ដោយ ឡេង ម៉ាលី
2014-11-27
RFA
ពិធីបញ្ចុះបឋមសិលាសាងសង់មន្ទីរពេទ្យរបស់ក្រុមហ៊ុនសេវាសុខភាព សាន់រ៉ាយ (Sunrise Healthcare Service Co., Ltd.) របស់ជប៉ុន កាលពីព្រឹកថ្ងៃទី២៧ ខែវិច្ឆិកា ឆ្នាំ២០១៤។ RFA/Leng Maly
ស្ដាប់ ឬ ទាញយកសំឡេង
ស្របពេលដែលសេវាថែទាំសុខភាពនៅប្រទេសកម្ពុជា នៅមិនទាន់មានកម្រិតខ្ពស់នៅឡើយ ធ្វើឱ្យក្រុមហ៊ុនសេវាសុខភាពជប៉ុន បណ្ដាក់ទុនសាងសង់មន្ទីរពេទ្យឯកជនលំដាប់ពិភពលោកមួយ នៅភ្នំពេញ។
ក្រុមហ៊ុនសេវាសុខភាព សាន់រ៉ាយ (Sunrise Healthcare Service Co., Ltd.) របស់ជប៉ុន ចាប់ផ្ដើមសង់មន្ទីរពេទ្យទំនើបថ្មីមួយនៅរាជធានីភ្នំពេញ។
ថ្លែងក្នុងពិធីបញ្ចុះបឋមសិលាសាងសង់នៅព្រឹកថ្ងៃទី២៧ វិច្ឆិកា ទីប្រឹក្សាក្រុមហ៊ុនសេវាសុខភាព សាន់រ៉ាយ និងជាតំណាងមន្ទីរពេទ្យ គីតាហារា អន្តរជាតិ គឺលោកវេជ្ជបណ្ឌិត គីតាហារា ហ្ស៊ីហ្គេមី (Kitahara Shigemi) មានប្រសាសន៍ថា ការសង់មន្ទីរពេទ្យនេះ គឺដើម្បីគាំពារជីវិត និងសុខភាពរបស់ពលរដ្ឋក្នុងប្រទេសកម្ពុជា។
លោកវេជ្ជបណ្ឌិត គីតាហារា ហ្ស៊ីហ្គេមី ឱ្យដឹងថា លោកមានយុទ្ធសាស្ត្រ ៣ ឆ្ពោះទៅកាន់គោលដៅរបស់យើង គឺទី១ ធ្វើយ៉ាងណាឱ្យប្រជាជនកម្ពុជា គ្រប់រូប អាចចូលទៅប្រើប្រាស់សេវាសុខាភិបាលសង្គ្រោះបន្ទាន់នៅមូលដ្ឋានសុខាភិបាលដ៏ល្អមួយ។ ទី២ ការពារប្រជាជនពីជំងឺ និងទប់ស្កាត់ការរាតត្បាតរបស់ជំងឺ និងទី៣ ផ្ដល់ការអប់រំដល់បុគ្គលិកសុខាភិបាលកម្ពុជា។
លោក គីតាហារា ថ្លែងបន្តថា ដើម្បីសម្រេចបានយុទ្ធសាស្ត្រទាំងបីនេះ ចាំបាច់ត្រូវធានាឱ្យហេដ្ឋារចនាសម្ព័ន្ធមានស្ថិរភាព ដូចជា ប្រព័ន្ធអគ្គិសនី ការផ្គត់ផ្គង់ចំណីអាហារប្រកបដោយអនាម័យ និងសុវត្ថិភាពនៅក្នុងមន្ទីរពេទ្យ។ ម្យ៉ាងទៀត ដើម្បីធានាឱ្យពលរដ្ឋកម្ពុជា ដែលខ្វះថវិកាអាចចូលទៅប្រើប្រាស់សេវាសុខាភិបាលមូលដ្ឋាននោះបាន ចាំបាច់គឺត្រូវបង្កើតប្រព័ន្ធធានារ៉ាប់រងមួយដែលសមស្រប។
ឯកអគ្គរាជទូតវិសាមញ្ញ និងសមត្ថភាពជប៉ុន ប្រចាំកម្ពុជា លោក គូម៉ាម៉ារូ យូជី (Kumamaru Yuji) ថ្លែងថា នៅក្នុងកិច្ចគាំទ្រចំពោះការលើកស្ទួយវិស័យសុខាភិបាលកម្ពុជា រាជរដ្ឋាភិបាលជប៉ុនកន្លងមក បានសាងសង់មជ្ឈមណ្ឌលគាំពារមាតានិងទារក ដោយជំនួយឥតសំណង និងបណ្ដុះបណ្ដាលធនធានមនុស្សក្នុងវិស័យសុខាភិបាល។ លោកថ្លែងថា ការសាងសង់មន្ទីរពេទ្យជប៉ុន ថ្មីនេះ គឺជាមន្ទីរពេទ្យឯកជនទ្រង់ទ្រាយធំបំផុតរបស់ប្រទេសជប៉ុន នៅកម្ពុជា។
លោក គូម៉ាម៉ារូ យូជី បញ្ជាក់ថា ការបញ្ចុះបឋមសិលាសាងសង់មន្ទីរពេទ្យនេះ គឺជាសមិទ្ធផលដែលលើកឡើងដោយនាយករដ្ឋមន្ត្រីជប៉ុន ស៊ីនហ្សូ អាបេ (Shinzo Abe) ក្នុងដំណើរទស្សនកិច្ចរបស់លោកមកកម្ពុជា កាលពីឆ្នាំមុននេះ។ ពេលនោះ ស៊ីនហ្សូ អាបេ ចង់បង់បង្កើតមជ្ឈមណ្ឌលសង្គ្រោះបន្ទាន់តាមបច្ចេកវិទ្យាជប៉ុន មួយនៅកម្ពុជា។ លោកបន្តថា មន្ទីរពេទ្យនេះនឹងមានបំពាក់បរិក្ខារពេទ្យទំនើបបំផុតរបស់ជប៉ុន អមជាមួយបុគ្គលិកវេជ្ជសាស្ត្រមានវិជ្ជាជីវៈខ្ពស់ ដែលនឹងផ្ដល់សេវាសុខាភិបាលខ្ពស់។
លោក អ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ សាទរចំពោះការសាងសង់មន្ទីរពេទ្យជប៉ុន ដែលមានបច្ចេកវិទ្យាលំដាប់ពិភពលោកនេះ។ មន្ទីរពេទ្យទំនើបដែលនឹងលេចចេញជារូបរាងខាងមុខនេះ នឹងមានបំពាក់បរិក្ខារផ្នែកវេជ្ជសាស្ត្រឈានមុខគេសម្រាប់បម្រើឱ្យការពិនិត្យជំងឺ ការវះកាត់ដោយប្រើម៉ាស៊ីន MRI ម៉ាស៊ីន CT Scan សរសៃឈាម (Angiography) ដោយប្រើកាំរស្មីអ៊ិច។
មន្ទីរពេទ្យជប៉ុនថ្មីនេះ មានកម្ពស់ ៤ជាន់ ដែលផ្ទៃក្រឡាប្រមាណ ៤.៥០០ម៉ែត្រក្រឡា ឬជិតកន្លះហិកតារ ស្ថិតនៅសង្កាត់ជ្រោយចង្វារ រាជធានីភ្នំពេញ។ តាមគម្រោង មន្ទីរពេទ្យជប៉ុននេះ នឹងសម្ពោធដាក់ឱ្យប្រើប្រាស់នៅដើមឆ្នាំ២០១៦ ខាងមុខ។ នៅដំណាក់ដំបូងនឹងមានគ្រែសម្រាកព្យាបាលចំនួន ៥០ ហើយនៅពេលបន្ទាប់កនឹងពង្រីកដល់ ២០០គ្រែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- លោក ហ៊ុន សែន៖ មន្ទីរពេទ្យទំនើបថៃអាចផ្ដល់ទំនុកចិត្តដល់ភ្ញៀវទេសចរមកកម្ពុជា
- ក្រុមគ្រូពេទ្យប្រទេសប៊ែលហ្ស៉ីកនឹងវះកាត់ជូនពលរដ្ឋនៅខេត្តភាគឦសានឥតគិតថ្លៃ
- ក្មេងស្រីអាយុ៦ឆ្នាំម្នាក់នៅត្បូងឃ្មុំស្លាប់សង្ស័យថាពុលនំកញ្ចប់ផលិតនៅវៀតណាម
- មន្ទីរពេទ្យមិត្តភាពខ្មែរ-សូវៀតជូនដំណឹងពីការព្យាបាលជំងឺភ្នែកដោយឥតគិតថ្លៃ
- រោងចក្រផលិតជីគីមីរបស់វៀតណាមនៅកៀនស្វាយភាយក្លិនស្អុយប៉ះពាល់ដល់ការដកដង្ហើម
- ពលរដ្ឋនិងអាជ្ញាធរនៅជនបទក្នុងខេត្តកំពង់ធំបារម្ភពីសុវត្ថិភាពចំណីអាហារ
- កម្ពុជាមានភាពល្អប្រសើរជាង១០ឆ្នាំមុនក្នុងការប្រឆាំងនឹងភាពស្រេកឃ្លាន
- សម្ភាសប្រធាននាយកដ្ឋានប្រយុទ្ធនឹងជំងឺឆ្លងស្ដីពីវិធានការបង្ការជំងឺអេបូឡា
- យុវជន និងបញ្ហាសុខភាពផ្លូវចិត្ត
Congratulation and we strongly believe that this investment will greatly contribute and strengthen health sector in Cambodia. We fully support and agree with your three strategic missions and these missions will bring some changes to health sector in Cambodia.
All Cambodian are very proud for Japan Investment in health field in Cambodia.
We are not wast expense more money go outside for check health.
វាគួរជាដំណឹងល្អសម្រាប់ពលរដ្ឋខ្មែរដែលតែងតែប្រើសេវាសុខភាពនៅប្រទេសជិតខាង។ តែយ៉ាងណាក៍ដោបើចង់ឲ្យអ្នកល្អៗគេមករកសុីនៅស្រុកខ្មែររដ្ឋាភិបាលខ្មែរត្រូវតែប្តូរនៅវប្បធម៌ប្រើមន្ត្រីរបស់ខ្លួនទៅ ជំរិតទាប្រាក់គេក្រៅផ្លូវការខុសរបៀបនៅពេលដែលគេរកសុីមានបាន។