Wed, 29 October 2014
សូ វុទ្ធី
ភ្នំពេញប៉ុស្តិ៍
ភ្នំពេញៈ ការដើរចេញពីអាជីពជាពិធីការិនី ហក់មកចាប់អាជីពជាតារាចម្រៀងរបស់កញ្ញា តេង លក្ខិណា ត្រូវបានមហាជនលើកឡើងថា មហិច្ឆតារបស់នាងហាក់ដើរថយ ខណៈគម្រោងចេញសម្តែងភាពយន្ត និងគម្រោងបើកជំនួញឆ្នាំ២០១៤ដែលនាងធ្លាប់អះអាងពីមុននេះ ក៏មិនមានដង្ហើមដកនោះ។
រហូតមកទល់ពេលនេះអតីតពិធីការិនី តេង លក្ខិណា នៅមិនទាន់សម្រេចបាននូវគម្រោងចេញសម្តែងរឿង ឬបើកមុខជំនួញរកស៊ីតាមការគ្រោងទុកឡើយ បើទោះជានាងបានអះអាងថា នឹងស្វះស្វែងរកច្រកចេញមួយនេះនៅមុនដំណាច់ឆ្នាំនេះ។ រីឯអាជីពដែលនាងកំពុងឈោងចាប់ជាតារាចម្រៀងប្រចាំផលិតកម្មអឹមនោះ ក៏មិនសូវទទួលបានការគាំទ្រខ្លាំងពីមិត្តយុវវ័យនៅឡើយ ខណៈពេលដែលមានម្ចាស់ស្នេហ៍ជួយជ្រោមជ្រែងពីក្រោយយ៉ាងណាក៏ដោយ។
ស្របពេលគ្នានោះដែរ ក៏មានមតិចេញពីមហាជនដែលធ្លាប់គាំទ្រកញ្ញា តេង លក្ខិណា បានលើកឡើងបែបចំអកនាងថា សម័យបច្ចុប្បន្ននេះមានអ្នកចម្រៀងជាច្រើនដែលមានសមត្ថភាព និងទឹកដមសំឡេងពីរោះច្រើនកកកុញកំពុងតែប្រជែងគ្នាដណ្តើមទីផ្សារលើវិស័យសិល្បៈចម្រៀង ទោះបី តេង លក្ខិណា ខំប្រឹងយ៉ាងណាក៏ដោយក៏មិនអាចទាក់ទាញបានប្រជាប្រិយភាពល្បីល្បាញដូចអាជីពជាពិធីការិនីនោះដែរ។
តបនឹងការរិះគន់នោះ ស្រីស្រស់ តេង លក្ខិណា មិនត្រឹមតែមិនមានការប្រតិកម្ម ឬបដិសេធពីការលើកឡើងនោះយ៉ាងណាទេ ផ្ទុយទៅវិញអតីតពិធីការិនីរូបនេះថា ពាក្យរិះគន់ខ្លះអាចជួយកែតម្រូវឲ្យនាងបានល្អប្រសើរជាងមុន។
តេង លក្ខិណា បានលើកឡើងទៀតថា៖«ក្នុងការប្រកបរបររកស៊ីអ្វីមួយវាមិនដែលជោគជ័យភ្លាមៗនោះទេ ត្រូវតែតស៊ូ»។ បន្ថែមលើឆន្ទៈនេះ កញ្ញា តេង លក្ខិណា បានលើកឧទាហរណ៍ខ្លួនឯងថា៖ «យ៉ាងណាមិញដូចជា រូបនាងអ៊ីចឹងដំបូងឡើយមិនជឿថា ខ្លួនឯងអាចធ្វើជាពិធីការិនីបានឡើយ ប៉ុន្តែក្រោយសាកល្បងមួយរយៈទទួលបានជោគជ័យ ដូចគ្នានឹងអាជីពចម្រៀងដែរ ខ្ញុំទើបតែប្រឡូកក៏មិនទាន់សង្ឃឹមថា អាចទាញយកប្រជាប្រិយភាពបានភ្លាមនោះទេ»។
នាងបញ្ជាក់ថា៖ «អ្វីក៏ដោយត្រូវតែមានការតស៊ូទើបសម្រេចបានជោគជ័យ»។
ការមកក្លាយជាតារាចម្រៀងនៅក្នុងផលិតកម្ម អឹម ដោយភាពស្ងប់ស្ងាត់ និងពុំធ្លាប់មានបទពិសោធលើអាជីពនេះ សូម្បីបន្តិចពីមុននោះ ត្រូវបានគេលើកឡើងថា ដោយសារតែកញ្ញា តេង លក្ខិណា មានទំនាក់ទំនងជាពិសេសជាមួយថៅកែផលិតកម្មមួយនេះ។ យ៉ាងណា នាងបានបដិសេធចំពោះការលើកឡើងនោះទាំងស្រុង ដោយអះអាងថា នាងក្លាយជាតារាចម្រៀងនេះ ដោយសមត្ថភាព និងទេពកោសល្យសិល្បៈចម្រៀងរបស់នាង និងការខំហ្វឹកហាត់ មិនមែនការចូលខ្លួនក្នុងផលិតកម្មនេះគ្រាន់ជាខែលបិទបាំងដូចគេថានោះទេ។
តេង លក្ខិណា ថ្លែងថា នាងនឹងមិនអស់សង្ឃឹមនឹងមហិច្ឆតាក្លាយជាអ្នកចម្រៀងឡើយ ព្រោះកាលពីនៅជាពិធីការិនីក៏មិនមែនចូលភ្លាមលេចធ្លោភ្លាមៗដែរ ដូចគ្នាអាជីពជាអ្នកចម្រៀងល្បីក៏ត្រូវការពេលវេលាដែរ»៕