ដោយ៖ ជន ស្រីណុច
ថ្ងៃចន្ទ ទី2 មិនា 2015
http://vodhotnews.com
ស្តាប់សំឡេង៖ |
ចម្លងទុក |
ប្រជាសហគមន៍មានជម្លោះដីធ្លីរស់នៅតាមដងផ្លូវជាតិលេខ៦អា ក្នុងខណ្ឌជ្រោយចង្វា ជាង១០០នាក់ នៅថ្ងៃចន្ទនេះសុំអន្តរាគមន៍ជាលើកទី២ ទៅសាលារាជធានីភ្នំពេញ ជំរុញឲ្យក្រុមហ៊ុន OCIC ផ្តល់សំណងសមរម្យ ករណីយកដីលំនៅដ្ឋាន ដីស្រែចម្ការ របស់ពួកគេទៅអភិវឌ្ឍន៍ ។
យោងលិខិតតវ៉ាលើកទីពីរ របស់ប្រជាពលរដ្ឋចុះថ្ងៃទី០២ ខែមីនា ឆ្នាំ២០១៥ ឲ្យដឹងថា ប្រជាពលរដ្ឋដែលប៉ះពាល់ដីធ្លី ពីការអភិវឌ្ឍរបស់ក្រុមហ៊ុន OCIC នៅខណ្ឌជ្រោយចង្វានោះរួមមាន សង្កាត់ជ្រោយចង្វា ៤៧គ្រួសារ សង្កាត់ព្រែកលៀប ៩០គ្រួសារ និងសង្កាត់ព្រែកតាសេក ១៨គ្រួសារ ។
តំណាងសហគមន៍ជ្រោយចង្វាលោក ជា សុផាត មានប្រសាសន៍ថា នេះជាលើកទីពីរ ដែលប្រជាពលរដ្ឋសុំអន្តរាគមន៍ពីសាលាក្រុងចាប់តាំងពីក្រុមហ៊ុន OCIC ចូលទៅអភិវឌ្ឍន៍លើដីប្រជាពលរដ្ឋដោយមិនបានផ្តល់សំណងសមរម្យដល់ពួកគេ ។ លោកបន្តថាការដែលក្រុមហ៊ុន និងសាលាក្រុងមិនព្រមផ្តល់សំណងសមរម្យដល់ពលរដ្ឋម្ចាស់ដី គឺមានចេតនាមិនដោះស្រាយឲ្យពលរដ្ឋ ។ លោកថា «ខ្ញុំគិតថា ជាលក្ខណៈមួយអូសបន្លាយពេលវេលា ដើម្បីឲ្យយើងខ្ញុំចេះតែនៅអ៊ីចឹងទៅ ហើយចេះតែរងចាំពីមួយថ្ងៃទៅមួយថ្ងៃ ដែលថាការរង់ចាំដំណោះស្រាយនេះ មិនមែនជាការស្រួលទេ នាំឲ្យយើងខ្វល់ខ្វាយក្នុងចិត្ត រកស៊ីធ្វើការអីក៏មិនបាន អ្នកដែលបំពេញការងារជូនរដ្ឋ ក៏វេទនាក្នុងចិត្តដែរ» ។
តំណាងសហគមន៍នៅសង្កាត់ព្រែកលៀប អ្នកស្រី អ៊ិត ណាវី មានប្រសាសន៍ថា ចាប់តាំងពីក្រុមហ៊ុនចូលទៅអភិវឌ្ឍន៍នៅលើដីរបស់ប្រជាពលរដ្ឋនៅតំបន់នោះ នាំឲ្យប្រជាពលរដ្ឋជួបបញ្ហាជាច្រើន ជាពិសេសមិនបានចេញទៅប្រកបមុខអ្វីទេ ដោយបារម្ភខ្លាចក្រុមហ៊ុនបូមខ្សាច់ពន្លិចផ្ទះរបស់ពួកគេ ហើយមិនផ្ដល់សំណងសមរម្យ ។ អ្នកស្រីបញ្ជាក់ថា «ពួកខ្ញុំខាតបង់ច្រើន កាលណាក្រុមហ៊ុនបូមខ្សាច់ដាក់ ប្រជាជនខ្ញុំអត់បានធ្វើអីទាំងអស់ មានផលលំបាកដោយសារមានការផ្លាស់ប្តូរទីលំនៅ វាអត់សមស្រប ក្រុមហ៊ុន ឲ្យតម្លៃទាប ដែលពួកខ្ញុំទទួលយកអត់បាន ។ គាត់មើលមកនេះ ប្រហែលជាគាត់ថាប្រជាជនអត់មានសមត្ថភាពតវ៉ាទេ បានគាត់ឲ្យតម្លៃ១៥ដុល្លារ បើគាត់តម្លៃខ្ពស់ ឬសំណងសមរម្យ ពួកខ្ញុំអត់ថាអីទេ» ។
មន្ត្រីផ្នែកច្បាប់នៃអង្គការសិទ្ធិលំនៅដ្ឋាន លោក ណន អូនី ដែលតាមដានករណីនេះមានប្រសាសន៍ថា បញ្ហានេះបានអូសបន្លាយយូរមកហើយ ដែលបង្កឡើងដោយការអភិវឌ្ឍមិនបានគោរពសិទ្ធិរស់នៅរបស់ប្រជាជន ។ លោកថាក្រុមហ៊ុនមិនបានធ្វើតាមការព្រមព្រៀង ដែលថាផ្តល់សំណងសមរម្យទៅដល់ប្រជាពលរដ្ឋ ដែលជាម្ចាស់ដី ។ លោកថា «ហេតុអីបានជាក្រុមហ៊ុន ទាំងសាលារាជធានីភ្នំពេញ ចង់បន្តរឿងហ្នឹងដដែលៗ ចង់យករឿងហ្នឹងដូចជារឿងបុរីកីឡា ឬបឹងកក់ ។ ខ្ញុំគិតថា វប្បធម៌ចាស់គួរតែត្រូវបានបំភ្លេចចោល ឈប់បានអនុវត្ត ហើយយើងយកគោលការណ៍ច្បាប់មកដោះស្រាយ ដើម្បីឲ្យវាមានស្ថិរភាពក្នុងសង្គមយើង ដើម្បីឲ្យអភិវឌ្ឍន័មួយ គឺជាការអភិវឌ្ឍន៍មួយពិតប្រាកដ ក្រោមរូបភាពមួយគោរពច្បាប់ គោរពប្រជាពលរដ្ឋ» ។
បន្ទាប់ពីពលរដ្ឋឈរត្រៀបត្រានៅមុខសាលាក្រុង សុំឲ្យមានដំណោះស្រាយនៅព្រឹកថ្ងៃចន្ទនេះ មន្ត្រីរដ្ឋបាលសាលាក្រុងបានហៅតំណាងពលរដ្ឋម្នាក់ គឺលោក ជា សុផាត ឲ្យចូលជួបដើម្បីដាក់ញត្តិ ។ លោកជា សុផាត អះអាងថា សាលាក្រុងសន្យាថានឹងបញ្ជូនសំណើរបស់ពួកគាត់ទៅថ្នាក់លើបន្តទៀត ។
VOD មិនអាចទាក់ទងអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានទេ ។
ពលរដ្ឋឲ្យដឹងថា ក្រុមហ៊ុន OCIC ដែលទទួលបានសិទ្ធិវិនិយោគពីសាលារាជធានីភ្នំពេញ បានធ្វើការអភិវឌ្ឍលើដីប្រជាពលរដ្ឋជាង១០០ហិកតា ដោយមិនផ្តល់សំណងសមរម្យនោះ បានកើតឡើង៣ឆ្នាំមកហើយ តែមានពលរដ្ឋមួយចំនួនដែលមានផ្ទះ និងដីតូចៗព្រមទទួលសំណង ទោះបីជាសំណងនោះមិនសមរម្យក្ដី ៕
សូមសរសេរមកកញ្ញា ជន ស្រីណុច តាមរយៈ chornsreynoch@vodhotnews.com