក៏សមាជិកដែលបោះឆ្នោតរើសប្រធានសហជីពនេះ ក៏គេមិនព្រមដែរ»។
កាលពី ខែមេសា ឆ្នាំ២០១៤ លោក អ៊ុំ វិសាល និងអ្នកស្រី រឿន ច័ន្ទថន បានដាក់ប្តឹងពាក្យសុំរក្សាការពារទៅសាលាដំបូងរាជធានីស្នើសុំដកលោក អាត់ ធន់ ប្រធានសហជីព ស៊ីខៅឌូ ពីការគ្រប់គ្រងបណ្តោះអាសន្ន ដោយចោទលោក អាត់ ធន់ លោក គង់ អាទិត្យ និងលោក ឯក សុភក្តី ថា បានធ្វើឲ្យមានភាពវឹកវរ និងមានរឿងអាស្រូវជាច្រើនបណ្តាលឲ្យសហជីពនេះ បាត់បង់ទំនុកចិត្ត និងថវិកា ពីម្ចាស់ជំនួយនិងសមាជិក។
ប៉ុន្តែនៅថ្ងៃ ទី១៧ កក្កដា សាលាដំបូងរាជធានីភ្នំពេញបានសម្រេចលើកសំណុំរឿងសុំដីការក្សាការពារនេះចោល។ ប៉ុន្តែបើតាមសេចក្តីជូនដំណឹងអ្នកទាំងពីរចុះថ្ងៃ ទី២៩ កក្កដា លើកឡើងថា ពួកគាត់បានប្តឹងថ្នាក់ដឹកនាំសហជីព ស៊ីខៅឌូ ទាំងបីរូបលើពីរករណី ទី១ ជារឿងព្រហ្មទណ្ឌ ពាក់ព័ន្ធនឹងអំពើពុករលួយកិបកេងប្រាក់កម្មករជាង ៩៣០០០ ដុល្លារដែលពេលនេះកំពុងស្ថិតក្នុងដៃចៅក្រមស៊ើបសួរនៅឡើយ និងបណ្តឹងទាក់ទងនឹងពាក្យសុំរក្សាការពារនេះ៕
ប្រយ័ត្នបំបែកបំបាក់ដើម្បីត្រួតត្រានេះយុទ្ធសាស្ត្ររបស់កុំមុយនិស្តឫយួន!!!