ដោយ៖​ ឡាយ សាមាន​
ថ្ងៃព្រហស្បតិ៍ ទី30 តុលា 2014
http://vodhotnews.com

មើលរូបភាពបន្ថែម

លោកនាយករដ្ឋមន្រ្តី ហ៊ុន សែន និងលោកនាយករដ្ឋមន្រ្តីថៃ ប្រាយុទ្ធ ចាន់-អូចា ក្នុងកិច្ចប្រជុំនៅប្រទេសអុីតាលី(រូបថតពីហ្វេសប៊ុកនាយករដ្ឋមន្រ្តីកម្ពុជា)

​នាយករដ្ឋមន្ត្រី​ថៃ ដែល​ចេញមក​ពី​ប្រមុខ​យោធាបាន​ធ្វើ​ទស្សនៈកិច្ច​លើកដំបូង​នៅ​កម្ពុជា នៅ​រសៀល​ថ្ងៃ​ព្រហស្បតិ៍​នេះ និង​បាន​ធ្វើ​ជា​អធិបតី​ក្នុង​ពិធី​ចុះហត្ថលេខា​លើ​អនុស្សរណៈ​ចំនួន​បីជាមួយ ​កម្ពុជា​។​

​នៅវេលា​ម៉ោង ៣​រសៀល​ថ្ងៃ​ទី៣០ ខែតុលា​នេះ មន្ត្រីជាន់ខ្ពស់​ភាគី​ទាំងពីរ បាន​ចុះហត្ថលេខា​លើ​អនុស្សរណៈ​ចំនួន​បី​រួមមាន អនុស្សរណៈ​ស្តីពី កិច្ចសហប្រតិបត្តិការ​ទេសចរណ៍​ អនុស្សរណៈ​ស្តីពី កិច្ចសហប្រតិបត្តិការ​ទ្វេភាគី​ដើម្បី​លុបបំបាត់​ការជួញដូរ​មនុស្ស និង​ជួយ​ដល់​ជនរងគ្រោះ​ដោយសារ​ការជួញដូរ និង​អនុស្សរណៈ​ស្តីពី ការតភ្ជាប់​ផ្លូវដែក រវាង​រដ្ឋភិបាល​កម្ពុជា និង​ថៃ នៅក្រោម​វត្តមាន នាយករដ្ឋមន្ត្រី​កម្ពុជា​លោក ហ៊ុន សែន និង​នាយករដ្ឋមន្ត្រី​ថៃ លោក​ប្រា​យុទ្ធ ច័ន្ទ​អូ​ចា (Prayut Chan-O-Cha)​។​

​នាយករដ្ឋមន្ត្រី​ថៃ មក​បំពេញ​ទស្សនកិច្ច​ជា​ផ្លូវការ​នៅ​កម្ពុជា រយៈពេល​ពីរ​ថ្ងៃ ចាប់ពី​ថ្ងៃ​ទី ៣០ ដល់​ថ្ងៃ​ទី ៣១ ខែតុលា តាម​ការអញ្ជើញ​ពី​លោកនាយក​រដ្ឋមន្ត្រី​កម្ពុជា ហ៊ុន សែន​។​

​ក្នុងអំឡុងពេល​ទស្សន​កិច្ច​លោក ប្រា​យុទ្ធ ច័ន្ទ​អូ​ចា ក៏​ចូល​គាល់​ព្រះមហាក្សត្រ នរោត្តម សីហ​មុនី អញ្ជើញ​គោរព​ព្រះ​វិញ្ញាក្ខន្ធ​ព្រះករុណា ព្រះ​បរម​រតន​កោដ្ឋ នៅ​សួនច្បារ​វិមានឯករាជ្យ​៕

សូមសរសេរមកកាន់លោក ឡាយ សា​មាន​ តាមរយៈ samean@vodhotnews.com​