Thu, 27 November 2014
ឃុត សុភចរិយា
ភ្នំពេញប៉ុស្តិ៍
ភ្នំពេញៈ ប្រជាសហគមន៍ ភូមិបឹងឈូក ជាង ២០ នាក់តំណាងឲ្យជាង ៤០ គ្រួសារ ដែលបារម្ភពីការបណ្ដេញចេញដោយបង្ខំពីសំណាក់អាជ្ញាធរ ខណ្ឌឫស្សីកែវ កាលពីម្សិលមិញ បាននាំគ្នាដាក់ញត្តិទៅរដ្ឋសភានិងខុទ្ទកាល័យលោកនាយករដ្ឋមន្ត្រី ហ៊ុន សែន ដើម្បីសុំអន្តរាគមន៍ជួយផ្តល់ប័ណ្ណកម្មសិទ្ធិដីធ្លីជូនពួកគាត់ដើម្បីបញ្ចប់ជម្លោះដីធ្លីដ៏រ៉ាំរ៉ៃនៅក្នុងសហគមន៍នេះ។
អ្នកស្រី ខៀវ ចិន្តា អាយុ ៤២ឆ្នាំ តំណាងសហគមន៍ នៅ ភូមិបឹងឈូក សង្កាត់គីឡូម៉ែត្រលេខ ៦ បានឲ្យដឹងថា ការដាក់ញាត្តិសុំកិច្ចអន្តរាគមន៍ជាថ្មីនៅពេលនេះ គឺដោយសារតែអាជ្ញាធរមានបំណងចង់ឈូសឆាយដីផ្ទះដែលពួកគាត់កំពុងរស់នៅ ដើម្បីបើកច្រកផ្លូវ ៧ខ្សែ ចូលទៅក្នុងតំបន់អភិវឌ្ឍន៍ឫស្សីកែវ ដោយគ្មានសំណងគោលនយោបាយអ្វីទាំងអស់។
អ្នកស្រីនិយាយថា៖ «ជាច្រើនឆ្នាំនេះ យើងរីករាយនិងគាំទ្រពេញទំហឹងលើគម្រោងអភិវឌ្ឍន៍នានារបស់រាជរដ្ឋាភិបាល ព្រោះគម្រោងទាំងនោះមានការទទួលខុសត្រូវពីផលប៉ះពាល់ដល់ជីវភាពរស់នៅរបស់ប្រជាពលរដ្ឋ ប៉ុន្តែបើអភិវឌ្ឍមកឈូសឆាយផ្ទះយើងខ្ញុំកំពុងរស់នៅ ដោយគ្មានដំណោះស្រាយបែបនេះខ្ញុំត្រូវតែជំទាស់។ ជំទាស់ដើម្បីការពារសិទ្ធិរស់រានរបស់ យើងតែប៉ុណ្ណោះ»។
យោងសេចក្ដីជូនដំណឹងចុះថ្ងៃ ទី១៤ ខែវិច្ឆិកា របស់លោក ធុយ សុខន អភិបាល ខណ្ឌឫស្សីកែវ ដែលទទួលបានកាលពីម្សិលមិញ អាជ្ញាធរគ្រោងឈូសឆាយបើកផ្លូវចំនួន ៧ខ្សែ មានផ្លូវលេខ ១៨០០, ១៧០១, ១៧០៣, ១៨០៤, ១៨០៨, ១៨១២ និង ១៨១៨ ក្នុងតំបន់អភិវឌ្ឍន៍ឫស្សីកែវ ដើម្បីងាយឲ្យក្រុមការងាររបស់អាជ្ញាធរជាតិដោះស្រាយទំនាស់ដីធ្លី ចុះដោះស្រាយទំនាស់ក្នុងតំបន់នេះ កុំឲ្យនៅអូសបន្លាយយូរទៀត។
អាជ្ញាធរបានដាក់ឱសានវាទ ១៥ថ្ងៃ ចាប់ពីថ្ងៃជូនដំណឹង ដោយតម្រូវឲ្យពលរដ្ឋរុះរើផ្ទះនិងសំណង់របស់ខ្លួនចេញពីតំបន់អនុវត្តគម្រោង ដើម្បីឲ្យដំណើរការឈូសឆាយបើកផ្លូវទាំង ៧ ខ្សែតាមពេលកំណត់។
សេចក្ដីជូនដំណឹងនោះក៏បានព្រមានដែរថា៖ «ក្នុងករណីមិនគោរពអនុវត្តតាមសេចក្ដីជូនដំណឹងនេះ អាជ្ញាធរខណ្ឌនឹងសហការជាមួយអាជ្ញាធរជាតិដោះស្រាយទំនាស់ដីធ្លីនឹងចុះអនុវត្តវិធានការរដ្ឋបាលរុះរើដោយមិនទទួលខុសត្រូវលើការខូចខាតឬបាត់បង់ឡើយ»។
លោក ណឺប លី ប្រធានកម្មវិធីពង្រឹងសិទ្ធិអំណាចសហគមន៍នៃក្រុមការងារពិសេសសិទ្ធិលំនៅឋាន សម្ដែងក្ដីកង្វល់ថា ប្រជាពលរដ្ឋក្រីក្រនៅក្នុងសហគមន៍នេះ អាចនឹងត្រូវប្រឈមទៅនឹងការបណ្ដេញចេញជាថ្មី ដោយសារតែគម្រោងបើកផ្លូវទាំង ៧ ខ្សែនេះ។ លោកថ្លែងថា៖ «ខ្ញុំយល់ឃើញថា សេចក្ដីជូនដំណឹងនេះគឺជាការដាក់សម្ពាធយ៉ាងធ្ងន់ធ្ងរទៅលើប្រជាពលរដ្ឋនៃសហគមន៍ក្រីក្រនេះ ដែលធ្វើឲ្យយើងបារម្ភ ពីការបណ្ដេញពលរដ្ឋចេញពីលំនៅឋានដោយគ្មានសំណងសមរម្យ»។
វិវាទដីធ្លីនៅក្នុងសហគមន៍ ភូមិបឹងឈូក សង្កាត់គីឡូម៉ែត្រ ៦ ចាប់ផ្ដើមកាលពី ខែកុម្ភៈ ឆ្នាំ២០០៩ ដែលកាលនោះ អាជ្ញាធរ ខណ្ឌឫស្សីកែវ បានតម្រូវឲ្យអ្នកភូមិក្រីក្រទាំងនោះរុះរើផ្ទះចេញដោយបានចោទប្រកាន់អ្នកភូមិទាំងនោះថា បានចូលរំលោភកាន់កាប់លើដីកម្មសិទ្ធិឯកជនមានម្ចាស់ឈ្មោះ ទៀ ធឿន ដែលអ្នកភូមិអះអាងថា មិនធ្លាប់ស្គាល់ទាល់តែសោះ ចាប់តាំងពី ឆ្នាំ១៩៨០ និង ១៩៩០ ខណៈពួកគាត់បានចូលទៅរស់នៅក្នុងតំបន់នោះ ដោយមានការទទួលស្គាល់ពីរដ្ឋអំណាចមូលដ្ឋាន។
ប៉ុន្តែក្រោយមកតំណាងអ្នកភូមិ ៦នាក់ ដែលរួមទាំងអ្នកស្រី ខៀវ ចិន្តា ផងត្រូវបុគ្គលម្នាក់ថ្មីទៀតឈ្មោះ ឡៅ តុងមី ដែលពួកគាត់មិនធ្លាប់ស្គាល់ដាក់ពាក្យប្ដឹងទៅតុលាការរាជធានីចោទពួកគាត់ថា បានប្រើហិង្សាទៅលើម្ចាស់កម្មសិទ្ធិដីធ្លីសុចរិត បច្ចុប្បន្នតុលាការបានបញ្ចប់ការសាកសួររួចហើយនិងរង់ចាំតែការជំនុំជម្រះ ប៉ុន្តែនៅមិនទាន់កំណត់កាលបរិច្ឆេទ។ នេះបើតាមការឲ្យដឹងពីអ្នកស្រី ម៉ុន សាវេត អាយុ ៣២ឆ្នាំ តំណាងម្នាក់ទៀត ដែលរងការប្ដឹងចោទពីឈ្មោះ ឡៅ តុងមី។
អ្នកស្រី សាវេត បន្តថា៖ «ជីវភាពក្រីក្រហូបមិនឆ្ងាញ់មិនគ្រប់គ្រាន់មិនថ្វីទេ ឲ្យតែមានដីនិងផ្ទះជ្រក ប៉ុន្តែបើរដ្ឋត្រូវការអភិវឌ្ឍយើងមិនជំទាស់ទេ សុំតែផ្ដល់ដីសង្គមកិច្ចកន្លែងណាសមរម្យសម្រាប់ពួកយើងសង់ផ្ទះរស់នៅឡើងវិញ»។
អ្នកស្រីបន្តថា ញតិ្តពួកគាត់ កាលពីព្រឹកម្សិលមិញ គណៈកម្មការ ទី១ នៃរដ្ឋសភាទទួលយកហើយ និងសន្យាចុះពិនិត្យអង្កេតនៅសប្ដាហ៍ក្រោយនេះ។ ខាងមន្ត្រីខុទ្ទកាល័យនាយករដ្ឋមន្ត្រីក៏បានទទួលញត្តិពួកគាត់ដែរ និងសន្យាបញ្ជូនទៅថ្នាក់លើពិនិត្យនិងបញ្ជូនបន្តទៅដល់ដៃលោកនាយករដ្ឋមន្ត្រី ដើម្បីពិនិត្យពិចារណា និងធ្វើការសម្រេច៕