ដោយ ខែ សុណង
2014-11-25
RFA
ក្រុមប្រឹក្សាឃ្លាំមើលកម្ពុជា និងថ្នាក់ដឹកនាំសហជីព សមាគម និងតំណាងយុវជន បានចុះហត្ថលេខារួមគ្នានៅថ្ងៃទី២៥ វិច្ឆិកា ក្នុងលិខិតមួយផ្ញើទៅក្រសួងយុត្តិធម៌ ឲ្យអន្តរាគមន៍ចំពោះតុលាការដែលបានចាប់ឃុំខ្លួនមនុស្ស ១៩នាក់ ពាក់ព័ន្ធការជួបជុំតវ៉ានាពេលថ្មីៗនេះ។
ក្រុមប្រឹក្សាឃ្លាំមើលកម្ពុជា ជំរុញឲ្យរដ្ឋមន្ត្រីក្រសួងយុត្តិធម៌ ពិនិត្យទៅតុលាការសាលាដំបូង ចំពោះការកាត់ក្ដីព្រះសង្ឃ សកម្មជននយោបាយ និងសកម្មជនដីធ្លី ថាជាការចាប់ខ្លួន និងកាត់ក្ដីដោយគ្មានភស្តុតាង និងយុត្តិធម៌ ហើយតុលាការធ្វើការអនុវត្តមិនប្រកបដោយវិជ្ជាជីវៈ។
តំណាងក្រុមប្រឹក្សាឃ្លាំមើលកម្ពុជា លោក រ៉ុង ឈុន មានប្រសាសន៍នៅថ្ងៃទី២៥ វិច្ឆិកា ថា ព្រះសង្ឃ សកម្មជននយោបាយ និងសកម្មជនដីធ្លី ត្រូវអាជ្ញាធរប្រើវិធានការក្ដៅចាប់អ្នកទាំងនោះ ដោយគ្រាន់តែតវ៉ាដីធ្លី និងប្រមូលផ្ដុំតវ៉ាបញ្ហាសង្គមដោយសន្តិវិធី។ លោកថា តុលាការបានកាត់ទោសពួកគេដោយអយុត្តិធម៌ ពីព្រោះតុលាការនេះគ្រាន់តែជាឧបករណ៍របស់អ្នកមានអំណាច អ្នកនយោបាយ ធ្វើការដោយមិនផ្អែកទៅលើវិជ្ជាជីវៈឡើយ។ បញ្ហានេះ លោក រ៉ុង ឈុន អំពាវនាវឲ្យក្រសួងយុត្តិធម៌ ជួយអន្តរាគមន៍ដោះលែងអ្នកទាំងនោះឲ្យមានសេរីភាព និងដោយឥតលក្ខខណ្ឌ៖ «ពីព្រោះក្រសួងយុត្តិធម៌ បើយើងមើលច្បាប់ដែលទើបចេញក្រោយនេះ ឃើញថាក្រសួងយុត្តិធម៌ អាចសម្របសម្រួលទៅលើតុលាការ ឲ្យមានការលើកលែង ការដោះលែងអ្នកដែលត្រូវបានអាជ្ញាធរចាប់ជាបន្តបន្ទាប់ហ្នឹង»។
ឆ្លើយតបទៅនឹងការដាក់លិខិតជូនទៅរដ្ឋមន្ត្រីក្រសួងយុត្តិធម៌ ឲ្យអន្តរាគមន៍ដោះលែងនេះ មន្ត្រីក្រសួងយុត្តិធម៌ ថ្លែងថា គឺជាសិទ្ធិសេរីភាពរបស់ក្រុមប្រឹក្សាឃ្លាំមើលកម្ពុជា។
អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក គឹម សន្តិភាព អះអាងថា ការសម្រេចកាត់សេចក្ដី និងការឃុំខ្លួនមនុស្ស គឺជាអំណាចរបស់ស្ថាប័នតុលាការតែមួយគត់ ដែលក្រសួងយុត្តិធម៌ មិនអាចជ្រៀតជ្រែកបានឡើយ។ លោកបញ្ជាក់ថា ក្នុងករណីប្រជាពលរដ្ឋនៅតែមិនសុខចិត្ត ថាស្ថាប័នតុលាការមិនឯករាជ្យ ឬចំណុះឲ្យអ្នកមានអំណាចណាម្នាក់នោះ ពួកគេអាចរកភស្តុតាង និងដាក់ទៅឧត្ដមក្រុមប្រឹក្សានៃអង្គចៅក្រម ដើម្បីពិនិត្យសម្រេចធ្វើការស៊ើបអង្កេតស្រាវជ្រាវពីបញ្ហានេះបាន។
លោក គឹម សន្តិភាព៖ «បញ្ហាដែលចោទថាតុលាការមិនឯករាជ្យ តុលាការឋិតក្នុងការគាបសង្កត់របស់អំណាចណាមួយនោះ អាហ្នឹងជាការនិយាយគ្រាន់តែជាព័ត៌មានអ្នកដែលនិយាយតែប៉ុណ្ណោះ។ ដោយឡែកការត្រួតពិនិត្យការងារកិច្ចការតុលាការ ទាក់ទងការអនុវត្តតួនាទីកាតព្វកិច្ចរបស់ខ្លួន គឺជាការត្រួតពិនិត្យរបស់គណៈកម្មការត្រួតពិនិត្យមួយ របស់ឧត្ដមក្រុមប្រឹក្សានៃអង្គចៅក្រម ជាអ្នកពិនិត្យវិនិច្ឆ័យករណីផ្សេងៗ ក្នុងការអនុវត្តកិច្ចការរបស់ចៅក្រមព្រះរាជអាជ្ញាតាមស្ថាប័នតុលាការ»។
រហូតមកដល់ពេលនេះ ព្រះសង្ឃ សកម្មជនដីធ្លី សិទ្ធិមនុស្ស និងសកម្មជននយោបាយ ត្រូវបានអាជ្ញាធរចាប់ខ្លួនជាបន្តបន្ទាប់សរុប ១៩នាក់ មានដូចជា ព្រះសង្ឃ ៣អង្គ សកម្មជនដីធ្លី ១២នាក់ សកម្មជនគណបក្សសង្គ្រោះជាតិ ៤នាក់។ អ្នកទាំងនោះ ជាប់ចោទពីបទមួយចំនួនដូចជា បទផ្ដើមគំនិតហិង្សាដោយចេតនា បទញុះញង់ឲ្យប្រព្រឹត្តបទឧក្រិដ្ឋ និងដឹកនាំចលនាកុបកម្ម បទប្រឆាំងនឹងមន្ត្រីរាជការសាធារណៈ បទបង្កការកកស្ទះចរាចរណ៍សាធារណៈ បំផ្លិចបំផ្លាញទ្រព្យសម្បត្តិ និងបទបរិហារកេរ្តិ៍ ជាដើម។
ការចាប់ខ្លួននេះ ត្រូវបានសង្គមស៊ីវិល បក្សប្រឆាំង អំពាវនាវឲ្យដោះលែង និងរិះគន់ថា ការចាប់ខ្លួនអ្នកទាំងនេះ គឺជាការបំបិទសិទ្ធិសេរីភាពបញ្ចេញមតិ និងជារឿងនយោបាយ ហើយថាហាក់ដូចជាធ្វើឲ្យស្ថានភាពនយោបាយនៅកម្ពុជា វិលមករកភាពតានតឹង ព្រមទាំងធ្វើឲ្យស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ធ្លាក់ចុះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- តុលាការលើកពេលសវនាការព្រះសង្ឃ លួន សុវ៉ាត ថាខុសបច្ចេកទេស
- ក្រុមសកម្មជនការពារដីធ្លីនិងព្រះសង្ឃទាមទារនៅមុខគុកព្រៃសជំរុញឲ្យដោះលែងមនុស្ស១៧នាក់
- សង្គមស៊ីវិលថាគម្រោងរកអភ័យឯកសិទ្ធិសភាឲ្យលោក មាជ សុវណ្ណារ៉ា នឹងជួបឧបសគ្គ
- HRW៖ ជនភៀសខ្លួនដែលមកកម្ពុជានឹងប្រឈមការរស់នៅលំបាកឬគ្រោះថ្នាក់
- សង្គមស៊ីវិលរិះគន់ការបង្កើនចំនួនគណៈអភិបាលខេត្តនិងស្រុកថាជាការចែកអំណាច
- គណបក្សសង្គ្រោះជាតិប្រារព្ធពិធីរំឭកវិញ្ញាណក្ខន្ធអ្នកស្លាប់នៅស្ពានពេជ្រ
- លោក ហ៊ុន សែន ឆ្លើយតបចំពោះការចោទករណីតុលាការចាប់សកម្មជនបក្សប្រឆាំង
- តុលាការបដិសេធការស្នើសុំរបស់មេធាវីឲ្យលោក មាជ សុវណ្ណារ៉ា នៅក្រៅឃុំ
- អ៊ឺរ៉ាបង្ហាញសេចក្ដីព្រាងនៃប្រព័ន្ធចុះឈ្មោះបោះឆ្នោតថ្មីតាមបែបទំនើប
………………….. ស្អី ទៅ បទឧក្រិដ្ឋ ??????????????????????????
១ = មាន អាវុធ កាំបិត ពូថៅ កាំភ្លើង ដុតបំផ្លាញ ទ្រង់ទ្រាយ ធំ ឃោរឃៅ វ៉ៃ
បាញ់សម្លាប់មនុស្ស យ៉ាងរង្គាល គ្មានញញើត !
២ = តវ៉ា បញ្ចេញមតិ តាម មាត់ ដោយដៃ ទទេ !
តើ ១ ណា បទ ឧក្រិដ្ឋ ?
ពូកអាសុីអាចម៍ការពារកែគ្នាវា