ដោយ៖ ខាន់ លក្ខិណា | ថ្ងៃអង្គារ ទី24 មិនា 2015
http://vodhotnews.com
កម្មករមកពីរោងចក្រកាត់មេរ៉ូសាន់ ក្នុងខណ្ឌព្រែកព្នៅ រាជធានីភ្នំពេញ ស្វែងរកកិច្ចអន្តរាគមន៍ពីប្រមុខរដ្ឋាភិបាល លើករណីថៅកែរោងចក្រដែលពួកគេចោទថា មិនគោរពច្បាប់ការងារ និងបានបញ្ឈប់កម្មករ៥០នាក់ដោយគ្មានមូលហេតុ ។
កម្មកររោងចក្រមេរ៉ូសាន់ប្រមាណ៥០នាក់នៅព្រឹកថ្ងៃអង្គារនេះ បាននាំគ្នាឡើងមកដាក់ញត្តិនៅខុទ្ធកាល័យនាយករដ្ឋមន្ត្រី ហ៊ុន សែន ។ កម្មការនីម្នាក់ឈ្មោះ លុន ចាន់ណា ប្រាប់អ្នកសារព័ត៌មានមុនពេលដាក់ញត្តិថា ថៅកែរោងចក្រមេរ៉ូសាន់បានបញ្ឈប់កម្មករ ដោយគ្មានហេតុផលឲ្យបានច្បាស់លាស់ ហើយការបញ្ឈប់របស់ថៅកែរោងចក្ររូបនោះ មិនបានផ្ដល់ប្រាក់អត្ថប្រយោជន៍ផ្សេងៗជូនកម្មករនោះទេ ។
អ្នកស្រីបន្តថា ប្រសិនបើថៅកែរោងចក្រចង់បញ្ឈប់កម្មករណាម្នាក់ត្រូវតែបញ្ជាក់ពីមូលហេតុឲ្យបានច្បាស់លាស់ ចំពោះបញ្ហាដែលកម្មករធ្វើខុស ហើយការបញ្ឈប់នោះ ត្រូវតែគោរពតាមទៅលក្ខខណ្ឌការងារ ។ អ្នកស្រីព្រមានថា បើថៅកែរោងចក្រមិនធ្វើតាមការទាមទាររបស់កម្មករទេ នោះកម្មករទាំង ៧០០នាក់នៅក្នុងរោងចក្រនឹងធ្វើការតវ៉ាបន្តទៀត ដោយមិនព្រមចូលធ្វើការវិញឡើយ ។
កម្មការនីម្នាក់ទៀត កញ្ញា ពេជ្រ មួយឡេង ក៏បានលើឡើងដូចគ្នាដែរថា ការបញ្ឈប់កម្មកររបស់ថៅកែរោងចក្រមេរ៉ូសាន់ គ្មានបញ្ជាក់ពីមូលហេតុ ហើយថៅកែតែងតែគំរាមពួកគេកុំឲ្យធ្វើការតវ៉ា។ កញ្ញាថា កន្លងមកពួកគេបានដាក់ពាក្យបណ្ដឹងទៅក្រសួងការងារ ដើម្បីសុំកិច្ចអន្តរាគមន៍ទៅថៅកែរោងចក្រនោះ ប៉ុន្តែមកដល់ពេលនេះ មិនទាន់មានដំណោះស្រាយនៅឡើយទេ ។
មន្ត្រីខុទ្ទកាល័យលោកនាយករដ្ឋមន្ត្រីម្នាក់បានចេញមកទទួលញត្តិ ប៉ុន្តែមិនបានសន្យាថានឹងមានចំណាត់ ការយ៉ាងណានោះទេ ។
ប្រធានរដ្ឋបាលរោងចក្រមេរ៉ូសាន់ លោក ឈុន ឆាយ បដិសេធមិនធ្វើអធិប្បាយ ដោយឆ្លើយយ៉ាងខ្លីថា លោកជាប់ប្រជុំ ។
VOD មិនអាចសុំការអត្ថធិប្បាយពីអ្នននាំពាក្យក្រសួងការងារបានទេ ។
គួរបញ្ជាក់ថា កាលពីថ្ងៃទី១១ ខែមីនា ឆ្នាំ២០១៥ កន្លងទៅកម្មកររោងចក្រមេរ៉ូសាន់ បានធ្វើការតវ៉ាដើម្បីទាមទារថៅកែកុំឲ្យបញ្ឈប់កម្មករបន្តទៀត ទាមទារឲ្យក្រុមហ៊ុនដករដ្ឋបាលម្នាក់ចេញ ក្រុមហ៊ុនមិនត្រូវបង្ខិតបង្ខំកម្មករឲ្យថែមម៉ោងដោយមិនមានការស្ម័គ្រចិត្តពីកម្មករ និងពេលបញ្ឈប់កម្មកត្រូវទូទាត់ប្រាក់អត្ថប្រយោជន៍ផ្សេង ។ រោងចក្រមេរ៉ូសាន់ស្ថិតនៅក្នុងភូមិជំរៅ សង្កាត់គោករកា ខណ្ឌព្រែកព្នៅ និងមានកម្មករធ្វើការសរុបជាង៧០០នាក់ ៕
សូមសរសេរមកកញ្ញា ខាន់ លក្ខិណា តាមរយៈ khanleakhena@yahoo.com