ដោយ៖ ទូច សុខា
ថ្ងៃពុធ ទី17 ធ្នូ 2014
http://vodhotnews.com
តំណាងរាស្រ្តរបស់គណបក្សសង្គ្រោះជាតិ លោកស្រី មូរ សុខហួរ បានដាក់លិខិតទៅកាន់សាលាដំបូងរាជធានីភ្នំពេញកាលពីម្សិលមិញ ដើម្បីសុំចូលសួរសុខទុក្ខអ្នកជាប់ឃុំទាំង១៧នាក់នៅពន្ធនាគារព្រៃស ។
នៅក្នុងលិខិតចុះថ្ងៃទី១៦ ខែធ្នូ ឆ្នាំ២០១៤ ផ្ញើជូនលោក កែវ មុនី ចៅក្រមសាកសួរសាលាដំបូងរាជធានីភ្នំពេញ តំណាងរាស្ត្រគណបក្សសង្គ្រោះជាតិលោកស្រី មូរ សុខហួរ និងសហការី៥រូបស្នើសុំចូលសួរសុខទុក្ខអ្នកជាប់ឃុំទាំង១៧នាក់ នៅថ្ងៃទី២២ ខែធ្នូ វេលាម៉ោង២:៣០នាទីរសៀល ។
ក្នុងលិខិតនោះបញ្ជាក់ថា លោកស្រីមានគម្រោងជួបអ្នកស្រី ទេព វន្នី អ្នកស្រី ផាន់ ឈុនរ៉េត អ្នកស្រី តង់ ចន្ថា កញ្ញា សុង ស្រីលាភ អ្នកស្រី បូ ឆវី អ្នកស្រី ង៉ែត ឃុន អ្នកស្រី នង ស្រេង អ្នកស្រី អ៊ឹម ស្រីទូច អ្នកស្រី ភួង សុភាព និងអ្នកស្រី ភួង ពេជ្រ នៅមណ្ឌលអប់រំកែប្រែទី២ (ម២) នៅវេលាម៉ោង២:៣០ នាទីរសៀល ។ ដោយឡែកនៅម៉ោង៣:៣០នាទី លោកស្រី មានគម្រោងជួបជាមួយសកម្មជនគណបក្សសង្គ្រោះជាតិលោក មាជ សុវណ្ណារ៉ា លោក ស៊ុំ ពុទ្ធី លោក ទេព ណារិន និងលោក អ៊ុក ពេជ្រសំណាង ព្រមទាំងព្រះសង្ឃ៣អង្គ ព្រះនាម សឺន ហាយ ឃិន វណ្ណៈ និង សាង កុសល នៅមណ្ឌលអប់រំកែប្រែទី១ (ម១) ។
នៅថ្ងៃទី១៧ ខែធ្នូនេះ ក្រុមគ្រូពេទ្យរបស់អង្គការលីកាដូដែលបានចូលទៅពិនិត្យស្ថានភាពសុខភាពស្ត្រីជាប់ឃុំទាំងនោះ បានឲ្យដឹងថា ស្រ្តីសកម្មជនដីធ្លី២នាក់គឺ កញ្ញា អ៊ីម ស្រីទូច និងអ្នកស្រីភួង សុភាព កំពុងប្រឈមនឹងគ្រោះថ្នាក់ធ្ងន់ធ្ងរដល់សុខភាព បន្ទាប់ពីពួកគេធ្វើកូដកម្មបង្អត់អាហារនៅពន្ធនាគារព្រៃសអស់ជាច្រើនថ្ងៃ ដើម្បីទាមទារឲ្យដោះលែងពួកគេឲ្យមានសេរីភាពវិញ ។ ចំណែកអ្នកស្រី ផាន់ ឈុនរ៉េត ដែលមិនចូលរួមបង្អត់អាហារ ក៏មានបញ្ហាសុខភាពធ្ងន់ធ្ងរដែរ ដោយចង្វាក់បេះដូងគាត់ចុះខ្សោយមកដល់កម្រិត២១ ។
គួរបញ្ជាក់ដែរថា កាលពីថ្ងៃទី២០ ខែវិច្ឆិកា កន្លងទៅលោកស្រី មូរ សុខហួរ និងស្ត្រីតំណាងរាស្ត្រគណបក្សសង្គ្រោះជាតិនាក់៥ផ្សេងទៀតបានចូលទៅសួរសុខទុក្ខអ្នកជាប់ឃុំឃាំងនៅពន្ធនាគារព្រៃសម្ដងហើយ ។
កាលពីព្រឹកថ្ងៃទី១០ ខែវិច្ឆិកា ស្ត្រីសកម្មជនដីធ្លី៧នាក់នៅសហគមន៍បឹងកក់ត្រូវបានចាប់ខ្លួន ខណៈដែលពួកគេតវ៉ា និងព្យាយាមបិទផ្លូវនៅមុខសាលារាជធានីភ្នំពេញ ដើម្បីទាមទារឲ្យមានអន្តរាគមន៍រំដោះទឹកស្អុយចេញពីភូមិ ។ ចំណែកឯស្ត្រី៣នាក់ និងព្រះសង្ឃ១អង្គផ្សេងទៀត ត្រូវបានសមត្ថកិច្ចចាប់ខ្លួននៅថ្ងៃបន្ទាប់ ខណៈដែលពួកគាត់តវ៉ានៅមុខសាលារាជធានីភ្នំពេញ ដើម្បីឲ្យមានការដោះលែងសកម្មជនដីធ្លី៧នាក់ខាងលើ ។ ស្ត្រីទាំង១០នាក់ និងព្រះសង្ឃ១ អង្គខាងលើ ត្រូវបានសាលាដំបូងរាជធានីភ្នំពេញបើកសវនាការកាត់ទោសភ្លាមៗនៅថ្ងៃ បន្ទាប់ពីការចាប់ខ្លួន និងបានផ្តន្ទាទោសឲ្យពួកគាត់ជាប់ពន្ធនាគារម្នាក់១ឆ្នាំ និងពិន័យជាប្រាក់ម្នាក់២លានរៀល ។
បន្ទាប់ពីមានការឃុំខ្លួន សកម្មជនដីធ្លី កូនៗអ្នករងគ្រោះ និងព្រះសង្ឃ បានសម្រេចទៅពន្ធនាគារព្រៃស រៀងរាល់ថ្ងៃអាទិត្យ ដើម្បីជំរុញឲ្យមានការដោះលែងអ្នកទាំងនោះឲ្យមានសេរីភាពឡើងវិញ ៕
សូមសរសេរមកកាន់លោក ទូច សុខា តាមរយៈ sokha@vodhotnews.com
សូមលោក យមរាជ កត់ឈ្មោះ ទេវទត្ត ភ្នែកទោល ចូលក្នុងបញ្ជីខ្មៅ ផងព្រោះវាសាងបាបច្រើនណាស់…!
អ្នកត្រូវគេរំលោភសិទ្ធិ ពិបាករស់នៅ ដោយបូមខ្សាច់ ពន្លិចផ្ទះ ពេលភ្លៀងលិចផ្ទះ រស់ក្នុងទឹកស្អុយ ដល់គ្នាតវ៉ា ចាប់ដាក់គុក…!
នេះឬ យុត្តិធ៍មសង្គមរបស់អាទេវទត្ត?