Fri, 17 October 2014
សេត គឹមសឿន
ភ្នំពេញៈ តារាសម្តែងនាង សារ៉ាយ សក្ខណា ដែលបានរៀបការប្តីចេញទៅរស់នៅអាមេរិកកាលពីចុងឆ្នាំ២០១៣នោះ នៅពេលនេះនាងបានវិលមកថតភាពយន្តនៅស្រុកខ្មែរវិញទាំងពពោះ ដោយគ្មានវត្តមានប្តីមកជាមួយជួយផ្តល់ភាពកក់ក្តៅទេ។
ប៉ុន្តែអ្វីៗមិនជាបញ្ហានោះទេ ដោយសារតែ សក្ខណា មានកូនក្នុងផ្ទៃជួយផ្តល់កម្លាំងចិត្ត ហើយអ្វីដែល សក្ខណា ត្រេកអរស្ទើរហោះនៅពេលនេះ គឺដោយសារតែក្តីប្រាថ្នារបស់នាងបានសម្រេចម្តងពីរ។
ក្តីប្រាថ្នាដ៏ធំរបស់តារាសម្តែងស្រីសម្បុរស្រអែមនាង សារ៉ាយ សក្ខណា នោះគឺក្រោយរៀបមង្គលការរួចនោះ នាងចង់បានកូនភ្លាមៗ។ ដូចការរំពឹងទុក ប៉ុន្មានខែក្រោយមក នាងក៏បានសម្រេចបំណងដូចក្តីប្រាថ្នា ហើយអ្វីដែលធ្វើឲ្យនាងត្រេកអរកម្របានជួបនោះ គឺនាងចង់បានកូនស្រី ហើយពេលនេះ នាងក៏បានកូនស្រីដូចក្តីប្រាថ្នា សម្រេចក្តីប្រាថ្នាទី១ ក្រោយពេលដែលនាងបានចូលពេទ្យពិនិត្យកាលពីពេលថ្មីៗនេះ ការពិនិត្យអេកូបានបញ្ជាក់យ៉ាងច្បាស់៨០ ទៅ៩០ភាគរយថា កូនរបស់នាងគឺកូនស្រី។
ការសម្រេចក្តីប្រាថ្នាដ៏ធំទី១នេះ អ្នកស្រីសម្ផស្ស បាននិយាយទាំងរីករាយឲ្យដឹងថា៖ «មុននេះ ខ្ញុំ និង សក្ខណា បានទៅពិនិត្យផ្ទៃពោះចង់ដឹងថា កូនប្រុស ឬស្រី។ តាមអេកូបានបញ្ជាក់ថា កូនរបស់សក្ខណា គឺស្រី ៨០ ទៅ៩០ភាគរយ។ សក្ខណា នាងសប្បាយចិត្តចង់ហោះហើយ នាងបានទូរស័ព្ទទៅប្រាប់ប្តីភ្លាមៗ ព្រោះពួកគេទាំងពីរចង់បានកូនស្រី ស្រឡាញ់កូនស្រីដូចគ្នា ហើយកូនប្រសាខ្ញុំក៏អរមែនទែន រហូតចង់មកស្រុកខ្មែរទៀតផង»។
ចំណែកឯក្តីប្រាថ្នាទី២របស់ សារ៉ាយ សក្ខណា នាពេលនេះ គឺនាងចង់បញ្ចេញស្នាដៃសិល្បៈបន្តនៅក្នុងការសម្តែងភាពយន្ត ដែលនាងស្រឡាញ់តាំងពីតូច ពិសេសនោះគឺនាងចង់បញ្ចេញស្នាដៃនៅក្នុងភាពយន្តខ្នាតអន្តរជាតិមួយ ដែលនាងត្រូវថតជាតួឯកឲ្យផលិតកម្មថៃ ជាមួយតួឯកប្រុសថៃនៅក្នុងរឿង «បងស្រឡាញ់អូន»។
អ្នកស្រី សម្ផស្ស បានឲ្យដឹងថា៖ «ដោយសារតែរយៈពេលខ្លី នៅពេលនេះ សក្ខណា សម្រេចចិត្តថតតែពីររឿងទេ គឺរឿង ក្រឡអីហ្នឹង វគ្គពីរ និងភាពយន្តខ្នាតធំរឿង បងស្រឡាញ់អូន របស់ផលិតកម្មថៃ»។
ការទទួលថតរឿងនៅខណៈពេលកំពុងមានផ្ទៃពោះនេះ អ្នកស្រី សម្ផស្ស បានបញ្ជាក់ថា កូនអ្នកស្រីមិនមានបញ្ហាសុខភាពចោទទេ តែក៏មិនប្រហែសដែរ ព្រោះមុននឹងទទួលថតរឿង សក្ខណា បានសួរនាំ និងអានសាច់រឿងយ៉ាងលម្អិតអស់ហើយ។ អ្នកស្រីបានបញ្ជាក់ថា បើគ្មានអ្វីប្រែប្រួលទេ សក្ខណា នឹងត្រូវចាកចេញទៅអាមេរិកវិញនៅថ្ងៃទី២៧ ខែវិច្ឆិកា ខែ២០១៤។
គួរបញ្ជាក់ថា សក្ខណា បានចូលរោងការជាមួយនឹងបុរសមេធាវីអាណិកជនអាមេរិក ឈ្មោះ កែវ ប៊ុនមេត្រី កាលពីថ្ងៃទី១១ និងទី១២ ខែធ្នូ ២០១៣៕