ដោយ៖ ខាន់ លក្ខិណា
ថ្ងៃព្រហស្បតិ៍ ទី5 មិនា 2015
http://vodhotnews.com
ស្តាប់សំឡេង៖ |
ចម្លងទុក |
សហជីពស្នើទៅក្រសួងការងារចាត់វិធានការលើថៅកែរោងចក្រមួយនៅក្នុងរាជធានីភ្នំពេញឈ្មោះឌីអេស ហេ្វសិន ដែលបានរត់គេចខ្លួនមិនបើកប្រាក់ខែសម្រាប់ខែកុម្ភៈ និងប្រាក់អត្ថប្រយោជន៍ផ្សេងៗដល់កម្មករ ។
ក្នុងលិខិតរួមមួយច្បាប់របស់សហព័ន្ធសហជីពជាតិ និងសហព័ន្ធសហជីពមិត្តភាពកម្មករ ចុះថ្ងៃទី០៣ ខែកុម្ភៈ ឆ្នាំ ២០១៥ ឲ្យដឹងថាថៅកែរោងចក្រ ឌីអេស ហេ្វសិន ដែលមានទីតាំងស្ថិតនៅ ភូមិអន្លងគង សង្កាត់ព្រៃស ខណ្ឌដង្កោ រាជធានីភ្នំពេញ បានបិទសង្វាក់ពាណិជ្ជកម្ម ដោយមិនបានបើកប្រាក់ឈ្នួល និងប្រាក់បន្ទាប់បន្សំឲ្យកម្មករទេ ។
លិខិតបញ្ជាក់ថានៅថ្ងៃទី២៨ ខែកុម្ភៈ ឆ្នាំ ២០១៥ ភាគីក្រុមហ៊ុនយកឡានចំនួន០៧គ្រឿង មកដឹកសម្ភារទាំងអស់កណ្ដាលយប់ តែត្រូវបានកម្មករហាមឃាត់មិនឲ្យដឹកចេញ ។ អ្នកគ្រប់គ្រងក្រុមហ៊ុន លោក វ៉ាន់ ចាន់ អះអាងថា ថៅកែរោងចក្រ ឌីអេស ហ្វេសិន មិនបាននៅក្នុងប្រទេសកម្ពុជាទៀតទេ ។
អ្នកនាំពាក្យក្រសួងការងាលោក ហេង សួរ មានប្រសាសន៍ថា ក្រសួងបានទទួលលិខិតនោះហើយ ហើយមន្ត្រីរបស់ក្រសួងកំពុងតែធ្វើការទៅលើរឿងនេះតាមនីតិវិធី ។
ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍ថា រដ្ឋាភិបាលគួរតែរឹតបន្តឹងផ្នែកច្បាប់ទៅលើនិយោជកណាដែលបានមកវិនិយោគនៅក្នុងព្រះរាជាណាចក្រកម្ពុជា ។
លោក មឿន តុលា បន្តថាប្រសិនបើក្រុមហ៊ុនមួយក្ស័យធន និយោជកត្រូវជូនដំណឹងដល់កម្មករដែលកំពុងធ្វើការឲ្យបានដឹងជាមុន ហើយត្រូវផ្ដល់ប្រាក់អត្ថប្រយោជន៍ផ្សេងៗជូនពួកគាត់ ដើម្បីកំពុងឲ្យមានការតវ៉ាកើតឡើង ។
រោងចក្រកាត់ដេរសំលៀកបំពាក់ ឌីអេស ហេ្វសិន ទើបបើកដំណើរការងារជាងមួយឆ្នាំ ហើយមានការកម្មករបំពេញការងារនៅក្នុងរោងចក្រនោះជាង៤០០នាក់ ៕
សូមសរសេរមកលោក ខាន់ លក្ខិណា តាមរយៈ khanleakhena@yahoo.com