ដោយ៖ ទូច សុខា
ថ្ងៃសុក្រ ទី17 តុលា 2014
http://vodhotnews.com
ជនជាប់ចោទ២រូប គឺ លោក នួន ជា និង លោក ខៀវ សំផន រួមទាំងមេធាវីការពារក្តី លើកឡើងថាពួកគេនឹងមិនមានវត្តមានក្នុងសវនាការសំណុំរឿង០០២/០២ បើសិនជាតុលាការមិនចាត់ការទៅលើបណ្តឹងដិតជិត ឬពន្យាពេលសវនាការនៅពេលខាងមុខ។
អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅព្រឹកថ្ងៃសុក្រនេះ បានចាប់ផ្តើមបើកសវនាការលើអង្គសេចក្តីក្នុងសំណុំរឿង០០២/០២ ប្រឆាំងនឹងលោក នួន ជា និងខៀវ សំផន។
លោក នួន ជា បានថ្លែងថាលោក និងមេធាវីការពារក្តីរបស់លោកនឹងធ្វើពហិការចូលរួមសវនាការសំណុំរឿង០០២/០២ នៅពេលខាងមុខនោះទេ បើសិនជាបណ្តឹងដិតជិតរបស់លោកដែលប្តឹងសុំដកចៅក្រមខ្មែរ៣រូប រួមមាន លោក និល ណុន លោក យ៉ា សាខន និងលោក យូ ឧត្តរ៉ា និងចៅក្រមបារាំង១រូប គឺលោកលោក ហ្សង់ម៉ាក ឡាវែញ (Jean- Marc Lavergne) ចេញពីការជំនុំជម្រះក្តីមកលើរូបលោក មិនមានការសម្រេចណាមួយពីតុលាការ។ លោក នួន ជាបានចោទប្រកាន់ថាចៅក្រមទាំងនោះមានភាពលម្អៀងក្នុងការកាត់ក្តីលើរូបលោក និងមិនបានផ្តល់យុត្តិធម៌ពិតប្រាកដជូនលោក។ លោកបានហៅសេចក្តីសម្រេចក្នុងសាលក្រមលើកទី១ ដែលបានកាត់ទោសលោកឲ្យជាប់ពន្ធនាគារអស់មួយជីវិតថាជាបរាជ័យរបស់របស់ចៅក្រម និងមិនបានរកឃើញការពិត និងបានបន្ទាបតម្លៃយុត្តិយុត្តិធម៌។លោកមានប្រសាសន៍ថា«តាមរយៈសាលក្រមរបស់លោកចៅក្រមលើកទី១នេះ បង្ហាញថាលោកចៅក្រមមិនមានលក្ខណៈសម្បត្តិដើម្បីសម្រេចសេចក្តីលើរឿងក្តីរបស់ខ្ញុំទៀតឡើយ មេធាវីរបស់ខ្ញុំបានដាក់ពាក្យប្តឹងដិតជិតនេះប្រហែលជា២ឬ៣សប្តាហ៍កន្លងទៅ ហើយយើងកំពុងរង់ចាំលទ្ធផលនៃការសម្រេចលើបណ្តឹងនេះ»។
កាលពីថ្ងៃទី០៧ខែសីហា អង្គជំនុំជម្រះវិសាមញ្ញក្នុងតុលាការកម្ពុជា បានប្រកាសសាលក្រមក្នុងសំណុំរឿង០០២/០១ ដោយកាត់ទោសអតីតមេដឹកនាំជាន់ខ្ពស់ក្នុងរបបកម្ពុជាប្រជាធិបតេយ្យ គឺលោក នួន ជា និងលោក ខៀវ សំផន ឲ្យជាប់ពន្ធនាគារអស់មួយជីវិត ពីបទឧក្រិដ្ឋកម្មប្រឆាំងនឹងមនុស្សជាតិ ។
ដូចគ្នានេះដែរ លោក ខៀវ សំផន ក៏ទទូចឲ្យតុលាការរង់ចាំឲ្យមានការសម្រេចលើបណ្តឹងដិតជិតជាមុនសិន មុននឹងបន្តសំណុំរឿងថ្មី ដើម្បីលោកអាចនឹងមានពេលច្រើនសម្រាប់រៀបចំសារណារបស់លោក ដើម្បីដាក់បណ្តឹងទៅសាលាឧទ្ធរណ៍។ លោកបានបញ្ជាក់ថា«ទោះជាគាត់(មេធាវី)មកចូលរួម ក៏គាត់ពុំអាចរៀបចំកិច្ចការពារក្តីខ្ញុំបានល្អដែរ ហើយក៏គ្មានពេលរៀបចំសារណាបណ្តឹងឧទ្ធរណ៍បានល្អទៀតផង។សរុបមក បើមេធាវីរបស់ខ្ញុំងាកមកចូលរួមក្នុងសវនាការក្នុងការកាត់ក្តីសំណុំរឿង០០២/០២ បើនិយាយតាមពាក្យបុរាណខ្មែរ ទន្សាយក៏រួច ត្រីរស់ក៏រួច»។
លោក ខៀវ សំផន បញ្ជាក់ដែរថាបើសិនជាតុលាការបង្ខំឲ្យលោកចូលរួមក្នុងសវនាការខាងមុខ លោកនឹងចូល តែត្រូវមានមានកំណត់ហេតុថាលោកចូលរួមក្នុងសវនាការរាល់ថ្ងៃដោយមានការបង្ខិតបង្ខំ។
មេធាវីការពារក្តីឲ្យលោក ខៀវ សំផន លោក គង់ សំអុន បានបញ្ជាក់មុនពេលដែលលោកដើរចេញពីសវនាការជាមួយសហការីរបស់លោកថា លោក ខៀវ សំផន មិនមានបំណងលះបង់ការចូលរួមសវនាការក្នុងសំណុំរឿង០០២/០២នោះទេ ហើយការសម្រេចចិត្តនេះមកពីលោក ខៀវ សំផន គ្មានជម្រើសប៉ុណ្ណោះ។ លោកបន្ថែមថា«ដោយគ្មានពេលវេលាគ្រប់គ្រាន់ក្នុងការធ្វើឲ្យការងារទាំងពីរ ដើរក្នុងពេលតែមួយបាន លោកសម្រេចជ្រើសរើសយកការងារមួយដែលសំខាន់ជាង ដោយទុកការងារមួយទៀតមួយអន្លើសិន ដើម្បីកុំឲ្យខូចការងារទាំងពីរនេះ។… ខ្ញុំសូមរំឭកថានេះមិនមែនជាព្រួញមួយបាញ់បានសត្វពីរនោះទេ វាជាករណីដែលយើងមិនអាចចាប់ត្រីពីរដោយដៃតែមួយបាន»។
ទីតាំងឧក្រិដ្ឋកម្មដែលបានចោទប្រកាន់ និងការចោទប្រកាន់តាមអង្គហេតុ ជាមូលដ្ឋានសម្រាប់ការជំនុំជម្រះនៃសំណុំរឿង០០២/០២រួមមាន បទប្រល័យពូជសាសន៍ចំពោះជនជាតិចាម និងវៀតណាម ការរៀបការដោយបង្ខំ និងបទរំលោភសេពសន្ថវៈ (ទូទាំងប្រទេស), ការបោសសម្អាតផ្ទៃក្នុង និងការប្រព្រឹត្តចំពោះពុទ្ធសាសនិកជនជាដើម។
សំណុំរឿង០០២ ត្រូវបានបែងចែកជា២ករណី ដើម្បីសម្រួលដល់ការកាត់ក្តី គឺករណី០០២/០១ និង០០២/០២ ដោយសារភាពស៊ាំញ៉ាំ និងវ័យចាស់ជរារបស់ជនជាប់ចោទ។ ជនជាប់ចោទក្នុងសំណុំរឿង០០២ រួមមាន លោក នួន ជា អាយុ៨៨ឆ្នាំ អតីតអនុលេខាបក្សកុម្មុយនីស្តកម្ពុជា និង ខៀវ សំផន អាយុ៨៣ឆ្នាំ អតីតប្រមុខរដ្ឋនៃកម្ពុជាប្រជាធិបតេយ្យ៕
សូមសរសេរមកកាន់លោក ទូច សុខា តាមរយៈ sokha@vodhotnews.com
Too bad, you are prisoners anyway. You have no choice, 2 killers.