Sat, 2 August 2014
យឺន ពន្លក
ភ្នំពេញប៉ុស្តិ៍
មានប្រភពចេញពីអ្នកបម្រើការងារតាមផ្ទះ ស្រ្តីវ័យក្មេងម្នាក់ បានធ្វើឲ្យជីវិតរបស់ខ្លួនឯងទទួលបានជោគជ័យយ៉ាងធំធេង គឺការក្លាយជានាយិកាគ្រប់គ្រងរបស់អង្គការផ្កាយសមុទ្រ ហើយការមិនស្វែងរកប្រាក់ចំណេញ តែមានគោលបំណងប្រមូលក្មេងក្រីក្រ គ្មានទីពឹង ឬគ្មានអាណាព្យាបាល ឲ្យទទួលបានឱកាសបានចូលរៀន និងហាត់កីឡារបស់អង្គការក្រៅរដ្ឋាភិបាលមួយនោះ វារឹតតែធ្វើឲ្យស្រ្តីម្នាក់នោះ មានការពេញចិត្តពេញថ្លើម ក្នុងការបំពេញការងារ ព្រោះវាស័ក្តិសមទៅនឹងខ្សែជីវិតពីអតីតកាលរបស់នាង។
ជួប វិច្ឆិកា គឺជាស្ត្រីដែលទទួលបានជោគជ័យម្នាក់នោះ ហើយសព្វថ្ងៃនេះនាងកំពុងគ្រប់គ្រងអង្គការផ្កាយសមុទ្រ ដែលផ្តោតសំខាន់ខ្លាំងទៅលើការជួយក្មេងអនាថាឲ្យទទួលបានការសិក្សាអប់រំ និងចូលរួមសកម្មភាពកីឡាបាល់ទាត់ ដោយអង្គការនេះបានធ្វើសកម្មភាពកីឡាបាល់ទាត់សម្រាប់ក្មេងៗអស់រយៈពេល ៦ ឆ្នាំមកហើយ ហើយនៅពេលនេះកំពុងតែបន្តការគ្រប់គ្រងកុមារាកុមារីក្នុងបន្ទុកជាង ៤០០ នាក់ ក្នុង ២២ សាលា ដែលចែកចេញជាក្រុមកីឡាបាល់ទាត់ចំនួន ៤២ ក្នុងរាជធានីភ្នំពេញ។
នៅក្នុងបទសម្ភាសជាមួយភ្នំពេញ ប៉ុស្តិ៍ កាលពីថ្ងៃសុក្រ កញ្ញា ជួប វិច្ឆិកា បានរៀបរាប់ថា៖«អង្គការផ្កាយសមុទ្របានកំណត់គោលដៅយ៉ាងជាក់លាក់មួយ គឺក្មេងៗទាំងអស់មានសិទ្ធិទទួលបានការអប់រំ ការថែទាំសុខភាព ការអប់រំកាយ និងកីឡា ហើយពីដំបូងឡើយខ្ញុំជាបុគ្គលិកធម្មតាម្នាក់ បន្ទាប់មកបានក្លាយជាបុគ្គលិកជំនាញរដ្ឋបាល និងបានក្លាយជាអនុប្រធានតាមបទពិសោធនៃការងារ»។
កញ្ញាបន្តថា៖«បទពិសោធជោគជ័យរយៈពេល ៦ ឆ្នាំនោះ ខ្ញុំត្រូវបានតែងតាំងជាប្រធានអង្គការនេះ កាលពីខែមេសា ឆ្នាំ២០១៤ ដោយមានការពេញចិត្តពីក្រុមប្រឹក្សាភិបាលចំនួន៩នាក់ ដែលជាមនុស្សមានឈ្មោះល្បីនៅលើពិភពលោក ក្នុងការស្វែងរកថវិកាជួយក្មេងៗគ្មានទីពឹង»។
វិច្ឆិកា បានបន្តថា កម្មវិធីអប់រំដ៏ចម្បងរបស់អង្គការផ្កាយសមុទ្រ គឺព្យាយាមយកកុមារាកុមារី មកពីកន្លែងចាក់សំរាម អ្នកដែលបង្ខំចិត្តបោះបង់ការសិក្សាដោយសារកត្តាជីវភាពក្រីក្រ គ្មានអាណាព្យាបាលគាំទ្រ និងថែរក្សា មកបណ្តុះបណ្តាលតាមរយៈការអប់រំតាមសាលារដ្ឋ និងបន្តទៅវគ្គហ្វឹកហ្វឺនវិជ្ជាជីវៈ ឬការអប់រំកាយផ្នែកកីឡាបន្តទៀត។ លើសពីនេះយើងបានថែទាំ និងត្រួតពិនិត្យសុខភាព (តំហែទាំភ្នែក ធ្មេញ និងចាក់វ៉ាក់សាំង)ដល់ពួកគេជាប្រចាំ ហើយ បច្ចុប្បន្ន យើងបានផ្តល់ឲ្យក្មេងៗចំនួន ៤០០ នាក់ ដែលមានទីតាំងនៅស្ទឹងមានជ័យ និងច្បារអំពៅ ទទួលបានការអប់រំ ប៉ុន្តែយើងរំពឹងថា ក្មេងៗអនាថាជាង ៧០០នាក់ អាចនឹងបានបញ្ចប់ការសិក្សា នៅឆ្នាំ២០១៦។
តាមរបាយការណ៍ពីរដ្ឋបាលនៃអង្គការមួយនេះ បានឲ្យដឹងថា នៅពេលមានកំណើនជាចាំបាច់ អង្គការផ្កាយសមុទ្រ មានទីតាំងផ្ទាល់ និងទីតាំងរបស់សាលារដ្ឋ សម្រាប់ដោះស្រាយ ហើយសកម្មភាពទាំងនោះបានដើរតួយ៉ាងសំខាន់ក្នុងការផ្តល់ឱកាសឲ្យក្មេងៗក្រីក្រ ដែលមិនអាចមានឱកាសចូលរួមក្នុងសកម្មភាពកីឡា បានលេងកីឡាបាល់ទាត់ និងសកម្មភាពកម្សាន្តផ្សេងៗចាប់ពីថ្នាក់ដំបូងទៅ ដោយក្នុងនោះមានកីឡាករ-ការិនីចំនួន ៣៥០០ នាក់ ហើយនៅក្នុងចំនួននេះក៏មានកីឡាករមិនគ្រប់សមត្ថភាព រួមមានកីឡាករជាមនុស្សគរថ្លង់ និងខ្សោយសតិបញ្ញា ផងដែរ។
វិច្ឆិកា បានបញ្ជាក់ថា៖«ស្ថានភាពនៃអង្គការជួយសង្គមមួយនេះ អាចដំណើរការក្នុងភាពជឿជាក់ គឺក្រៅពីក្មេងជាង១០០នាក់ នៅមានបុគ្គលិក ព្រមទាំងគ្រូបង្រៀន និងគ្រូកីឡា ៨០ នាក់រួមទាំងគ្រូស្ម័គ្រចិត្ត ២០ នាក់ទៀត ហើយសមត្ថភាពគ្រូបង្វឹកទាំងអស់ សុទ្ធសឹងតែទទួលបានវគ្គបណ្តុះបណ្តាលពីសហព័ន្ធកីឡាបាល់ទាត់កម្ពុជាទាំងអស់»។
វិច្ឆិកា បន្ថែមថា ភាពរីកចម្រើន និងទទួលបានផ្លែផ្កាទាំងនេះ គឺដោយសារមានកិច្ចសហការល្អជាមួយសហព័ន្ធកីឡាបាល់ទាត់កម្ពុជា និង NOCC ព្រមទាំងក្រសួងអប់រំ យុវជន និងកីឡា ហើយកិច្ចការជួយសង្គមមួយទៀត គឺបង្រៀនពីជំនាញនៃជីវិត និងមេរៀនពាក់ព័ន្ធទៅនឹងបញ្ហាសង្គម ដូចជាសមភាពនៃយែនឌ័រ គ្រោះថ្នាក់ចរាចរ ផលប៉ះពាល់នៃការ ប្រើប្រាស់ឱសថមិនត្រឹមត្រូវ គ្រឿងស្រវឹង និងការលេងល្បែងស៊ីសងខុសច្បាប់។ល។ លើសពីនេះ អង្គការ បន្តផ្តល់ឲ្យនូវកម្មវិធីអប់រំ គឺរៀនអំពីការស្វែងរកការងារ ចំពោះសិស្សដែលមានអាយុលើសពី១៦ឆ្នាំ ដើម្បីជួយឲ្យពួកគេទទួលបានជោគជ័យ ក្នុងការរកការងារធ្វើ ដែលនឹងជួយកាត់បន្ថយភាពខ្វះខាតនៅក្នុងជីវភាពរស់នៅប្រចាំថ្ងៃរបស់ពួកគេ។
ជីវិតផ្ទាល់ខ្លួន និងភាពជោគជ័យរបស់នាយិកាវ័យក្មេង ជួប វិច្ឆិកា
ជួប វិច្ឆិកា កើតនៅឆ្នាំ១៩៧៩ ក្នុងគ្រួសារថ្នាក់មធ្យម ដោយមានឪពុកឈ្មោះ ជួប កៅ ជាមន្ត្រីចូលនិវត្តន៍ និងម្តាយឈ្មោះ ស៊ឹម សាវ៉េត ជាមន្ត្រីចូលនិវត្តន៍ ហើយ វិច្ឆិកា ជាកូនទី៣ ក្នុងគ្រួសារមានបងប្អូនប្រុសស្រី៥នាក់ រស់នៅស្រុកកំពង់សៀម ខេត្តកំពង់ចាម។
ដោយសារចង់ចេះភាសាអង់គ្លេស ក្មេងស្រីទើបមានអាយុ១០ឆ្នាំ ជួប វិច្ឆិកា បានឃ្លាតឆ្ងាយពីស្រុកកំណើត មកសុំការងារជាអ្នកបម្រើតាមផ្ទះនៅភ្នំពេញ ជាមួយជនបរទេស ដែលបានជួយឲ្យ វិច្ឆិកា អាចនិយាយភាសាអង់គ្លេសបានស្ទាត់ ក្រោយបំពេញការងារមួយនេះអស់៥ឆ្នាំ ប៉ុន្តែការសរសេរបានតិចតួច។
ទោះយ៉ាងណា បន្ទាប់ពីទទួលបានការបណ្តុះបណ្តាលបន្ថែម ផ្នែកការសរសេរ បានផ្តល់ភាពជឿជាក់ដល់យុវតីម្នាក់នេះ ក្នុងការស្វែងរកការងារជាមួយជនបរទេសដោយស្ម័គ្រចិត្ត ដើម្បីទទួលបានបទពិសោធ។
ជាមួយការងារនេះ វិច្ឆិកា បានរសាត់អណ្តែតទៅការងារតាមមូលដ្ឋាន និងខេត្តឆ្ងាយៗ ដោយជួបការលំបាករាប់មិនអស់ ខណៈការងារនោះ នាងទទួលបានត្រឹមការឧបត្ថម្ភជារបបអាហារប៉ុណ្ណោះ ប៉ុន្តែដោយសារតែការព្យាយាម និងបទពិសោធទាំងនោះ វិច្ឆិកា ត្រូវបានអង្គការម៉ារីស្តូប ផ្តល់ការងារឲ្យធ្វើរយៈពេល៦ឆ្នាំ។
លើសពីនេះនៅឆ្នាំ២០០៦ គឺស្របពេលដែលអង្គការផ្កាយសមុទ្រ បានបង្កើតឡើង ដើម្បីជួយក្មេងគ្មានទីពឹងនោះ វិច្ឆិកា ដែលតែងតែមានទំនាក់ទំនងគ្នាល្អជាមួយជនបរទេសកន្លងមកនោះ ត្រូវបានគេផ្តល់ការងារជាបុគ្គលិកម្នាក់នៅក្នុងអង្គការនេះ ហើយការព្យាយាម និងមានទឹកចិត្តស្មោះត្រង់ រួមទាំងការមានជំនាញ បានជួយឲ្យកញ្ញា វិច្ឆិកា បានឡើងឋានៈជាបន្តបន្ទាប់ ពិសេសនៅខែមេសា ឆ្នាំ២០១៤ កញ្ញាបានក្លាយជានាយិកានៃអង្គការផ្កាយសមុទ្រ ដោយមានសំឡេងគាំទ្រពីក្រុមប្រឹក្សា ដែលមានសមាសភាពទាំងក្នុង និងក្រៅប្រទេស ដើម្បីធ្វើការគ្រប់គ្រងអង្គការនេះបន្ត។
បើទោះបីជា មានការមមាញឹកក្នុងការងារគ្រប់គ្រងក៏ដោយ ប៉ុន្តែ វិច្ឆិកា ទទួលបានការសិក្សាវគ្គបណ្តុះបណ្តាលខ្លីៗនៅក្រៅប្រទេស ហើយការសិក្សាក្នុងប្រទេស នាងបានបញ្ចប់បរិញ្ញាបត្រ មហាវិទ្យាល័យគ្រប់គ្រង នៅសាកលវិទ្យាល័យបៀលប្រាយ ផងដែរ។
កញ្ញា Katte Griffi សញ្ជាតិអូស្ត្រាលីស្ថាបនិក ដែលគ្រប់គ្រងជានាយិកានៃអង្គការផ្កាយសមុទ្រ តាំងពីឆ្នាំ២០០៦ បានឲ្យដឹងថា៖«ខ្ញុំបានធ្វើការជាមួយ ជួប វិច្ឆិកា រយៈពេល៦ឆ្នាំហើយ គឺគាត់មានភាពឆ្លាត អត់ធ្មត់ និងបំពេញការងារបានល្អណាស់ ហេតុនេះបេសកកម្មរបស់ខ្ញុំនៅកម្ពុជាគិតថា សមល្មមអាចបន្តទៅឲ្យ ជួប វិច្ឆិកា បាន»។
Katte Griffi បន្តថា៖«សកម្មភាពការជួយក្មេង ក្នុងការអប់រំកាយ និងកីឡារបស់អង្គការផ្កាយសមុទ្រ (ISF) គឺ១ឆ្នាំចំណាយជាង ៥០ ទៅ ៧០ ម៉ឺនដុល្លារ ហើយ វិច្ឆិកា បានធ្វើឲ្យដៃគូជំនួយ រួមមានអង់គ្លេស អូស្ត្រាលី សិង្ហបុរី ជាដើម ដែលជាសមាជិកក្រុមប្រឹក្សាភិបាល មានទំនុកចិត្ត គឺបានប្រគល់តួនាទីឲ្យ វិច្ឆិកា ធ្វើជាប្រធានគ្រប់គ្រង តាំងពីខែមេសាឆ្នាំ ២០១៤ មកម្ល៉េះដើម្បីបន្តវេនសម្រាប់បច្ចុប្បន្ន និងទៅអនាគត»។
តាមទស្សនៈផ្ទាល់ខ្លួនរបស់ ជួប វិច្ឆិកា បានប្រាប់ថា សម្រាប់ថ្ងៃអនាគត ខ្លួននាងផ្ទាល់ក៏ចង់បានការងារមួយផ្សេងទៀត ក្រៅពីការគ្រប់គ្រងក្មេងៗនេះដែរ នាង បានបញ្ជាក់ថា៖«បើមានឱកាស ឬមានអ្នកណាអាចមានសមត្ថភាពបន្តវេនពីខ្ញុំបាន ខ្ញុំនឹងចាកចេញទៅបង្កើតអនាគតជីវិតឯកជនរបស់ខ្ញុំវិញម្តង»៕
congratulation lady.
Congratulation! You have done well. I believe you will be inspired by many with what you have done for the Cambodian society. Keep up with your great work!
Hopefully, not the next Somaly Mam
វាស្នារិសំណាង????????????????
សូមអបអរសាទរ ដល់ជោគជ័យ ក្នុងឆន្ទៈដ៏ប្រសេីររបស់នាង។ ការតស៊ូជីវិត និងបណ្តុះបណ្តាលជីវិតក្មេងខ្វះបង្អែកជីវិតដ៏ទៃទៀត។ នាងជា ជនគំរូដែល អស់លោកមន្ត្រីខ្មែរ គួរយកជាគំរូ ជាជាង សាងអំពេីបំផ្លាញខ្លួន និង ជាតិខ្លួន។
សូមព្រះជួយថែរក្សានាងគ្រប់កាល។ អរគុណដល់ អត្ថបទ ដែលជាវិជ្ជមានដល់សង្គមខ្មែរ។
សំនៀង
តាមពិតទៅឧកាសនៃការកសាងកេរ្តីឈ្មោះមានច្រើនណាស៉ ប្រសិនបើមន្រ្តីរាជរដ្ឋាភិបាលពុករលួយ យកីគំរូតាម ស្រ្តីវ័តក្មេង និងភាពជាអ្នកដឹកនាំរបស់នាង