ដោយ៖ ថោ ស៊ីណា
ថ្ងៃពុធ ទី4 មិនា 2015
http://vodhotnews.com
ក្លឹបអ្នកកាសែតកម្ពុជា សំដែងការខកចិត្តចំពោះសាលាដំបូងខេត្តព្រះវិហារ ដោយចោទថាធ្វើការដោយមិនមានតម្លាភាព និង មិនយុត្តិធម៌ ករណីចេញដីកាចាប់ខ្លួនអ្នកកាសែតពីរនាក់កាលពីសប្តាហ៍មុន ក្រោមចោទពីបទគំរាមកំហែងយកលុយពីអ្នករកស៊ីឈើខុសច្បាប់។
យោងតាមសេចក្តីថ្លែងការណ៍របស់ក្លឹបអ្នកកាសែតកម្ពុជា កាលពីថ្ងៃអង្គារម្សិលមិញបានឲ្យដឹងថា លោក ទិត្យ ស្រ៊ ភ្នាក់ងាកាសែត AKP និងលោក ឈឿន ចាន់ អ្នកយកព័ត៌មានទូរទស្សន៍អប្សរា ត្រូវសមត្ថកិច្ចចាប់ឃុំខ្លួន និងការកោះហៅអ្នកសារព័ត៌មានជាបន្តបន្ទាប់បែបនេះ គឺជាការគំរាមកំហែង និងរំលោភយ៉ាងធ្ងន់ធ្ងរដល់សិទ្ធិសេរីភាព របស់អ្នកសារព័ត៌មាន ដែលកំពុងបំពេញវិជ្ជាជីវៈ ចំណែកឯក្រុមឈ្មួញរកស៊ីឈើល្មើសច្បាប់ បែរជាអាចប្រកបមុខរបរយ៉ាងសកម្ម និងដោយសុវត្ថិភាពទៅវិញ ។
លោក ប៉ែន បូណា មន្ត្រីនៃក្លឹបអ្នកកាសែតកម្ពុជា ប្រាប់ VOD ថាជានិច្ចជាកាលតុលាការនេះ តែងកោះហៅអ្នកកាសែតមកសួរនាំ តែចំពោះឈ្នួញឈើខុសច្បាប់វិញ ទោះមានប្រជាពលរដ្ឋរាយការណ៍យ៉ាងណាក៏ដោយក៏មន្ត្រីរដ្ឋាភិបាលក្នុងខេត្តនោះមិនបានអើពើដែរ ។ លោកថា «ឈ្មួញអ្នករកស៊ីឈើខុសច្បាប់ ដូចជាមិនឃើញមានអាជ្ញាធរឬតុលាការនោះចាត់វិធានការ ។ អ៊ីចឹងបានជាយើងឃើញថា ចំណាត់ការដូចជាមិនមានតម្លាភាព» ។
ព្រះរាជអាជ្ញារងអមសាលាដំបូងខេត្តព្រះវិហារ លោក ឡុង ស៊ីថា ដែលជាអ្នកកាន់សំណុំរឿងអ្នកកាសែតពីរនាក់នេះ អះអាងថាមន្ត្រីតុលាការធ្វើការដោយយុត្តិធម៌ ។ លោកបញ្ជាក់ថា «ពាក់ព័ន្ធនឹងការរកស៊ីឈ្មួញ(ឈើខុសច្បាប់) គឺមានមន្ត្រីជំនាញរបស់គេហើយ នេះរឿងមន្ត្រីរបស់គេទេ ជំនាញរដ្ឋបាលព្រៃឈើគេអ្នកបង្ក្រាប ខ្ញុំធ្វើដែរ ពាក្យបណ្ដឹងរបស់ប្រជាពលរដ្ឋទេ»។
យ៉ាងណាក៏ដោយ រដ្ឋមន្ត្រីក្រសួងព័ត៌មាន លោក ខៀវ កាញារិទ្ធ ឆ្លើយនឹងសំណួរបស់អ្នកយកព័ត៌មានVOD នៅពេលសម្រាកពីសន្និបាតបូកសរុបការងារក្រសួងព័ត៌មាននៅថ្ងៃពុធនេះថា ករណីនេះជាឆន្ទានុសិទ្ធិ របស់តុលាការ ព្រោះអ្នកកាសែតក៏ត្រូវស្ថិតក្រោមច្បាប់ដែរឲ្យតែធ្វើខុសច្បាប់។ លោកថា «អ្នកកាសែតក៏មិនមែននៅក្រៅច្បាប់ដែរ អ៊ីចឹងបើយើង(អ្នកកាសែត)ធ្វើតាមវិជ្ជាជីវៈ យើងនឹងជួយ ប៉ុន្តែបើធ្វើខុសវិជ្ជាជីវៈនេះមិនមែនជាការងារ នោះជាកំហុសបុគ្គលរបស់គេ» ។
អ្នកសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចាំខេត្តព្រះវិហារ លោក ឡោ ចាន់ ឲ្យដឹងថា បទល្មើសកាប់ឈើខុសច្បាប់ និងមុខរបរសិប្បកម្មនានាក្នុងខេត្តព្រះវិហារពិតជាកើនឡើងទ្វេរដងក្នុងដើមឆ្នាំ២០១៥នេះ ក្រោយពីតុលាការខេត្តនេះបានចេញដីកាកោះហៅអ្នកកាសែតជាញឹកញាប់ទៅសួរនាំរឿងករណីយកលុយពីឈ្មួញឈើទាំងនោះ ៕
សូមសរសេរមកលោក ថោ ស៊ីណា តាមរយៈ sina@vodhotnews.com