ដោយ៖ ឡាយ សាមាន
ថ្ងៃសៅរ៍ ទី28 កុម្ភៈ 2015
http://vodhotnews.com
ប្រជាពលរដ្ឋរងគ្រោះមកពីតាមបណ្តាខេត្ត និងអ្នករស់នៅក្នុងឃុំស្រែគរ ខេត្តស្ទឹងត្រែង នៅថ្ងៃសៅរ៍នេះបានធ្វើពិធីបែបសាសនា ដើម្បីដាក់បណ្តាសាដល់ក្រុមហ៊ុនចិនដែលសាងសង់ទំនប់វារីអគ្គិសនីសេសានក្រោម២ និងដើម្បីបន្ទន់ចិត្តដល់រដ្ឋាភិបាលឲ្យបញ្ឈប់គម្រោងសាងសង់នេះ។
ប្រជាពលរដ្ឋរងគ្រោះមកពីខេត្តរតនគិរី អ្នកភូមិក្បាលមាស និងអ្នកភូមិផ្សេងទៀតរស់នៅខេត្តស្ទឹងត្រែង ប្រមាណ២០០នាក់ នៅថ្ងៃសៅរ៍បាននាំគ្នាធ្វើពិធីដាក់បណ្តាសាដល់ក្រុមហ៊ុនចិនដែលទទួលការសាងសង់ទំនប់វារីអគ្គិសនីសេសានក្រោម២ ដោយពួកគេអះអាងថាគម្រោងនេះនឹងធ្វើឲ្យប៉ះពាល់ដល់ជីវភាពពួកគាត់។ ក្នុងពិធីនេះ ប្រជាពលរដ្ឋនាំគ្នាចងកន្សែងក្រហមរៀងៗខ្លួន និងធ្វើពិធីសែន ដោយមានទៀន ធូប អង្ករ និងក្បាលជ្រូកជាដើម។
មេឃុំស្រុកស្រែគរលោក សៀក មេគង្គ មានប្រសាសន៍ថាការធ្វើពិធីដាក់បណ្តាសានេះជាសិទ្ធិរបស់ប្រជាពលរដ្ឋ និងជាជំនឿមួយដែលពួកគេជឿថាអ្នកតាក្រហមកនឹងជួយពួកគេឲ្យរួចផុតពីគ្រោះថ្នាក់នានា និងដាក់បណ្តាសាដល់ក្រុមហ៊ុនផងដែរ។ លោកបន្តថាពលរដ្ឋមិនជំទាស់នឹងការអភិវឌ្ឍរបស់រដ្ឋាភិបាលនោះទេ តែលោកស្នើឲ្យរដ្ឋាភិបាលគួរឲ្យក្រុមហ៊ុនសិក្សាពីផលប៉ះពាល់ជាមុនសិន។
ប្រជាពលរដ្ឋរងគ្រោះនៅភូមិក្បាលរមាសលោក ដាំ សំណាង បង្ហាញការព្រួយបារម្ភថាគម្រោងនេះនឹងធ្វើឲ្យប៉ះពាល់ដល់ប្រជាពលរដ្ឋរាប់រយគ្រួសារ និងជីវភាពប្រចាំថ្ងៃរបស់ពួកគាត់ ដោយសារប្រជាពលរដ្ឋរស់នៅទីនោះអាស្រ័យលើការនេសាទ យកជ័រឈើ ជាពិសេសប៉ះពាល់ដល់ផ្នូរដូនតារបស់ជនជាតិភាគតិចផងដែរ។ លោកស្នើដល់រដ្ឋាភិបាលបញ្ជារទៅក្រុមហ៊ុនចិន ឲ្យបញ្ឈប់ការសាងសង់ទំនប់សេសានក្រោម ២នេះ។
ប្រជាពលរដ្ឋអះអាងថាទោះបីពួកគេធ្លាប់ដាក់ញត្តិអន្តរាគមន៍ទៅរដ្ឋសភា និងស្វែងរកកិច្ចអន្តរាគមន៍ពីសំណាក់រដ្ឋាភិបាលច្រើនលើកក៏ដោយ តែក្រុមហ៊ុននៅតែបន្តសកម្មភាពគម្រោងនេះបានប្រមាណ២០ភាគរយហើយ និងមិនឲ្យប្រជាពលរដ្ឋចូលទៅតំបន់នោះឡើយ។
កន្លងទៅ អនុរដ្ឋលេខាធិការក្រសួងបរិស្ថានលោក ទា ជុប ធ្លាប់ប្រាប់ថាគម្រោងអភិវឌ្ឍន៍វារីអគ្គិសនីសេសានក្រោម២នេះត្រូវធ្វើយ៉ាងណាឲ្យប្រជាជនដែលប៉ះពាល់ទទួលបានផល និងសំណងបន្ថែម។ លោកបន្តថាក្រសួងបរិស្ថានបានពិភាក្សាជាមួយក្រុមហ៊ុនវិនិយោគរួចរាល់ហើយ និងត្រូវធ្វើយ៉ាងណារកវិធីដំណោះស្រាយ និងសិក្សាពីផល់ប៉ះពាល់ផងដែរ។ លោកបញ្ជាក់ថា«យើងបានធ្វើលិខិតមួយចំនួនទៅក្រុមហ៊ុននោះ ដើម្បឲ្យគាត់ធ្វើកិច្ចសន្យាជាមួយក្រសួងបរិស្ថានត្រូវតែទទួលខុសត្រូវលើរបាយការណ៍វាយតម្លៃ ហើយប៉ះពាល់បរិស្ថានដែលក្រសួងបរិស្ថានដែលឯកភាពមុនមកហើយនេះ ហើយដែលក្នុងរបាយការណ៍នេះមានចែងផលប៉ះពាល់គ្រប់ចំណុចទាំងអស់ ដែលក្នុងនោះចែងអំពីផលប៉ះពាល់ការរើទីតាំងរបស់ប្រជាពលរដ្ឋដែលប៉ះពាល់ និងសំណងដែលមានចែងក្នុងហ្នឹងទាំងអស់»។
ទំនប់វារីអគ្គិសនីសេសានក្រោម២ គឺជាគម្រោងអភិវឌ្ឍន៍ធំជាងគេបង្អស់នៅកម្ពុជាដែលស្ថិតនៅតាមដង ទន្លេសេសាន នៅក្នុងខេត្តស្ទឹងត្រែង។ ទំនប់វារីអគ្គិសនីនេះ អាចផលិតថាមពលអគ្គិសនីបានចំនួន៤០០មេហ្គាវ៉ាត់ ដែលគ្រោងចំណាយថវិកាប្រមាណ៨០០លានដុល្លារ។ ទោះជាយ៉ាងណាគម្រោងនេះបានបង្កឲ្យមានការផ្លាស់ប្តូរទីលំនៅ ក៏ដូចជាជីវភាពរស់នៅរបស់ប្រជាជនប្រមាណ៥០០គ្រួសារ និងប៉ះពាល់ដោយប្រយោលរាប់ពាន់គ្រួសារ៕
សរសេរមកកាន់លោក ឡាយ សាមាន តាមរយៈsamean@vodhotnews.com
ពលរដ្ឋរងគ្រោះធ្វើពិធីដាក់បណ្តាសាក្រុមហ៊ុនចិនសាងសង់ទំនប់វារីអគ្គិសនីសេសានក្រោម២ ខេត្តស្ទឹងត្រែង (វីដេអូ)
ដោយ៖ ឧស្សាហ៍ | ថ្ងៃចន្ទ ទី2 មិនា 2015, 12:08 PM
http://vodhotnews.com