ដោយ៖ ជន ស្រីណុច
ថ្ងៃសៅរ៍ ទី3 មករា 2015
http://vodhotnews.com
អភិបាលស្រុកកែវសីមា ខេត្តមណ្ឌលគិរី នៅព្រឹកថ្ងៃសៅរ៍នេះ ដឹកនាំសមត្ថកិច្ចចម្រុះរាប់សិបនាក់ទៅដណ្តើមយកគ្រឿងចក្រ និងរថយន្តរបស់ក្រុមហ៊ុនប៊ិញភឿក១ ដែលប្រជាសហគមន៍ជនជាតិដើមភាគតិចព្នង ឃាត់ទុកអស់ជាច្រើនថ្ងៃ ។
កាលពីថ្ងៃទី២៩ ខែធ្នូឆ្នាំ២០១៤ ប្រជាសហគមន៍ជនជាតិដើមភាគតិចព្នង នៅក្នុងភូមិចក់ចារ ឃុំស្រែឈូក ស្រុកកែវសីមា ខេត្តមណ្ឌលគិរី និងកំពុងមានទំនាស់ជាមួយក្រុមហ៊ុនវៀតណាមប៊ិញភឿក១ បានឃាត់ទុកគ្រឿងចក្រ១គ្រឿង និងរថយន្តមួយបាំងកន្លះរបស់ក្រុមហ៊ុនវៀតណាម ដោយចោទថាបានឈូសឆាយដីរបស់ពួកគេ ។
ពលរដ្ឋម្នាក់លោក យ៉ាន ម៉ៅ ឲ្យ VOD ដឹងនៅរសៀលថ្ងៃសៅរ៍ទី០៣ ខែមករា២០១៥នេះថា នៅព្រឹកមិញនេះ អភិបាលស្រុកកែវសីមាលោក ស៊ិន វ៉ាន់វុធ បានដឹកនាំកម្លាំងចម្រុះ១៧រថយន្ត មកតតាំងជាមួយប្រជាពលរដ្ឋ ដើម្បីដណ្ដើមយកគ្រឿងចក្ររបស់ក្រុមហ៊ុនវៀតណាម ដែលប្រជាពលរដ្ឋចាប់ឃាត់ទុក ក្រោយពេលពួកគេឈួសបំផ្លាញផ្ទះ និងដីចម្ការវិលជុំរបស់ពួកគេ។ លោកបន្តថា អភិបាលស្រុកកែវសីមា បានគំរាមកំហែងប្រជាពលរដ្ឋថា អ្នកណាហ៊ានចេញមុខតវ៉ា លោកនឹងបញ្ជាឲ្យចាប់ដាក់ខ្នោះទាំងអស់ ហើយបានដឹកនាំយកគ្រឿងចក្រដែលពលរដ្ឋឃាត់ទុកនោះទៅបាត់ ។
លោក យ៉ាន ម៉ៅ បន្តទៀតថា បើទោះបីជាមានការគំរាមកំហែងបែបនេះក្តីក៏ពលរដ្ឋមិនចុះចាញ់ដែរ ហើយថាព្រឹកស្អែកពួកគេនឹងសង់ផ្ទះ សាលាឆទាន នៅលើដីមានទំនាស់ ដោយមិនខ្លាចញញើតសមត្ថកិច្ចឬក្រុមហ៊ុនទេ ព្រោះជីវិតពួកគេបូជាជាមួយដីដែលក្រុមហ៊ុនកំពុងរំលោភបំពានយកនោះ ។
អភិបាលស្រុកកែវសីម៉ា លោក ស៊ិន វ៉ាន់វុធ មានប្រសាសន៍ថា លោកពិតជាដឹកនាំសមត្ថកិច្ចទៅយកគ្រឿងចក្រមែន ព្រោះគ្រឿងចក្រនោះជារបស់ក្រុមហ៊ុន ដែលពលរដ្ឋគ្មានសិទ្ធិឃាត់ទុកទេ ។ លោកបន្តថា ក្រុមធ្វើការឈួសលើដីរបស់រដ្ឋសម្បទានឲ្យ ដែលមិនមែនជាដីរបស់ប្រជាជនជាតិដើមភាគតិចនោះទេ ។
កាលពីថ្ងៃទី១៦ ខែធ្នូ ក្រុមហ៊ុនវៀតណាមប៊ិញភឿក១ បានយកគ្រឿងចក្រទៅឈូសឆាយរំលោភយកដីជនជាតិដើមភាគតិចព្នងចំនួន២១១ គ្រួសារ ដោយបានកម្ទេចចម្ការដំណាំរបស់ពួកគេដូចជា ចេក ខ្នុរ ស្វាយ អំពៅ ជាដើមអស់ជាច្រើនហិកតា ដោយមិនមានការអន្តរាគមន៍ពីអាជ្ញាធរ ។
តាមព័ត៌មានឲ្យដឹងថា ក្រុមហ៊ុនវៀតណាមប៊ិញភឿក១ បានទទួលដីសម្បទានពីរដ្ឋាភិបាលដើម្បីអភិវឌ្ឍន៍នៅស្រុកកែវសីមាទំហំ ៥១០០ហិកតា ហើយដីដែលប៉ះពាល់ជាមួយប្រជាពលរដ្ឋមានទំហំ៥០០ហិកតា ក្នុងនោះដី៣៧៥ហិកតា បានប្រគល់ជូនប្រជាពលរដ្ឋវិញហើយ ៕
សូមសរសេរមកកញ្ញា ជន ស្រីណុច តាមរយៈ chornsreynoch@vodhotnews.com