ដោយ៖ ណាត សុភាព
ថ្ងៃសុក្រ ទី21 វិច្ឆិកា 2014
http://vodhotnews.com
ស្តាប់សំឡេង៖ |
ចម្លងទុក |
នាយករដ្ឋមន្ត្រីហ៊ុន សែន សម្តែងមោទនភាពថា កំណើនសេដ្ឋកិច្ចនៅប្រទេសកម្ពុជាថេរ ក្នុងរយៈពេល២ទសវត្សរ៍ចុងក្រោយនេះ ទោះនៅតំបន់ខ្លះជួបគ្រោះធម្មជាតិ ឬគ្រោះរាំងស្ងួតក៏ដោយ ។
លោក ហ៊ុន សែន ថ្លែងក្នុងពិធីប្រគល់សញ្ញាបត្រដល់និស្សិតនៅសាកលវិទ្យាល័យមួយ ដែលធ្វើឡើងនៅក្នុងវិទ្យាស្ថានជាតិអប់រំ កាលពីថ្ងៃព្រហស្បតិ៍ម្សិលមិញថា តាមរបាយការណ៍ស្រាវជ្រាវ២០ឆ្នាំជាប់ៗគ្នាចុងក្រោយនេះ កំណើនសេដ្ឋកិច្ចកម្ពុជាមានកំណើនថេរ ទោះជាកាលពីឆ្នាំ២០០៩ ការរីកចម្រើនមានត្រឹមកម្រិត០,១ភាគរយ ដោយសារវិបត្តិហិរញ្ញវត្ថុសាកលក៏ដោយ ។ លោកសង្ឃឹមថា សេដ្ឋកិច្ចកម្ពុជានឹងកើនឡើងលើសពី៧ភាគរយនៅឆ្នាំ២០១៤នេះ ។ លោកបញ្ជាក់ថា «រយៈពេល២០ឆ្នាំជាប់គ្នា គឺកំណើនសេដ្ឋកិច្ចថេររបស់កម្ពុជា យើងមានការធ្លាក់ចុះរហូតដល់០,១ភាគរយ តែមួយឆ្នាំគត់ គឺនៅឆ្នាំ២០០៩ នៅពេលវេលាណា វិបត្តិហិរញ្ញវត្ថុសកលបានមកដល់ ហើយយើងងើបឡើងវិញនៅឆ្នាំ២០១០ ជាង៦ភាគរយ ហើយឆ្នាំ២០១១ ឡើងលើស៧ភាគរយ ហើយឆ្នាំនេះសង្ឃឹមថា នឹងមិនទាបជាង៧ភាគរយទេ» ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា ការបែងចែកសេដ្ឋកិច្ចមិនមានយុត្តិធម៌ដោយសារតែអ្នកមានកាន់តែមាន អ្នកក្រនៅតែក្រ ដោយសារការផ្តល់ប្រាក់បៀវត្សឲ្យមន្ត្រីរាជការ កម្មករ នៅមានកម្រិតទាប និងធ្វើឲ្យពលរដ្ឋចន្លោះពី២៥ ទៅ៣០ភាគរយរស់នៅក្រោមបន្ទាត់ក្រីក្រ ព្រមទាំងធ្វើឲ្យពលរដ្ឋមួយចំនួនធ្វើចំណាកស្រុក ទៅរកការងារនៅក្រៅប្រទេសជាដើម ។ លោកថា គណបក្សកាន់អំណាចត្រូវបែងចែកផលប្រយោជន៍ឲ្យមានសមធម៌ បើពុំដូចនេះទេនឹងធ្វើឲ្យសង្គមជាតិមានអស្ថេរភាពផងដែរ ។ លោកថា «គណបក្សកាន់អំណាចត្រូវតែយកចិត្តទុកដាក់ បែងចែកផលប្រយោជន៍ឲ្យបានសមធម៌ មិនមែនទុកឲ្យអ្នកមានមួយក្តាប់តូច កាន់តែមានឡើង ចំណែកអ្នកក្រមួយចំនួនធំ កាន់តែក្រទៅ អាហ្នឹងសេដ្ឋកិច្ចរីកចម្រើនយ៉ាងណាក៏ដោយ បើសិនជាការបែងចែកផលប្រយោជន៍ វាមិនមានសមធម៌ទេ វាអាចធ្វើឲ្យសង្គមមានអំពើអយុត្តិធម៌ វាធ្វើឲ្យមានអស្ថិរភាពសង្គមដដែលបាទ» ។
បណ្ឌិតសេដ្ឋកិច្ច និងជាមន្ត្រីស្រាវជ្រាវនៅរាជបណ្ឌិតកម្ពុជា លោក គី សេរីវឌ្ឍន៍ មានប្រសាសន៍ថា បើធ្វើការវាស់ស្ទង់តាម GDP ជាមធ្យម សេដ្ឋកិច្ចកម្ពុជា២០ឆ្នាំកន្លងទៅ ពិតជាមានកំណើនថេរប្រាកដមែន ។ ប៉ុន្តែលោកថា បើម្ចាស់សហគ្រាសលក់បានចំណេញច្រើន ហើយផ្តល់ប្រាក់ចំណូលដល់កម្មករទាប នោះធ្វើឲ្យប៉ះពាល់ដល់កម្មករ និងអាចឈានដល់បិទសហគ្រាស ។ លោកបញ្ជាក់ថា ដើម្បីទប់ស្កាត់បញ្ហានេះ រដ្ឋាភិបាលត្រូវកំណត់យកពន្ធពីម្ចាស់សហគ្រាសឲ្យខ្ពស់ ដើម្បីយកថវិកានោះទូទាត់ទៅឲ្យកម្មករ ។ លោកបញ្ជាក់ថា «កំណើនថេរជារួមគឺវាល្អសម្រាប់សេដ្ឋកិច្ច ប៉ុន្តែវាប្រាកដជាមានអ្នករងគ្រោះ ហើយនឹងអាស្រ័យលើរចនាសម្ព័ន្ធនៃផលិតកម្ម ប្រសិនជាវាមានភាពមិនស្មើគ្នានៅក្នុងការបែងចែក ប្រាក់ចំណូល ដូចជាពេលដែលផលិតមក ម្ចាស់សហគ្រាសបានចំណេញច្រើន ហើយកម្មករបានជាផលតិចតួចទៅ វាមានភាពមិនស្មើគ្នា បានជាមានឥទ្ធិពលអាក្រក់ដល់សេដ្ឋកិច្ចគឺកម្មករហ្នឹងហើយ។ អ៊ីចឹងអាហ្នឹងត្រូវការច្បាប់របស់រដ្ឋ ត្រូវការអន្តរាគមន៍របស់រដ្ឋដើម្បីធ្វើម៉េចឲ្យការបែងចែកប្រាក់ចំនូលហ្នឹង វាមានភាពថេរ យុត្តិធម៌» ។
របាយការណ៍របស់ធនាគារពិភពលោក កាលពីថ្ងៃទី៦តុលា ឲ្យដឹងថា កំណើនសេដ្ឋកិច្ចកម្ពុជានឹងកើនឡើងដល់៧,២ភាគរយ សម្រាប់ឆ្នាំ២០១៤ ដោយសារការនាំចេញសម្លៀកបំពាក់ សំណង់ និងវិស័យផ្សេងៗទៀត ។ របាយការណ៍ដដែលឲ្យដឹងទៀតថា វិស័យកាត់ដេរ បានក្លាយជាក្បាលម៉ាស៊ីនដ៏សំខាន់របស់កម្ពុជា ខណៈវិស័យសំណង់ និងទេសចរណ៍មានការដើរយឺតបន្តិច ។ វិស័យកាត់ដេរសម្លៀកបំពាក់បានកើនឡើង១៤ភាគរយ ស្មើនឹង ២,៨ពាន់លានដុល្លារ ក្នុងរយៈពេល៦ខែ ឆ្នាំ២០១៤៕
សូមសរសេរមកលោក ណាត សុភាព តាមរយៈ sopheap@vodhotnews.com
ភរឬភូទបើសុំនិងខ្ចីមិនលោះកំណើនជំពាក់បំណុលគេទើបសម!!!!
មនុស្សល្ងង់ ដឹកនាំ ប្រទេសជំពាក់ គេ ហូរហែរ ! ដល់ពេលខ្លួន ស្លាប់ទៅ អោយ កូន ទទួលថ្ម បាក់ !
កំណើនសេដ្ឋកិច្ចរបស់ប្រជាជនខ្មែរអត់មានកើនឡើងទេ
មានតែកំណើនសេដ្ឋកិច្ចខាងពុករលួយរបស់ពួកមន្រ្តីគណបក្សប្រជាជនទេដែលឡើងកប់ពពក
កើនរហូតដល់លួចក្នុងសភាម៉ាស៊ីនថតចម្លងមួយថ្លៃស្មើរតម្លៃឡានម៉ាកសេដេស ជាពិសេស
គឺ ហ៊ុន សែន បានទទួលកំណើនពុករលួយច្រើនជាងគេ ។