Wed, 17 September 2014
ឆាយ ច័ន្ទនីដា
ភ្នំពេញប៉ុស្តិ៍
ខេត្តកោះកុងៈ ប្រជាពលរដ្ឋឃុំជីខក្រោម ស្រុកស្រែអំបិល ប្រមាណ៣០នាក់នឹងដើរដាក់ញត្តិទៅរដ្ឋសភា ខុទ្ទកាល័យលោកនាយករដ្ឋមន្ត្រី និងក្រសួងមហាផ្ទៃ នៅថ្ងៃនេះ ដើម្បីស្នើសុំឲ្យជួយអន្តរាគមន៍ ដោះស្រាយផ្តល់ប័ណ្ណកម្មសិទ្ធិដីធ្លីដល់ពួកគាត់ នៅភូមិព្រែកជីក ដែលរងគ្រោះដោយសារអ្នកជំនួញម្នាក់ឈ្មោះហេង ហ៊ុយ បានរំលោភយកដីពួកគាត់។
អ្នកស្រី ផាវ ញ៉ើង អាយុ ៣៩ ឆ្នាំ តំណាងពលរដ្ឋនៅភូមិជីខក្រោម បានឲ្យដឹងថា ប្រជាពលរដ្ឋចំនួន ១៥ គ្រួសារនៅតែបន្តរស់នៅលើដីជម្លោះនេះនៅឡើយ ដែលពីមុនមានប្រមាណ ៣០ គ្រួសារ។
អ្នកស្រីនិយាយថា ៖ «យើងដាក់ញត្តិទៅខុទ្ទកាល័យសម្តេចហ៊ុន សែន រដ្ឋសភា និងជាពិសេសក្រសួងមហាផ្ទៃ ដើម្បីឲ្យគេបកស្រាយ ពីព្រំប្រទល់ដីទំនាស់ឲ្យច្បាស់»។
អ្នកស្រីឲ្យដឹងថា កាលពីឆ្នាំ ២០០៧ មានអ្នកជំនួញម្នាក់ ឈ្មោះ សុខ ហុង បានអះអាងថា មានដីនៅទីនេះ ប៉ុន្តែក្រោយមក នៅឆ្នាំ ២០០៩ ក៏លេចមុខលោក ហេង ហ៊ុយ មកអះអាងថា ឈ្នះក្តីនៅទីនេះដែរ ធ្វើឲ្យប្រជាពលរដ្ឋជាអ្នករងគ្រោះទៅវិញដោយសារតែអ្នកមានឈ្លោះដណ្តើមដីគ្នាចំដីរបស់ពលរដ្ឋ ប្រមាណ ១០០ ហិកតា តែពេលនេះ សល់ប្រមាណ ៥០ ហិកតា។
អ្នកស្រីញ៉ើងបានថ្លែងទៀតថា ៖ «ដីលោកហេងហ៊ុយ នៅភូមិមួយទៀត ដែលជាប់ភូមិព្រែកជីកឃុំជីខក្រោមរបស់យើង»។
កាលពីម្សិលមិញក្រុមពលរដ្ឋបានឡើងមកភ្នំពេញ ដើម្បីចូលរួមសវនាការទាញហេតុផលផ្ទាល់មាត់ នៅសាលាឧទ្ធរណ៍ ដែលជាការស្នើសុំរបស់ពលរដ្ឋ សុំឲ្យតុលាការផ្អាកការអនុវត្តសាលដីការបស់សាលាកំពូលកាលពីឆ្នាំ ២០០៩ ប៉ុន្តែតុលាការ បានលើកពេលដោយសារមានការស្នើសុំពីមេធាវីលោក ហេង ហ៊ុយ។
លោក ហេង ហ៊ុយ មិនអាចសុំការបំភ្លឺបានទេ ម្សិលមិញ។
លោក ទួន សិលា អភិបាលស្រុកស្រែអំបិល បានឲ្យដឹងថា លោកមិនបានដឹងថា ពលរដ្ឋទាំងនេះឡើងទៅភ្នំពេញទេ ហើយថា លោកបានព្យាយាមសម្របសម្រួលករណីទំនាស់ដីធ្លីនេះជាច្រើនលើកច្រើនសាមកហើយ។ លោកថ្លែងថា៖«នេះជាករណីតុលាការ គឺផុតដៃអាជ្ញាធរហើយ»។
តំណាងពលរដ្ឋ នឹងត្រូវចូលសវនាការមួយទៀតនាថ្ងៃទី ២៧ ខែតុលា ទាក់ទិននឹងការបង្កហិង្សាដល់ម្ចាស់អចលនវត្ថុ ក្នុងរឿងជម្លោះដីធ្លីនេះ៕