ដោយ៖ ថុល ស្រីលក្ខណ៍
ថ្ងៃព្រហស្បតិ៍ ទី27 វិច្ឆិកា 2014
http://vodhotnews.com
តំណាងអ្នកមានជម្លោះដីធ្លី នៅខណ្ឌឫស្សីកែវ រាជធានីភ្នំពេញ៤នាក់ សម្ដែងការព្រួយបារម្ភខ្លាចជាប់ពន្ធនាគារ ខណៈសាលាដំបូងរាជធានីភ្នំពេញ រៀបចំបើកសវនាការលើសំណុំរឿង ដែលចោទប្រកាន់ពួគាត់ថា «ប្រើហិង្សាលើអ្នកកាន់កាប់អចលនៈទ្រព្យដោយស្របច្បាប់» នៅពេលឆាប់ៗនេះ ។
ការព្រួយបារម្ភនេះធ្វើឡើង បន្ទាប់ពីសាលាដំបូងរាជធានីភ្នំពេញ កាលពីថ្ងៃពុធទី២៦ ខែវិច្ឆិកា ប្រគល់ដីការស្តីពីការបញ្ចប់ការសាកសួរពួកគាត់ពីបទ «ប្រើហិង្សាលើអ្នកកាន់កាប់អចលនៈទ្រព្យដោយស្របច្បាប់» មកឲ្យពួកគាត់ហើយគ្រោងបើកសវនាការឆាប់ៗនេះ។
តំណាងសហគមន៍បឹងឈូក ក្នុងខណ្ឌឫស្សីកែវ អ្នកស្រី ខៀវ ចិន្តា ឲ្យVOD ដឹងនៅថ្ងៃព្រហស្បតិ៍នេះថា កាលពីម្សិលមិញនេះ ពួកគាត់បានទទួលដីការរបស់តុលាការ ដោយបានប្រាប់ថា តុលាការបញ្ចប់សាកសួរលើពួកគាត់ តែមិនទាន់កំណត់ពេលបើកសវនាការនោះទេ។ អ្នកស្រីបន្តថា ពួកគាត់មិនមានជំនឿលើប្រព័ន្ធតុលាការនៅកម្ពុជានោះទេ ហើយពួកគាត់បារម្ភពីសុវត្តិភាព ព្រោះខ្លាចតុលាការឃុំខ្លួនពេលបើកសវនាការ ។
ប៉ុន្តែអ្នកស្រី ខៀវ ចិន្តា បញ្ជាក់ថា អ្វីដែលអ្នកស្រីមានចម្ងល់ដោយសារ ពាក្យបណ្តឹងនោះប្តឹងពួកគាត់ថា បានប្រើហិង្សាកាលពីឆ្នាំ២០០៩ តែនៅឆ្នាំដដែលនេះ អាជ្ញាធរបានចុះឈូសឆាយផ្ទះរបស់ពួកគាត់ដោយចោទប្រកាន់ពួកគាត់ថា រស់នៅអាណាធិបតេយ្យលើដីរដ្ឋ ។ អ្នកស្រីថា តុលាការបានកោះហៅពួកគាត់ទៅសាកសួរជាបន្តបន្ទាប់តាំងពីឆ្នាំ២០១២រហូតមកដល់ពេលនេះ បន្ទាប់ពីពួកគាត់ចេញមុខតវ៉ាមិនឲ្យឈូសឆាយផ្ទះរបស់ពួកគាត់ដោយគ្មានសំណង។
តំណាងពលរដ្ឋទាំង៤នាក់នោះរួមមាន លោក ប៊ូ ម៉េង លោកកុល សោភា លោក កាង ណារ៉េន និងអ្នកស្រី ខៀវ ចិន្តា។
VOD មិនទាន់អាចស្វែងរកការបំភ្លឺករណីនេះ ពីមន្ត្រីតុលាការដែលកាន់សំណុំរឿងរបស់ក្រុមអ្នកស្រី ខៀវ ចិន្តាបានទេ ព្រោះពុំមានប្រភពដើម្បីទាក់ទង ។
ប៉ុន្តែតាមលិខិតរបស់លោក ធុយ សុខន ចុះថ្ងៃទី១៤ ខែវិច្ឆិកា ឆ្នាំ២០១៤ ឲ្យពលរដ្ឋដឹងថា កាលដែលអាជ្ញាធរតម្រូវឲ្យរុះរើផ្ទះក្រុមអ្នកស្រី ខៀវ ចិន្តា គឺដោយសារសាលារាជធានីភ្នំពេញ ចាប់ផ្តើមដំណើរការឈូសឆាយ ដើម្បីបើកផ្លូវលេខ១៨០០ ផ្លូវ១៧០១ ផ្លូវ១៧០៣ និងផ្លូវមួយចំនួនទៀត ក្នុងតំបន់អភិវឌ្ឍន៍ខណ្ឌឫស្សីកែវ ។
ប្រធានផ្នែកបច្ចេកទេសស៊ើបអង្កេតនៃអង្គការលីកាដូលោក អំ សំអាត យល់ថា មានតែវិធានការដោះស្រាយផ្តល់សំណងសមរម្យដល់ពលរដ្ឋទេ ទើបពលរដ្ឋព្រមទទួលយកការស្នើឲ្យរុះរើលំនៅដ្ឋានរបស់ ពួកគាត់ ។
តំណាងពលរដ្ឋបញ្ជាក់ថា ក្រៅពីសុំណុំរឿងនេះ ពួកគាត់ជាង៤០គ្រួសារនឹងបាត់បង់ផ្ទះសម្បែងនៅថ្ងៃទី២៩ ខែវិច្ឆិកា ក្រោមគម្រោងអភិវឌ្ឍន៍របស់សាលារាជធានីភ្នំពេញនេះ ហើយជាង៦០គ្រួសារផ្សេងទៀតប្រឈមនឹងការបណ្តេញចេញដូចគ្នា ៕
សូមសរសេរមកអ្នកនាង ថុល ស្រីលក្ខណ៍ តាមរយៈ sreyleak@vodhotnews.com