Thu, 29 January 2015
សែន ដាវីត
ភ្នំពេញប៉ុស្តិ៍
ភ្នំពេញៈ ក្រសួងព័ត៌មានបានចេញលិខិតពីរជូនដំណឹងទៅប្រធានមន្ទីរពេទ្យឯកជនអន្តរជាតិ វ៉ិចតូរៀ និងម្ចាស់ប្រព័ន្ធផ្សព្វផ្សាយនានា ក្នុងប្រទេសកម្ពុជាឲ្យបញ្ឈប់ការផ្សាយពាណិជ្ជកម្មពីសេវាកម្ម និងបច្ចេកវិជ្ជាវះកាត់និងដេរព្រហ្មចារីស្ត្រីជាបន្ទាន់ ដោយសារថា ទង្វើនេះធ្វើឲ្យប៉ះពាល់ខ្លាំងដល់សីលធម៌ ប្រពៃណី និងកិត្តិយសអ្នកជំងឺផ្សេងទៀត។
យោងលិខិតរបស់ក្រសួងព័ត៌មាន ចុះហត្ថលេខាដោយលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន ដែលភ្នំពេញប៉ុស្តិ៍ ទទួលបានកាលពីម្សិលមិញឲ្យដឹងថា មន្ទីរពេទ្យ វ៉ិចតូរៀ បានធ្វើការផ្សព្វផ្សាយពាណិជ្ជកម្មពីសេវាកម្មនានាមានបច្ចេកទេសវិជ្ជាវះកាត់ដេរព្រហ្មចារី និងកែរូបរាងប្រដាប់ភេទស្រ្តី តាមប្រព័ន្ធផ្សព្វផ្សាយ វិទ្យុ ទូរទស្សន៍ កាសែត ដោយមានការអត្ថាធិប្បាយពន្យល់ហួសហេតុពេក ដែលនាំឲ្យប៉ះពាល់ដល់សីលធម៌និងប្រពៃណីដ៏ល្អផូរផង់របស់សង្គមកម្ពុជា ដែលមានជាយូរយារណាស់មកហើយ ទន្ទឹមនឹងនោះក៏នាំឲ្យប៉ះពាល់ដល់កិត្តិយសអ្នកជំងឺដទៃទៀត ដែលមករកសេវាផ្សេងទៀតក្នុងមន្ទីរពេទ្យឯកជន វ៉ិចតូរៀ នេះផងដែរ។
លោក ខៀវ កាញារីទ្ធ លើកឡើងនៅក្នុងលិខិតនោះថា៖ «ដើម្បីចៀសវាងផលអវិជ្ជមាន អំពីការផ្សាយពាណិជ្ជកម្ម អត្ថាធិប្បាយបកស្រាយពន្យល់អតិថិជន ពីការវះកាត់ព្រហ្មចារីធ្វើឲ្យប៉ះពាល់អារម្មណ៍របស់ប្រជាជនទូទៅ ដូចនេះម្ចាស់ប្រព័ន្ធផ្សព្វផ្សាយទាំងអស់ត្រូវបញ្ឈប់ការផ្សាយពាណិជ្ជកម្មនេះជាបន្ទាន់»។
ស្រ្តីម្នាក់សុំមិនឲ្យបញ្ចេញឈ្មោះដែលរស់នៅក្នុងរាជធានីភ្នំពេញលើកឡើងថា ការផ្សព្វផ្សាយពាណិជ្ជកម្មអំពីសេវាកម្ម បច្ចេកវិជ្ជាវះកាត់ដេរសន្ទះព្រហ្មចារី ធ្វើឲ្យប៉ះពាល់ដល់ស្រ្តីខ្មែរ ព្រោះការបើកចំហតាមប្រព័ន្ធផ្សព្វផ្សាយពេកធ្វើឲ្យស្រ្តីមួយចំនួនស្តាប់និងទស្សនាអៀនខ្មាសឡើងរឹងខ្លួន ហើយធ្វើឲ្យស្រ្តីមួយចំនួនទៀតបង្កើនការរូមភេទ ព្រោះបច្ចុប្បន្នមានសេវាកម្មដេរសន្ទះព្រហ្មចារីស្រ្តីឲ្យដូចដើមឡើងវិញបែបនេះ។
ស្រ្តីរូបនោះលើកឡើងទៀតថា៖ «ខ្ញុំស្តាប់និងមើលឡើងអៀនខ្លួន អំពីការវះកាត់ដេរសន្ទះព្រហ្មចារីនេះ ហើយធ្វើឲ្យស្រ្តីមួយចំនួនបង្កើនការរួមភេទនិងមិនសោកស្តាយព្រហ្មចារីរបស់ខ្លួនដែលបាត់បង់ឡើយ ព្រោះសំអាងមានមន្ទីរពេទ្យនៅស្រុកខ្មែរអាចវះកាត់និងដេរសន្ទះព្រហ្មចារី ឲ្យល្អដូចដើមវិញ»។
ចំណែកប្រធានបណ្តាញស្រ្តីកម្ពុជា លោកស្រី វង្ស សម្ផស្ស បានលើកឡើងដែរថា យើងមិនអាចថា តើស្រ្តីប្រភេទណាចូលចិត្តឬមិនចូលចិត្តរកសេវាកម្មបែបហ្នឹងនោះទេ ព្រោះជាសិទ្ធិរបស់ពួកគេៗ គ្រាន់តែកុំឲ្យមានការផ្សព្វផ្សាយជាសាធារណៈពេក នោះជាការល្អ។
មិនអាចសុំការអត្ថាធិប្បាយពន្យល់ពីមន្ទីរពេទ្យ វ៉ិចតូរៀ បាននៅឡើយ កាលពីម្សិលមិញ ដោយសារតែខ្សែទូរស័ព្ទប្រចាំការិយាល័យរោទ៍ឡើង តែមិនមានអ្នកទទួល៕