ដោយ៖​ ប៉ែន ប៉ូលីន​
ថ្ងៃសៅរ៍ ទី18 តុលា 2014
http://vodhotnews.com

​សង្គម​ស៊ីវិល​ជំរុញ​ឲ្យ​រដ្ឋាភិបាល​ចាត់វិធានកា​រ​ដាក់​ទោសទណ្ឌ ចំពោះ​ក្រុមហ៊ុន​ទាំងឡាយណា ដែល​បាន​ដី​សម្បទាន​ពី​រដ្ឋាភិបាល ហើយ​មិន​វិនិយោគ​ត្រឹមត្រូវ​តាម​កិច្ចសន្យា​។​

​ការជំរុញ​នេះ​ធ្វើឡើង បន្ទាប់​ពី​រដ្ឋាភិបាល​ពិសេស​ក្រសួង​បរិស្ថាន​នាពេល​ថ្មីៗ​នេះ បាន​ដកហូត​ដី​សម្បទាន​ពី​ក្រុមហ៊ុន​វិនិយោគ​ចំនួន​​១១ បន្ថែម​ទៅលើ​ក្រុមហ៊ុន​ចំនួន​៨​ផ្សេងទៀត ដែល​ក្រសួង​បរិស្ថាន​បាន​ប្រកាស​ដក​ដី​នោះ​ដាក់​ជា​កម្ម​សិទ្ធ​របស់​រដ្ឋ​វិញ​។​

​មន្ដ្រី​ស៊ើបអង្កេត​សមាគម​អាដហុក​(ADHOC)​លោក ចាន់ សុ​វេត ប្រាប់​VOD​នៅ​ព្រឹក​ថ្ងៃ​សៅ​រិ៍នេះ ថា សង្គម​ស៊ីវិល​សាទរ​ចំពោះ​ចំណាត់​ការ​របស់​រដ្ឋាភិបាល និង​ក្រសួង​បរិស្ថាន ដែល​បានសម្រេច​ដកហូតយក​ដី​សម្បទាន​ពី​ក្រុមហ៊ុន​មួយចំនួន ដែល​មិន​អនុវត្ត​តាម​គោលការណ៍​អភិវឌ្ឍន៍​ត្រឹមត្រូវ​នៅពេលនេះ។

​ប៉ុន្ដែ​លោក​ថា ការដកហូត​តែ​ម្យ៉ាង​នៅ​មិនទាន់​គ្រប់គ្រាន់ នៅក្នុង​វិសាល​ល​ភាព​ច្បាប់​ទេ ព្រោះ​ខណៈ​នេះ រដ្ឋាភិបាល​មិន​ទាន់​សិក្សា​ពី​ផលប៉ះពាល់​អវិជ្ជមាន​មួយចំនួនទៀត ដែល​បង្ក​ដោយ​ក្រុមហ៊ុន មានដូចជា ការកាប់បំផ្លាញ​ព្រៃឈើ  សត្វព្រៃ បរិស្ថាន ធនធាន​ធម្មជាតិ និង​ជម្លោះ​ដីធ្លី ជា​ដើម​នោះ នឹង​នាំឲ្យ​រដ្ឋាភិបាល​ខាតបង់​អត្ថប្រយោជន៍​ជាតិ​យ៉ាងច្រើន​។​

​លោក​បន្ថែម​ទៀត​ថា ទាំង​សង្គម​ស៊ីវិល​និង​ប្រជាពលរដ្ឋ គឺ​ចង់​ឃើញ​រដ្ឋាភិបាល ពិសេស​គឺ​ក្រសួង​បរិស្ថាន ដែល​មាន​ឋានានុក្រម​សិក្សា​ស្រាវជ្រាវ​ឡើងវិញ ពី​ប្រភព​អ្នក​ដែល​ផ្ដល់​ដី​សម្បទាន​ថា តើ​អ្នកណា​អ្នកផ្ដល់ អ្នកណា​ជា​ជើង​សារ ដើម្បី​ផ្ដន្ទាទោស​តាម​នីតិ​វិធី​ច្បាប់​ផងដែរ​។​

​ជុំវិញ​ការដកហូត​ដី​សម្បទាន​នេះ​ដែរ មន្ដ្រី​សម្របសម្រួល​កំណែទម្រង់​ដីធ្លី លោក វណ្ណ សូផាត​បាន​លើកឡើង​ថា រដ្ឋាភិបាល​គួរ​ចាត់​វិធាន​ការ​តាម​ដាន​ទៅ​លើ​ក្រុមហ៊ុន​តាំងពី​ដំបូង ហើយ​ជា​ពិ​សស​គឺ​ត្រូវ​អនុវត្ត​ច្បាប់​ឲ្យបាន​តឹងរ៉ឹង ចំពោះ​ក្រុមហ៊ុន​ដែល​បាន​រំលោភ​លើ​កិច្ចសន្យា ឬ​មិន​គោរព​តាម​កិច្ចសន្យា​។​

​ថ្មីៗ​នេះ​រដ្ឋាភិបាល​បាន​ប្រកាស​ដក​ហូត​ដី​សម្បទាន​ពី​ក្រុមហ៊ុន​មួយចំនួន លើ​ដី​ចំនួន​ជិត​៧​ម៉ឺន​ហិកតា ដែល​សង្គម​ស៊ីវិល​សង្ស័យថា ក្រុមហ៊ុន​ទាំងនោះ​កាប់​ឈើ​លក់​អស់ នៅ​សល់​ដី​វាល ហើយ​មិន​ព្រម​អភិវឌ្ឍ​៕

សរសេរ​មកកាន់លោក ប៉ែន ប៉ូលីន តាមរយៈ​ penpoline@yahoo.com.au