ដោយ ហ៊ុំ ចំរើន
2015-03-26
RFA
លោក នួម សារឿន ផ្ដល់បទសម្ភាសន៍ដល់វិទ្យុអាស៊ីសេរី នៅខាងក្រោមផ្ទះប្រជាពលរដ្ឋតំបន់ដីដែលពុំទាន់មានប្លង់កម្មសិទ្ធិ នាភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង នៅថ្ងៃទី២៦ ខែមីនា ឆ្នាំ២០១៥។ RFA/Hum Chamroeun
ប្រជាពលរដ្ឋនៅក្រុងបាត់ដំបង ខេត្តបាត់ដំបង ជាង ២០គ្រួសារ ចោទប្រកាន់មន្ត្រីមន្ទីររៀបចំដែនដី នគរូបនីយកម្ម និងសំណង់ខេត្តនេះ ថាមិនចេញប្លង់កម្មសិទ្ធិដីធ្លីស្របច្បាប់ឲ្យអ្នកភូមិទេ ធ្វើឲ្យពួកគេមិនអាចយកដីនោះទៅដាក់បញ្ចាំធនាគារ ដើម្បីយកប្រាក់ទៅប្រកបរបរដោះស្រាយជីវភាពគ្រួសារបានឡើយ។
ប្រជាពលរដ្ឋនៅក្រុងបាត់ដំបង សម្ដែងការមិនពេញចិត្តទៅនឹងសកម្មភាពរបស់មន្ត្រីរៀបចំដែនដី នគរូបនីយកម្ម និងសំណង់ ថាជាទង្វើមួយក្នុងគោលបំណងមិនល្អចំពោះប្រជាពលរដ្ឋទេ។
ក្រុមប្រជាពលរដ្ឋរស់នៅភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង ថ្លែងនៅខាងក្រោយផ្ទះ នៅថ្ងៃទី២៦ មីនា ថា ដីលំនៅឋានរបស់អ្នកភូមិប្រមាណ ២៤គ្រួសារនៅភូមិអង់ នេះ ជាដីដែលពួកគាត់រស់នៅតាំងពីដូនតារហូតមក។ អ្នកភូមិបន្តថា មន្ត្រីរៀបចំដែនដី នគរូបនីយកម្ម និងសំណង់ ខេត្តបាត់ដំបង មិនចេញប្លង់កម្មសិទ្ធិស្របច្បាប់ឲ្យពួកគាត់កាន់កាប់ទេ ធ្វើឲ្យប្រជាពលរដ្ឋជួបការលំបាកក្នុងការបែងចែកទៅឲ្យកូនចៅ និងយកទៅបញ្ចាំនៅធនាគារ ដើម្បីយកប្រាក់ទៅប្រកបរបរចិញ្ចឹមជីវិតពុំបានឡើយ។ អ្នកភូមិអំពាវនាវសុំឲ្យមន្ទីររៀបចំដែនដី នគរូបនីយកម្ម និងសំណង់ ខេត្តបាត់ដំបង និងមន្ត្រីពាក់ព័ន្ធ ចេញប្លង់កម្មសិទ្ធិឲ្យបានឆាប់៖ «ដីតាមខ្ញុំដឹងប្រហែលជាគេទុកដីនេះចែកគ្នាលក់ បានជាគេមិនធ្វើប្លង់ឲ្យប្រជាពលរដ្ឋ។ កន្លែងនេះខ្ញុំធ្លាប់រស់នៅតាំងពីដូនតាមកហើយ ឲ្យខ្ញុំទៅរស់នៅកន្លែងផ្សេង ខ្ញុំមិនទៅទេ។ ខ្ញុំបើគេមិនចេញប្លង់ឲ្យទេនោះ កូនចៅរបស់ខ្ញុំទៅថ្ងៃខាងមុខទៀត ពួកគេមិនដឹងទៅជាយ៉ាងណាទេ»។
វិទ្យុអាស៊ីសេរី ពុំអាចទាក់ទងប្រធានមន្ទីររៀបចំដែនដី នគរូបនីយកម្ម និងសំណង់ ខេត្តបាត់ដំបង គឺលោក អ៊ូ ដារី ដើម្បីអត្ថាធិប្បាយជុំវិញបញ្ហានេះបានទេ នៅថ្ងៃទី២៦ មីនា។
ប៉ុន្តែ ចៅសង្កាត់អូរចារ លោក កឹម ឆង មានប្រសាសន៍ទទួលស្គាល់ថា ពិតជាយឺតយ៉ាវក្នុងការប្រគល់ប្លង់ដីឲ្យប្រជាពលរដ្ឋមែន។ ទោះជាយ៉ាងនេះ លោកថា បញ្ហានេះអាជ្ញាធរពាក់ព័ន្ធពុំមានគោលបំណងមិនល្អ ដើម្បីទាញយកប្រយោជន៍ពីប្រជាពលរដ្ឋឡើយ ហើយថានឹងដោះស្រាយការងារនេះបញ្ចប់ក្នុងពេលឆាប់ៗ៖ «ដោយសារដីរបស់ពួកគាត់នោះត្រូវសាងសង់ផ្លូវឆ្លងកាត់ ដូច្នេះមន្ត្រីជំនាញខាងភូមិបាល និងមន្ត្រីពាក់ព័ន្ធ កំពុងដំណើរការដោះស្រាយបញ្ហានេះ»។
ទោះយ៉ាងនេះក្ដី មន្ត្រីស៊ើបអង្កេតអង្គការលីកាដូ (Licadho) ខេត្តបាត់ដំបង លោក ហេង សាយហុង មានប្រសាសន៍ថា ការងារអភិវឌ្ឍន៍ក្នុងមូលដ្ឋានកន្លងមក អាជ្ញាធរតែងលើកហេតុផលថាយ៉ាងនេះយ៉ាងនោះដាក់ប្រជាពលរដ្ឋជាប្រចាំ ជាពិសេសគឺនៅតំបន់ដីដែលមានតម្លៃតែម្ដង។ បញ្ហានេះ ធ្វើឲ្យប្រជាពលរដ្ឋដែលប៉ះពាល់នោះមិនសប្បាយចិត្ត ហើយទាមទារឲ្យអាជ្ញាធរដោះស្រាយជាបន្តបន្ទាប់៖ «ខ្ញុំក្រែងតែគេយកលេសថាអ៊ីចឹងទៅ ហើយគេបែរទៅជាយកដីរបស់ប្រជាពលរដ្ឋទាំងនោះទៅធ្វើអ្វីផ្សេងទៅ ព្រោះដីនោះប្រជាពលរដ្ឋជាច្រើនគ្រួសារដែរ»។
យ៉ាងនេះក្ដី ប្រជាពលរដ្ឋអះអាងថា អាជ្ញាធរមិនចេញប្លង់កម្មសិទ្ធិដីធ្លីឲ្យពួកគាត់នេះ ក្នុងគោលបំណងមិនល្អទេ ដោយយកលេសថា ដីដែលពួកគាត់រស់នៅនោះជាដីទួលបុរាណ ពុំអាចចេញប្លង់ឲ្យអ្នកភូមិបានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ពលរដ្ឋរិះគន់គម្រោងអភិវឌ្ឍន៍កំពង់ផែស្វយ័តក្រុងព្រះសីហនុថាប៉ះពាល់ដល់របររកស៊ី
- សហគមន៍ព្នងមានជម្លោះដីនឹងក្រុមហ៊ុនវៀតណាមបដិសេធមិនចុះបញ្ជីស្ថិតិដីធ្លី
- ពលរដ្ឋមានបញ្ហាដីធ្លីជាមួយក្រុមហ៊ុនម៉ែនសារុននៅត្បូងឃ្មុំរង់ចាំដំណោះស្រាយ
- ពលរដ្ឋជាង៥០គ្រួសារនៅបាត់ដំបងផ្ដិតមេដៃស្នើឲ្យតំណាងរាស្ត្រជួយដោះស្រាយជម្លោះដីធ្លី
- ពលរដ្ឋមានជម្លោះដីនៅក្បែរទីស្ដីការតវ៉ាទាមទារប្លង់កម្មសិទ្ធិស្របច្បាប់
- ក្រសួងរៀបចំដែនដីរៀបចំពិនិត្យសើរើគម្រោងផ្ដល់ដីសម្បទានសង្គមកិច្ចនៅខេត្តក្រចេះ
- សហគមន៍នៅរតនគិរីចោទក្រុមហ៊ុន៧មករាផារីថាឈូសឆាយព្រៃឈើនិងរំលោភយកដី
- គណៈកម្មការទី១រដ្ឋសភាលើកឡើងពីលទ្ធផលទំនាស់ដី២០សហគមន៍នៅខេត្តព្រះសីហនុ
- ពលរដ្ឋប្រមាណ៧០គ្រួសារនៅតាកែវនាំគ្នាឃាត់គ្រឿងចក្រមន្ត្រីយោធាឈូសឆាយដីស្រែ