Sat, 27 September 2014
សូ វុទ្ធី
ភ្នំពេញប៉ុស្តិ៍
រូបថតចំនួនបួនសន្លឹកដែលតារាចម្រៀង លាន អាហ្វ្រីលគីនីន ថតជាមួយនឹងគំនរឈើរាប់រយម៉ែត្រគុប បាននិងកំពុងបង្កឲ្យមានការភ្ញាក់ផ្អើលយ៉ាងខ្លាំង និងមានការចោទជាសំណួរថា តើតារាចម្រៀង លាន អាហ្វ្រិលគីនីន មានជាប់ពាក់ព័ន្ធអ្វីនឹងគំនរឈើប្រណីតៗទាំងនោះ ឬក៏តារារូបនេះមានជាប់ពាក់ព័ន្ធនឹងការរកស៊ីឈើ?
បណ្តាអ្នកដែលមានគំនិតអភិរក្សនិយមចំពោះធនធានធម្មជាតិខ្មែរ បានសរសេរសារប្រតិកម្មយ៉ាងធ្ងន់ៗនៅក្នុងបណ្តាញសង្គមហ្វេសប៊ុកទៅនឹងរូបថតរបស់តារាចម្រៀង លាន អាហ្វ្រីលគីនីន ដែលឈរបង្អួតរាងបង្ហាញគំនរឈើ ដែលអ្នកខ្លះសរសេរសារបែបបញ្ចើចបញ្ចើតារាចម្រៀងគីនីនថា៖ «បង្ហោះរូបអ៊ីចឹងស្គាល់ព្រៃសអត់? ពួកវាបំផ្លាញជាតិអស់ហើយ មានទាំងតារា មានទាំងអ្នកមានអំណាចស្រុកខ្មែរ។ អាតារាចម្រៀងបំផ្លាញជាតិ លាន អាហ្វ្រីលគីនីន»។
បំភ្លឺជុំវិញរូបថតឈរក្បែរគំនរឈើ ដែលបង្កការភ្ញាក់ផ្អើលពេញបណ្តាញសង្គមហ្វេសប៊ុក តារាចម្រៀង និងជាអតីតពិធីករល្បីឈ្មោះកាលពីអំឡុង ឆ្នាំ២០០០ លោក លាន អាហ្វ្រីលគីនីន បានពន្យល់ប្រាប់ថា៖ «រូបទាំងនោះមិនដឹងជាថតក្នុងរាជអង្គណាផង តែមិត្តភក្តិគេទើបតែយកមកបង្ហោះលេងនៅក្នុងហ្វេសប៊ុក។ តែពេលនេះគេក៏បានលុបវិញអស់ហើយ ហើយមិត្តភក្តិនោះក៏សុំទោសខ្ញុំផងដែរ ពីកំហុសអចេតនារបស់គេ ដែលមិននឹកស្មានដល់នោះ»។
អតីតពិធីករសម្បូរវោហារលោក គីនីន បាននិយាយទៀតថា៖ «មិត្តភក្តិហ្នឹង គេយករូបថតទាំងនោះទៅបង្ហោះលេងក្នុងហ្វេសប៊ុក ទើបបង្កឲ្យមានការភ្ញាក់ផ្អើល និងឲ្យមានការយល់ច្រឡំពីមហាជនមកលើរូបខ្ញុំថា ខ្ញុំនេះជាឈ្មួញកាប់បំផ្លាញព្រៃឈើខ្មែរអីណា…»។
ប៉ុន្តែពេលសួរថា រូបថតនោះ ថតជាមួយនឹងគំនរឈើនៅកន្លែងណា និងថតពេលណានោះ តារាចម្រៀងដែលធ្លាប់ល្បីប្រពន្ធដើមតាមទាន់ពេលកំពុងនៅជាមួយស្រីថ្មីរូបនេះ ហាក់អល់អែកមិនចង់បញ្ជាក់ពីទីតាំងដែលលោកថតពិតប្រាកដ ដោយម្តងថា ថតនៅ ខេត្តមណ្ឌលគិរី និងម្តងថាថតនៅ កែវសីមា។
លោក លាន អាហ្វ្រីលគីនីន ឆ្លើយថា៖ «រូបនេះថតនៅ មណ្ឌលគិរី នៅកន្លែងរដ្ឋបាលព្រៃឈើ កែវសីមា ប៉ុន្តែរឿងឆ្នាំនោះដូចជាភ្លេចហើយ ព្រោះវាយូរណាស់ហើយដែរ តែគ្រាន់តែចាំថា ពេលដើរលេងទៅ ខេត្តមណ្ឌលគិរី ហើយបានចូលទៅកន្លែងរដ្ឋបាលព្រៃឈើនោះ ក៏ថតលេងទៅព្រោះមើលទៅម្យ៉ាងដែរ ថតជាមួយឈើប្រណីតៗបែបនេះ»។
បញ្ជាក់បញ្ចៀសពីការរិះគន់ពីប្រិយមិត្តក្នុងហ្វេសប៊ុក ខណៈរូបលោក បែរជាលេចស្រមោលជាមួយគំនរឈើគរដូចភ្នំក្នុងឫកពាជាថៅកែនោះ លោក គីនីន អះអាងថា រូបលោកដាច់ខាតមិនជាប់ពាក់ព័ន្ធនឹងការជួញដូរឈើ ឬក៏ធ្វើជាឈ្មួញឈើអីដូចការយល់ឃើញពីមិត្តភក្តិក្នុងហ្វេសប៊ុកនោះឡើយ។
លោក គីនីន បាននិយាយប្រាប់ទៀតថា៖ «ក្រៅពីបើកបានសាលាបង្ហាត់បង្រៀនផ្នែកតន្ត្រីនោះមកទល់នឹងពេលនេះ ខ្ញុំមិនមានលទ្ធភាពណាលើសហ្នឹងទេ បើរកតែប្រាក់មកទប់ទល់សាលាតន្ដ្រីនេះឲ្យតែដំណើរការល្អនោះវាប្រសើរណាស់ហើយ»៕