Mon, 2 March 2015
ផាក់ ស៊ាងលី
ភ្នំពេញប៉ុស្តិ៍
រតនគិរីៈ នគរបាលកម្ពុជានិងវៀតណាម ប្រមាណ ៣០ នាក់បានសហការគ្នាចាប់បញ្ជូនជនម៉ុងតាញ៉ាវៀតណាម ទាំង ៣៦នាក់ ទៅវៀតណាមវិញ ដោយប្រើប្រាស់កម្លាំងបង្កប់ រីឯជនជាតិដើមដែលជួយក្រុមនោះម្នាក់បាននិងកំពុងបាត់ខ្លួនចំនួន ៥ថ្ងៃ មកហើយ។
ដោយសារការលាក់ខ្លួនក្នុងព្រៃនៅ ស្រុកអូរយ៉ាដាវ និងលំផាត់ គ្មានសុវត្ថិភាព ក្រុមជនម៉ុងតាញ៉ាភៀសមកពីវៀតណាម ៣៦នាក់ ក្នុងចំណោម ៥០ នាក់បានជួលរថយន្តសាំយ៉ុងពីរគ្រឿងជិះ សំដៅមកភ្នំពេញ កាលពីម៉ោង ១២យប់ ថ្ងៃ ទី២៤ ខែកុម្ភៈ ដើម្បីសុំអន្តរាគមន៍ពីតំណាងអង្គការសហប្រជាជាតិ ដោយមានអ្នកភូមិជនជាតិដើមចារ៉ាយ ឈ្មោះ ឌី ហ៊ឺន (ក្លាន ហ៊ឺន) អាយុ ៤២ឆ្នាំ ជាអ្នកជួយប្រាប់ផ្លូវ។ ប៉ុន្តែគ្រាន់តែចេញផុតពី ស្រុកអូរយ៉ាដាវ ចូលក្នុង ស្រុកកូនមុំ ក៏ត្រូវកម្លាំងនគរបាលវៀតណាម និងកម្ពុជាចាប់ខ្លួននៅលើភ្នំកូនមុំ ក្នុង ភូមិ៤ ឃុំត្រពាំងច្រែះ រួចដឹកទៅ ខេត្តរតនគិរី មុននឹងបញ្ជូនទៅប្រទេសវៀតណាម នៅម៉ោងប្រមាណជា ៣ ទៀបភ្លឺ កាលពីថ្ងៃព្រហស្បតិ៍អាទិត្យមុន។ នេះបើតាមមន្ត្រីនគរបាល ស្រុកកូនមុំ និងការស៊ើបអង្កេតរបស់អង្គការអាដហុកខេត្ត។
មន្ត្រីនគរបាលស្រុកកូនមុំ ដែលចូលរួមប្រតិបត្តិការនេះកាលពីយប់ថ្ងៃពុធបានឲ្យដឹងថា ស្នងការខេត្តបានបញ្ជាឲ្យនគរបាលស្រុកត្រៀមកម្លាំងប្រដាប់អាវុធ ប៉ុន្តែអត់ប្រាប់ថា មានរឿងអីកើតឡើងទេ។ ក្រោយមកក៏មាននគរបាលខេត្តចុះមកជាមួយនឹងប៉ូលិស វៀតណាម ៤ នាក់ស្លៀកពាក់ស៊ីវិល មានទាំងប្រធានវរៈព្រំដែនផងសរុបទាំងអស់ប្រមាណជា ៣០ នាក់ឲ្យរកកន្លែងស្ងាត់ ដើម្បីកុំឲ្យបែកការឬភ្ញាក់ផ្អើលដល់អ្នកភូមិ។
មន្ត្រីរូបនេះបញ្ជាក់ថា៖ «គ្រាន់តែពួកវៀតណាមម៉ុងតាញ៉ា ជាង ៣០នាក់ (ស្ត្រី ៣ នាក់) មកដល់គេព័ទ្ធឡានជាប់។ បើកទ្វារឲ្យលើកដៃឡើងលើ រុញចូលឡានពីរទៀត។ ពួកវៀតណាមធ្វើឡិងឡង់ៗ ទឹកមុខស្ងួតគ្រប់គ្នា»។ លោក បន្តថា ទាំងប៉ូលិសខ្មែរនិងវៀតណាមសុទ្ធតែមានកម្លាំងបង្កប់ទាំងអស់ រួមទាំងឡានសាំងយ៉ុងទាំងពីរនោះទៀត។
នគរបាលម្នាក់នេះប្រាប់ទៀតថា៖ «ពួកខ្ញុំស្រុកចាំបិទគូទ។ មិនដឹងរឿងគេចាប់ម៉ុងតាញ៉ានេះទេ។ វាសំខាន់ ទើបខាងវៀតណាមគេតាមពីប្រទេសគេមកធ្វើជាមួយខ្មែរយើង។ មានភ្នាក់ងារគេ។ បើអត់មានម៉េចចាប់បាន? ភ្នាក់ងារខ្មែរយើងក៏មានដែរ។ អ៊ីចឹងទើបបែកការ។ មានកម្លាំងរៀបចំស្រេច។
ឡានសាំយ៉ុង សុទ្ធតែកម្លាំងសមត្ថកិច្ចទាំងអស់»។ ទោះយ៉ាងណា មន្ត្រីនគរបាលរូបនេះមិនបានឲ្យដឹងពីអ្នកជួយពួកគេ គឺលោក ឌី ហ៊ឺន ថា ឲ្យ ទៅណាទេ។
គ្រួសារលោក ឌី ហ៊ឺន បានដាក់ពាក្យប្តឹងទៅអង្គការសិទ្ធិមនុស្សអាដហុក ហើយកំពុងតែនាំគ្នាស្វែងរកគាត់ រួមទាំងទូរស័ព្ទទៅសួរជនជាតិចារ៉ាយដូចគ្នានៅប្រទេសវៀតណាមផង។
អ្នកស្រី សំ កញ៉ា អាយុ ៣៥ឆ្នាំ ប្រពន្ធលោក ឌី ហ៊ឺន បានប្រាប់ ភ្នំពេញ ប៉ុស្តិ៍ ពេលកំពុងតែមកប្តឹងសុំអន្តរាគមន៍រកប្តីគាត់បានចេញពីផ្ទះក្នុង ស្រុកអូរយ៉ាដាវ តាំងតែពីម៉ោង ១ រសៀល ថ្ងៃពុធសប្តាហ៍មុន ហើយបានបាត់ដំណឹងរហូតមក។
អ្នកស្រីប្រាប់ថា៖ «គាត់ថា មានការចេញទៅក្រៅ តែបានបាត់រហូត មិនដឹងទៅរកឯណាទេ។ ប្អូនថ្លៃបានទូរស័ព្ទទៅសួរអ្នកត្រូវចាប់បញ្ជូនទៅវៀតណាមវិញ។ មិនដឹងយ៉ាងម៉េចទេ»។ លោក ឌី ហ៊ឺន មានកូនស្រីពីរនាក់ម្នាក់អាយុ ៨ឆ្នាំ និងម្នាក់អាយុ ៤ឆ្នាំ។
អ្នកសម្របសម្រួលអង្គការអាដហុក លោក ឆាយ ធី បានឲ្យដឹងថា លោក ឌី ហ៊ឺន ត្រូវនគរបាលកម្ពុជាចាប់ដាក់ឡានមួយផ្សេងមិនបានបញ្ជូនទៅវៀតណាមជាមួយនឹងម៉ុងតាញ៉ានោះទេ។ អាដហុកកំពុងអង្កេតករណីនេះ ហើយរាយការណ៍ប្រាប់តំណាងអង្គការសហប្រជាជាតិពីការបាត់ខ្លួននេះហើយ។
លោកឲ្យដឹងដែរថា អ្នកភូមិជនជាតិដើមទូរស័ព្ទទៅវៀតណាម ហើយជួបអ្នកត្រូវគេចាប់បញ្ជូនទៅ ២ នាក់ក្នុងចំណោម ៣៦ នាក់គេប្រាប់ថា ពួកគេគ្រាន់តែត្រូវអាជ្ញាធរវៀតណាមទះកំផ្លៀងបន្តិចបន្តួចប៉ុណ្ណោះ មុនឲ្យទៅផ្ទះវិញ។ ប៉ុន្តែមេខ្លោងដែលនាំរត់មកកម្ពុជា ត្រូវគេវ៉ៃជាំភ្នែកនិងបាក់ធ្មេញហើយចាប់ទៅដាក់គុកថែមទៀត។
ភ្នំពេញ ប៉ុស្តិ៍ មិនអាចទាក់ទងលោក ជា ប៊ុនធឿន ស្នងការរងទទួលបន្ទុកអន្តោប្រវេសន៍ និងលោក ងួន គឿន ជាស្នងការខេត្តបានទេ ខណៈ លោក ម៉ឹង ស៊ីនាថ អ្នកនាំពាក្យសាលា ខេត្តរតនគិរី និងលោក កែម សារិន ប្រធាននាយកដ្ឋានជនអន្តោប្រវេសន៍ក្រសួងមហាផ្ទៃ បានអះអាងថា នៅមិនទាន់បានដឹងពីករណីនេះនៅឡើយ។ ឯលោក ខៀវ សុភ័គ អ្នកនាំពាក្យក្រសួងមហាផ្ទៃ និងលោក គៀត ច័ន្ទថារិទ្ធិ អ្នកនាំពាក្យអគ្គស្នងការនគរបាលជាតិក៏មិនអាចទាក់ទងសុំការបំភ្លឺបានដែរ។
លោកស្រី វ៉ាន់ ហ៊ាលី តំណាងការិយាល័យឧត្តមស្នងការសិទ្ធិមនុស្សអង្គការសហប្រជាជាតិនៅកម្ពុជាបានឲ្យដឹងតាមសារអេឡិចត្រូនិកកាលពីម្សិលមិញថា លោកស្រីមិនទាន់បានដឹងពីការចាប់ខ្លួននេះនៅឡើយនៅពេលដឹងថា មានការចាប់បញ្ជូនទៅវិញ លោកស្រីក៏មិនអាចធ្វើការពិភាក្សាពីបញ្ហានេះ ជាមួយនឹងមន្ត្រីរដ្ឋាភិបាលបានដែរ កាលពីថ្ងៃសុក្រ។
បច្ចុប្បន្ននេះ មានម៉ុងតាញ៉ ចំនួន ១៣នាក់ ទៀតត្រូវគេរាយការណ៍ថា កំពុងលាក់ខ្លួននៅក្នុងព្រៃ ខេត្តរតនគិរី។ ក្រៅពីនោះ មានម្នាក់បានបែកគ្នា ពេលរត់គេចពីការធ្វើទុក្ខបុកម្នេញខាងផ្នែកសាសនាពីប្រទេសវៀតណាមមក។ ដោយគិតទាំង ៣៦នាក់ នោះផង មានជនម៉ុងតាញ៉ាជាង ៤០នាក់ ត្រូវបានចាប់បញ្ជូនទៅវៀតណាម ក្នុង ខែកុម្ភៈ កន្លងទៅនេះ៕
រាយការណ៍បន្ថែមៈ Alice Cuddy
The one were missing , I doubt maybe he already goes to see devil ! Why ? If no one will be responsible to this matter from top to bottom . No different between KHMER rouge regime to comparing nowadays under greedy CPP regime that need to eliminate all the action or movement what they thought it against to their plans as kicking ,jailing and shoot to killing no problems for any life are not following the CPP rules
that is the policy of million years friendship . one life or more is nothing for them if they said missing it mean he gone. just like in POL POT regime when they said going to learn more that mean they people gone from this world. what else or who else can this nation depending on if this evil are at large. no any bodies can top it down only praying one day this evil will be gone. peace for all