Fri, 2 January 2015
ប៉ាន់ រិទ្ធា
ភ្នំពេញប៉ុស្តិ៍
ភ្នំពេញៈ ដំណើរធម្មយាត្រាទស្សនាដែនដីពុទ្ធភូមិរយៈពេលមួយខែរបស់ព្រះសង្ឃ និងពុទ្ធបរិស័ទខ្មែរ មានចំនួនសរុប៣៨៤រូប ក្រោមដំណើរចូលរួម ដោយលោកគ្រូ អគ្គបណ្ឌិតធម្មាចារ្យ ប៊ុត សាវង្ស និងមគ្គុទ្ទេសក៍ដោយព្រះតេជគុណ ឈាង ឆយ និងក្រុមការងារ បានមកដល់មាតុប្រទេសវិញហើយ កាលពីខែមុននេះ។
ធម្មយាត្រានេះមានព្រះសង្ឃ៨២អង្គ ឧបាសិកា២៤២រូប ឧបាសក ៦០រូប។ ឧបាសកឧបាសិកាវ័យចំណាស់មាន៧៥ភាគរយ និងវ័យក្មេងមាន២៥ភាគរយមកពីគ្រប់ទិសទីនៃប្រទេសកម្ពុជា។ ធម្មយាត្រាបានចាប់ផ្តើមចេញដំណើរពីប្រទេសកម្ពុជាតាំងពីថ្ងៃទី៨ ខែវិច្ឆិកាឆ្នាំ២០១៤ មកម្ល៉េះ ដោយបន្តការដង្ហែក្បួនធម្មយាត្រានៅប្រទេសឥណ្ឌា និងនេប៉ាល់ដល់ថ្ងៃទី០៣ ខែធ្នូឆ្នាំ២០១៤ ហើយរាល់ការចំណាយនានាជាការប្រើកញ្ចប់ថវិកាផ្ទាល់ខ្លួន។
ដំណើរធម្មយាត្រានេះមានគោលដៅសំខាន់ដើម្បីសិក្សាឈ្វេងយល់ពីដែនដីពុទ្ធភូមិក្នុងការបង្កើនសទ្ធាជ្រះថ្លា និងការប្រតិបត្តិកាន់តែរឹងមាំថែមទៀតផ្នែកពុទ្ធចក្រ ផ្សព្វផ្សាយប្រពៃណីវប្បធម៌ ដល់អន្តរជាតិ ចូលរួមកសាងវត្តខ្មែរនៅឥណ្ឌា ទ្រទ្រង់ឧបត្ថម្ភសាមណនិស្សិតខ្មែរ ដែលកំពុងសិក្សានៅឥណ្ឌា ចម្រើនបុណ្យកុសលសេចក្តីសុខស្ងប់ក្នុងផ្លូវចិត្ត។
ព្រះមហា ហាក់ សៀងហៃ នាយកអង្គការព្រះពុទ្ធសាសនាដើម្បីការអប់រំកម្ពុជានៅខេត្តបាត់ដំបង និងជាសមាជិកក្រុមអ្នករៀបចំនៃដំណើរធម្មយាត្រា បានមានសង្ឃដីកាថា៖ «នេះគឺជាការជ្រះថ្លាថ្វាយបង្គំនូវសំវេជនីយដ្ឋានទាំងបួនកន្លែងធំៗ រួមមានកន្លែងព្រះអង្គទ្រង់ប្រសូតនៅលុម្ពិនីប្រទេសនេប៉ាល់ កន្លែងព្រះអង្គត្រាស់ដឹង សម្តែងធម្មចក្រ និងកន្លែងព្រះអង្គទ្រង់ចូលបរិនិព្វាននៅឥណ្ឌា។ ក្រៅពីនេះយើងក៏មានដំណើរធម្មយាត្រាទៅកន្លែងព្រះគន្ធកុដិ ដែលព្រះអង្គទ្រង់គង់នៅវត្តជេតពន និងកន្លែងជាទីគួររីករាយជ្រះថ្លាច្រើនទៀតនៃដែនដីពុទ្ធភូមិក្នុងប្រទេសឥណ្ឌា និងនេប៉ាល់»។
ដំណើរធម្មយាត្រានេះមិនត្រឹមតែបានទៅទស្សនាតំបន់ពុទ្ធភូមិនៅឥណ្ឌាប៉ុណ្ណោះទេ ថែមទាំងបានទៅសួរសុខទុក្ខដល់ព្រះសង្ឃខ្មែរ ដែលគង់នៅវត្តអារាមខ្មែរមាននៅក្នុងប្រទេសឥណ្ឌានិងនេប៉ាល់ចំនួន១១វត្តផងដែរ។ វត្តខ្មែរនៅឥណ្ឌាទាំងនោះរួមមាន វត្តខ្មែរសាវត្ថី វត្តខ្មែរញូវដែលី វត្តខ្មែរពុទ្ធគយាវត្តខ្មែរពារាណសី វត្តខ្មែរកុសិនារា វត្តខ្មែរវេសាលី វត្តខ្មែរសង្កស្ស: វត្តខ្មែររាជគ្រឹះ វត្តខ្មែរសុវណ្ណភូមិ វត្តខ្មែរកោសម្ពី និង វត្តខ្មែរលុម្ពិនី នៅនេប៉ាល់។
ព្រះមហា ហាក់ សៀងហៃ ក្នុងចំណោមវត្តខ្មែរចំនួន១១វត្ត ដែលបានសង់នៅប្រទេសឥណ្ឌា និងនេប៉ាល់ វត្តដែលត្រូវបានកសាងដំបូងគេគឺវត្តខ្មែរសាវត្ថីសង់នៅឆ្នំា១៩៨២។ វត្តនីមួយៗក៏មានព្រះសង្ឃខ្មែរគង់នៅដែរ ដោយវត្តខ្លះមានចំនួន១០អង្គ វត្តខ្លះមានបួនប្រាំអង្គ និងវត្តខ្លះមួយឬពីរអង្គ។
ព្រះតេជគុណមានសង្ឃដីកាបន្តថា៖ «ព្រះសង្ឃភាគច្រើនជាសមណៈមករៀនសូត្រនៅប្រទេសឥណ្ឌា ខណៈអង្គខ្លះគង់នៅវត្តខ្មែរ និងខ្លះគង់នៅឯនិវេសនដ្ឋានតាមសាកលវិទ្យាល័យនានា»។
សមាជិកក្រុមអ្នករៀបចំនៃដំណើរធម្មយាត្រា អង្គនេះបានឲ្យដឹងទៀតថា៖ «ពុទ្ធបរិស័ទខ្មែរនៃក្បូនធម្មយាត្រានេះក៏បានរួមគ្នាចែករំលែកបច្ច័យដើម្បីយកទៅប្រគេនព្រះសង្ឃ ដែលគង់នៅវត្តខ្មែរក្នុងប្រទេសឥណ្ឌាមួយចំនួនផងដែរ»៕