ដោយ៖ ស៊ុន ណារិន
ថ្ងៃសៅរ៍ ទី16 សីហា 2014
http://vodhotnews.com
មើលរូបភាពបន្ថែម
រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា កាលពីកន្លងទៅ
ក្រសួងយុត្តិធម៌ សម្រេចតែងតាំងរដ្ឋមន្ត្រីស្ថាប័ននេះ គឺ លោក អង្គ វង្សវឌ្ឍានា ជាប្រធានគណៈកម្មការរៀបចំការបោះឆ្នោតលើកទី១ជ្រើសតាំងសមាជិកឧត្តមក្រុមប្រឹក្សានៃអង្គចៅក្រម និងលោក ជីវ កេង ជាអនុប្រធានគណៈកម្មការនេះ។
ការសម្រេចរៀបចំសមាសភាព និងតែងតាំងថ្នាក់ដឹកនាំគណៈកម្មការបោះឆ្នោតនេះ ធ្វើឡើងបន្ទាប់ពី ព្រះមហាក្សត្រ ព្រះបាទនរោត្តមសីហមុនី បានប្រកាសឲ្យប្រើច្បាប់ស្តីពីការរៀបចំ និងការប្រព្រឹត្តទៅនៃឧត្តមក្រុមប្រឹក្សានៃអង្គចៅក្រម កាលពីថ្ងៃទី១៦ខែកក្កដា ឆ្នាំ២០១៤។
សេចក្តីសម្រេចស្តីពីការតែងតាំងសមាសភាពគណៈកម្មការរៀបចំការបោះឆ្នោតលើកទី១ ជ្រើសតាំងសមាជិកឧត្តមក្រុមប្រឹក្សានៃអង្គចៅក្រម ចេញផ្សាយដោយក្រសួងយុត្តិធម៌ នៅថ្ងៃទី១១ខែសីហា ឲ្យដឹងថា សម្រេចតែងតាំងសមាសភាពគណៈកម្មការរៀបចំការបោះឆ្នោត ដោយរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ជាប្រធាន លោក ហ៊ី សោភា រដ្ឋលេខាធិការក្រសួងយុត្តិធម៌ ជាអនុប្រធានប្រចាំការ លោក ជីវ កេង អនុប្រធានតុលាការកំពូល ជាអនុប្រធាន លោក សេង ប៊ុនឃាង អគ្គព្រះរាជអាជ្ញារងអមតុលាការកំពូល ជាអនុប្រធាន លោក កើត រិទ្ធ លោក អុិត រ៉ាឌី តំណាងគណៈកម្មាធិការដឹកនាំការកែទម្រង់ច្បាប់ និងប្រព័ន្ធយុត្តិធម៌ លោក យូ ប៊ុនឡេង ប្រធានសាលាឧទ្ធរណ៍ភ្នំពេញ លោក អ៊ុក សាវុធ អគ្គព្រះរាជអាជ្ញាអមសាលាឧទ្ធរណ៍ភ្នំពេញ លោក អាំង មាលតី ប្រធានសាលាដំបូងរាជធានីភ្នំពេញ លោក យ៉េត ចរិយា ព្រះរាជអាជ្ញាអមសាលាដំបូង និងលោក សំ ប្រជាមានិត អគ្គលេខាធិការនៃឧត្តមក្រុមប្រឹក្សានៃអង្គចៅក្រម ជាសមាជិកគណៈកម្មការនេះ។
សេចក្តីសម្រេចរបស់ក្រសួងយុត្តិធម៌ ក៏មានការតែងតាំងសមាសភាពលេខាធិការនៃគណៈកម្មការរៀបចំការបោះឆ្នោតលើកទី១ជ្រើសតាំងសមាជិកឧត្តមក្រុមប្រឹក្សានៃអង្គចៅក្រមនេះផងដែរ។
សេចក្ដីព្រាងច្បាប់ស្តីពីតុលាការចំនួន៣ រួមមាន ច្បាប់ស្តីពីការរៀបចំអង្គការតុលាការ ច្បាប់ស្តីពីលក្ខន្តិកៈចៅក្រម និងព្រះរាជអាជ្ញា រួមទាំងច្បាប់ស្តីពីការរៀបចំ និងប្រព្រឹត្តទៅនៃឧត្តមក្រុមប្រឹក្សានៃអង្គចៅក្រម ត្រូវបានអនុម័ត និងប្រកាសឲ្យប្រើប្រាស់នាពេលថ្មីៗនេះ។ កន្លងទៅ ក្រុមអង្គការសង្គមស៊ីវិលជាតិ និងអន្តរជាតិ បានស្នើឲ្យមានការពិចារណាលើមាត្រាមួយចំនួន ដែលពួកគេរកឃើញថា អធម្មនុញ្ញភាព និងផ្ទុយពីច្បាប់អន្តរជាតិ។
មាត្រាដែលរងការរិះគន់ក្នុងច្បាប់ថ្មីនេះ រួមមាន មាត្រ៣៩នៃច្បាប់ស្តីពីលក្ខន្តិកៈចៅក្រម និងព្រះរាជអាជ្ញា ដែលផ្តល់អំណាចដល់រដ្ឋមន្ត្រីក្រសួងយុត្តិធម៌ គឺជាអ្នកសម្រេចដ៏សំខាន់ ក្នុងការតំឡើងមុខតំណែងរបស់ចៅក្រម និងព្រះរាជអាជ្ញា។ មាត្រា២៣នៃច្បាប់ស្តីពីការរៀបចំ និងការប្រព្រឹត្តទៅនៃឧត្តមក្រុមប្រឹក្សានៃអង្គចៅក្រមចែងថា រដ្ឋមន្ត្រីក្រសួងយុត្តិធម៌ និងទទួលបន្ទុកក្នុងការត្រួតពិនិត្យ និងស្រាវជ្រាវបឋមលើសំណុំរឿងវិន័យផ្នែកតុលាការជាដើម៕
សរសេរមកលោក ស៊ុន ណារិន តាមរយៈ sun_narin@vodhotnews.com
រដ្ឋមន្ត្រីក្រសួងយុត្តិធម៌ លោក អុង វ៉ាវ៉ុនវ៉ាន់ង៉ា!!!!!!