ដោយ៖ ណាត សុភាព
ថ្ងៃចន្ទ ទី2 មិនា 2015
http://vodhotnews.com
ស្តាប់សំឡេង៖ |
ចម្លងទុក |
ចៅអធិការវត្តសាមគ្គីរង្សីឲ្យដឹងព្រឹកថ្ងៃចន្ទនេះថា អ្នកធ្វើគុតព្រះតេជគុណមួយអង្គនៅវត្តនេះ កាលពីដើមខែមករាឆ្នាំ២០១៥ ទំនងជាចារកម្មរបស់វៀតណាម។
ការលើកឡើងនេះធ្វើឡើងបន្ទាប់ពីចៅក្រមស៊ើបសួរសាលាដំបូងរាជធានីភ្នំពេញលោក ហេង សុខណា បានចេញដីកាកោះហៅដើមបណ្តឹងរដ្ឋប្បវេណីព្រះអង្គ ថាច់ សុខុន និងសាក្សីព្រះអង្គ ថាច់ វណ្ណា ឲ្យចូលបំភ្លឺនៅសាលាដំបូងរាជធានីភ្នំពេញ ជុំវិញករណីធ្វើគុតព្រះតេជគុណ ថាច់ ខាន់ កាលពីដើមខែមករាឆ្នាំ២០១៥។
ចៅអធិការវត្តសាមគ្គីរង្សី ព្រះតេជគុណ ថាច់ ហាសំអាង មានថេរដីកានៅក្រៅបន្ទប់សវនាការសាលាដំបូងរាជធានីភ្នំពេញថា តុលាការមិនត្រូវអូសបន្លាយសវនាការ ក្នុងការរកយុត្តិធម៌ដល់ជនរងគ្រោះនោះទេ។ ព្រះអង្គស្នើទៅចៅក្រមស៊ើបសួរឲ្យធ្វើការស៊ើបអង្កេតឲ្យបានច្បាស់លាស់ជុំវិញឃាតកម្មនោះ ដោយលោកដាក់ការសង្ស័យថា ឃាតកម្មនោះអាចជាប់ពាក់ព័ន្ធនឹងចារកម្មវៀតណាម។ ព្រះតេជគុណមានថេរដីកាថា «ដែលអាត្មាសន្និដ្ឋាន ទីមួយវាអាចលោកនេនហ្នឹងជា ត្រូវបានយួនបញ្ជាមកជាចារកម្មយួន ពីព្រោះវត្តអាត្មាដឹងស្រាប់ហើយជាវត្តខ្មែរព្រះសង្ឃខ្មែរកម្ពុជាក្រោម មាននិន្នាការប្រឆាំងជាមួយនឹងការរំលោភបំពានសិទ្ធិមនុស្សនៅឯកម្ពុជាក្រោម។ ទីពីរអាត្មាអាចសន្និដ្ឋានបាន វាអាចជាបញ្ហានយោបាយនៅក្នុងប្រទេសកម្ពុជាផងដែរ ព្រោះវត្តអាត្មារដ្ឋាភិបាលកម្ពុជា អាជ្ញាធរដែនដីគេតែងតែចោទប្រកាន់ថា ព្រះសង្ឃវត្តអាត្មាចូលចិត្តតែប្រឆាំងជាមួយរដ្ឋាភិបាល គេចោទប្រកាន់អញ្ចឹង»។
VOD មិនអាចសុំការបំភ្លឺពីមន្ត្រីស្ថានទូតវៀតណាមនៅកម្ពុជា ជុំវិញការសង្ស័យនេះបានទេ នៅរសៀលថ្ងៃចន្ទនេះ។
អ្នកនាំពាក្យក្រសួងមហាផ្ទៃលោក ខៀវ សុភ័គ យល់ថា ការលើកឡើងរបស់ចៅអធិការវត្តសាមគ្គីរង្សីនោះថា ជាការភ័ន្តច្រឡំ ព្រោះសមត្ថកិច្ចធ្វើតាមច្បាប់ ដោយចាប់តែជនល្មើសទៅផ្តន្ទាទោសតែប៉ុណ្ណោះ។ លោកមានប្រសាសន៍ថា «យើងចង់និយាយតែភារកិច្ចរបស់យើង យើងមិនមែនទៅរកចារកម្ម ទៅរកអីដ៏ប៉ុណ្ណឹងទេ សំខាន់គឺត្រូវរកយុត្តធម៌ឲ្យជនរងគ្រោះ អ្នកណាដែលសម្លាប់ត្រូវឲ្យឃើញឃាតក មានសម្ថកិច្ចឯណាគេទៅរកចារកម្មវៀតណាមតាមព្រះតេជគុណមានពុទ្ធដីកាហ្នឹង ដឹងជារឿងស្អី ប្រហែលជាលោកភ័ន្តច្រឡំហើយមើលទៅ»។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា មានប្រសាសន៍ថា ការលើកឡើងរបស់ចៅអធិការវត្តសាមគ្គីរង្សី ប្រហែលជាព្រះអង្គមានភ័ស្តុតាងច្បាស់លាស់ ដោយសារព្រះអង្គគ្រប់គ្រងវត្តនោះផ្ទាល់ ដឹងពីស្ថានភាពនៅកន្លែងនោះ។ តែលោកបញ្ជាក់ថា ដើម្បីផ្តល់យុត្តិធម៌ដល់ជនរងគ្រោះ ចៅក្រមស៊ើបសួរត្រូវស៊ើបអង្កេតជនពាក់ព័ន្ធផ្សេងទៀត មុននឹងផ្តន្ទាទោសជនល្មើសនោះ។ លោកលើកឡើងថា «តុលាការត្រូវតែរកអំពីថាតើមានការរៀបចំទុកនៅពីក្រោយខ្នង ឬគ្រាន់តែជាជម្លោះបុគ្គលរវាងជនជាប់ចោទជាមួយព្រះសង្ឃដែលសុគត។ បើសិនជាមាននៅពីក្រោយខ្នង គេត្រូវតែទៅរកអ្នកដែលនៅពីក្រោយខ្នងទៀត ដើម្បីបង្ក្រាបឲ្យដល់មូលដ្ឋាននៃការបង្កើតឲ្យមានអំពើហិង្សា។ ទីមួយរកយុត្តិធម៌ដល់ជនរងគ្រោះ ទីពីរដើម្បីការពារអសន្តិសុខក្នុងសង្គមដែរ»។
សូមជម្រាបថា ព្រះតេជគុណ ថាច់ ខាន់ អតីតគ្រូសូត្រឆ្វេងវត្តសាមគ្គីរង្សី ត្រូវបានអតីតលោកសង្ឃមួយអង្គនៅក្នុងវត្តនេះដែរឈ្មោះ លី ទ្វឹង ធ្វើគុត ដោយចាក់នឹងកាំបិតចំបំពង់ក កាលពីថ្ងៃទី១២ មករា ឆ្នាំ២០១៥ បណ្តាលឲ្យសុគតនៅនឹងកន្លែងកើតហេតុ ហើយជនល្មើសត្រូវបានតុលាការចោទប្រកាន់ពីបទ ហិង្សាដោយចេតនា និងមានស្ថានទម្ងន់ទោស៕
សូមសរសេរមកលោក ណាត សុភាព តាមរយៈ sopheap@vodhotnews.com
វត្តសាមគ្គីរង្សី គឺវត្តរបស់ក្រុម ISIS. ព្រះសង្ឃខ្មែរ ពុំដែលមានអំពើហិង្សា ដូចជាការសម្លាប់,ធ្វើបាតុកម្ម, ធ្វើនយោបាយ, ល .. បែបនេះនោះទេ.
លោក ខៀវ សុភ័គ ចុះឃាតករចាប់បាន ហើយ ម្តេចក៏មិនអនុវត្តន៏តាមច្បាប់ទៅ ចាំបាច់អីនៅពន្យាពេល រកលេសនេះ លេស នោះ ចឹងហើយនៅនិយាយថាធ្វើតាមច្បាប់ ច្បាប់ម៉ែអាឯងការពារតែប្រយោជន៏បក្សពួក និងបរទេសតែប៉ុណ្ណឹង ពួកអាថោក