ដោយ៖ ណាត សុភាព | ថ្ងៃអាទិត្យ ទី29 មិនា 2015
http://vodhotnews.com
អ្នកឃ្លាំមើលការបោះឆ្នោត ដែលតែងតែរិះគន់ការកែទម្រង់ ច្បាប់បោះឆ្នោត និង គ.ជ.ប ថ្មី យល់ថា ការបើកចំហឲ្យមានការដាក់ពាក្យសុំធ្វើជាសមាជិក គ.ជ.ប ថ្មី គឺជារឿងប្រសើរ និងអាចធ្វើឲ្យស្ថាប័ននេះរឹងមាំជាងមុន ។
នាយកប្រតិបត្តិអង្គការឃ្លាំមើលការបោះឆ្នោតហៅកាត់ថាខុមហ្វ្រែល លោក គល់ បញ្ញា មានប្រសាសន៍ជាមួយVODនៅថ្ងៃអាទិត្យនេះថា ជាការប្រសើរណាស់ ដែលគណបក្សទាំងពីរបើកចំហឲ្យអ្នកដាក់ពាក្យដើម្បីធ្វើជាសមាជិក គ.ជ.ប ថ្មីនោះ ។ លោកលើកទឹកចិត្តឲ្យអ្នកមានសមត្ថ ដាក់ពាក្យឲ្យបានច្រើន ដើម្បីឲ្យក្រុមការងារនៃគណបក្សទាំងពីរ ជ្រើសរើសយកអ្នកដែលមានសមត្ថភាពគ្រប់គ្រាន់ធ្វើការ ចៀសវាងការរើសយកអ្នកមិនមានសមត្ថភាព នាំឲ្យដំណើរការបោះឆ្នោតលើកក្រោយមានបញ្ហា។ ប៉ុន្តែលោកបន្តថា បើការជ្រើសរើសយកបេក្ខភាពនោះ គ្មានតម្លាភាព ធ្វើតាមការកំណត់ទុកនៃបក្សរៀងៗខ្លួន នោះវានឹងនាំឲ្យដំណើរការ គ.ជ.ប ថ្មី មិនបម្រើដល់ផលប្រយោជន៍ពលរដ្ឋទូទៅ គឺនៅតែបម្រើផលប្រយោជន៍បក្សដដែល ។
លោកគល់ បញ្ញា ក៏លើកទឹកចិត្តដល់ប្រធានអង្គការលីកាដូលោកស្រី ពុង ឈីវកេក ឲ្យរក្សាជំហរទទួលយកបេក្ខភាពសមាជិកទី៩នៃ គ.ជ.ប ថ្មីដដែល ទោះក្នុងកាលៈទេសៈណាក៏ដោយ។ លោកថា តួនាទីនោះសំខាន់ណាស់ សម្រាប់ធ្វើឲ្យដំណើរការបោះឆ្នោតនៅអាណត្តិក្រោយនេះមានភាពល្អប្រសើរជាងមុន ។
VOD មិនអាចទាក់ទងលោកស្រី ពុង ឈីវកេក ដើម្បីសុំមតិយោបល់ទាក់ទងនឹងបញ្ហានេះបានទេ ។
យ៉ាងណាក៏ដោយ លោក គល់ បញ្ញា បញ្ជាក់ថា លោកមិនអាចដាក់ពាក្យសុំធ្វើជាសមាជិក គ.ជ.ប ថ្មីនោះបានទេ ព្រោះលោកជាប់កិច្ចសន្យាជាមួយនឹងអង្គការសង្គមស៊ីវិល ។
លោកក៏បានរិះគន់លើនីតិវិធីដាក់ពាក្យជ្រើសរើសបេក្ខភាព គ.ជ.ប ថ្មីនោះដែរថា មានរយៈពេលខ្លីពេក ធ្វើឲ្យអ្នកដាក់ពាក្យពិបាកសុំលិខិតថ្កោលទោសពីក្រសួងយុត្តិធម៌ ព្រោះការសុំលិខិតនោះមានរយៈពេល១២ថ្ងៃឯណោះ។ លោកបន្តថា សភាគួរ ផ្តល់រយៈពេលដាក់ពាក្យរើសបេក្ខភាព គ.ជ.ប ថ្មី ឲ្យបានមួយខែឡើងទៅ ទើបជាការប្រសើរ ។
រដ្ឋសភាជាតិកម្ពុជា កាលពីថ្ងៃទី២៣ខែមីនាឆ្នាំ២០១៥ បានចេញសេចក្តីជូនដំណឹងតាមសារអេឡិចត្រូនិច ខ្លឹមសារថា ពីថ្ងៃទី៣០មីនា ដល់ ០៦ មេសា អគ្គលេខាធិការដ្ឋានរដ្ឋសភា បើកឲ្យសាធារណៈជន ដាក់ពាក្យជាបេក្ខភាពសមាជិក គ.ជ.ប ថ្មី ។ លុះដល់ថ្ងៃទី៩ មេសា គណៈកម្មាធិការអចិន្ត្រៃយ៍នៃរដ្ឋសភានឹងប្រជុំ ដើម្បីពិនិត្យ និងឯកភាពទៅលើសមាជិក គ.ជ.ប តាមរូបមន្ត ៤.៤.១ ៕
សូមសរសេរមកលោក លោក ណាត សុភាព តាមរយៈ sopheap@vodhotnews.com