ដោយ សុជីវី
2015-03-31
RFA
អនុប្រធានគណបក្សសង្គ្រោះជាតិ លោក កឹម សុខា ផ្ដល់បទសម្ភាសន៍ ខណៈលោកទៅសួរសុខទុក្ខមន្ត្រីជាន់ខ្ពស់របស់គណបក្សសង្គ្រោះជាតិ លោក មាជ សុវណ្ណារ៉ា ក្នុងពន្ធនាគារព្រៃស នៅថ្ងៃទី១២ មីនា ២០១៥។ RFA/Uon Chhin
អនុប្រធានទី១រដ្ឋសភា និងជាអនុប្រធានគណបក្សសង្គ្រោះជាតិ លោក កឹម សុខា នៅមិនទាន់សម្រេចថាយ៉ាងណានៅឡើយ បន្ទាប់ពីទទួលបានដីកាកោះរបស់តុលាការ ដែលតម្រូវឲ្យលោកចូលទៅបំភ្លឺនៅសាលាដំបូងនៅថ្ងៃទី៨ ខែមេសា ខាងមុខ។
មេធាវីការពារក្ដី ហៅដីកាកោះនោះថាខុសនីតិវិធី។ ចំណែកមន្ត្រីអង្គការមិនមែនរដ្ឋាភិបាល លើកឡើងថា ករណីនេះជារឿងនយោបាយ ដែលគួរតែបិទបញ្ចប់នៅពេលចរចានយោបាយបានស្រុះស្រួល។
មេធាវីការពារក្ដីឲ្យ លោក កឹម សុខា លើកឡើងថា ការកោះហៅកូនក្ដីរបស់លោកដែលជាតំណាងរាស្ត្រកំពុងមានអភ័យឯកសិទ្ធិ និងជាអនុប្រធានរដ្ឋសភា គឺជាការរំលោភអំណាចរវាងនីតិប្បញ្ញត្តិ និងតុលាការ។
លោកមេធាវី ចាន់ ចេន ដែលការពារក្តីនេះមានប្រសាសន៍ថា ករណីនេះលោកនៅមិនទាន់បានជួបពិភាក្សានឹងកូនក្តី ថាត្រូវចូលទៅឆ្លើយបំភ្លឺតាមដីកាកោះនេះនៅឡើយ៖ «ដីកាដែលផ្ញើទៅគាត់ បើគិតតាមបែបបទរដ្ឋបាលគួរតែទៅតាមរយៈក្រសួងយុត្តិធម៌ ទៅស្ថាប័នរដ្ឋសភា។ តុលាការគួរធ្វើតាមបែបបទហ្នឹងប្រសើរជាង។ គាត់មានអភ័យឯកសិទ្ធិ ហើយបានការពារដោយរដ្ឋធម្មនុញ្ញ។ ទោះជាកូនក្តីខ្ញុំគាត់ទៅឆ្លើយបំភ្លឺនៅតុលាការ ក៏ខ្ញុំគិតថា គឺជាការរំលោភអំណាច វាប៉ះពាល់ដល់អភ័យឯកសិទ្ធិ ចឹងតុលាការដូចមិនមានសិទ្ធិណាសាកសួរទេតាមខ្ញុំយល់»។
ចំណែក លោក កឹម សុខា ក៏នៅមិនទាន់ឆ្លើយយ៉ាងណាដែរ នៅពេលចោទសួរថា តើលោកនឹងចូលទៅបំភ្លឺតាមដីកាកោះ ឬយ៉ាងណា? ដោយលោកទុកភារៈនេះឲ្យមេធាវីលោកធ្វើការ។
ព្រះរាជអាជ្ញារងសាលាដំបូងរាជធានីភ្នំពេញ លោក លី សុផាន់ណា បានចេញដីកាកោះហៅ លោក កឹម សុខា ជាអនុប្រធានទី១រដ្ឋសភា ឲ្យចូលទៅបំភ្លឺនៅថ្ងៃទី៨ ខែមេសា ឆ្នាំ២០១៥ ខាងមុខនេះ ដើម្បីសាកសួរបន្ថែមក្នុងសំណុំរឿងអំពើហិង្សានៅផ្លូវវ៉េងស្រេង កាលពីដើមឆ្នាំ២០១៤។
សំណុំរឿងនេះ លោក កឹម សុខា ធ្លាប់បានចូលទៅបំភ្លឺនៅតុលាការម្ដងហើយកាលពីថ្ងៃទី១៤ ខែមករា ឆ្នាំ២០១៤ កាលនោះចៅក្រមបានចំណាយពេលពេញមួយព្រឹកសាកសួរ។ ពេលនោះ លោក សម រង្ស៊ី ក៏ត្រូវចៅក្រមសាកសួរដែរ។ ការសាកសួរប្រធាន និងអនុប្រធានគណបក្សសង្គ្រោះជាតិ ពេលនោះ ពាក់ព័ន្ធនឹងការចោទប្រកាន់ថា ញុះញង់ឲ្យប្រព្រឹត្តបទឧក្រិដ្ឋ ឬបង្កភាពវឹកវរដល់សន្តិសុខសង្គម នៅក្រោយការតវ៉ាដំឡើងប្រាក់ខែកម្មករនៅផ្លូវវ៉េងស្រេង និងក្បែររោងចក្រយ៉ាកជីន (Yakjin) ដែលត្រូវអាជ្ញាធរបង្ក្រាបដោយហិង្សា។
នាយកប្រតិបត្តិរបស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) លោក គល់ បញ្ញា មានប្រសាសន៍ថា ករណីនេះជារឿងនយោបាយ ដែលគួរបន្តដោះស្រាយតាមការចរចា ហើយម្យ៉ាង លោក កឹម សុខា ជាតំណាងរាស្ត្រដែលមានអភ័យឯកសិទ្ធិការពារ៖ «គួរតែខិតខំពង្រឹងវប្បធម៌សន្ទនារបស់គណបក្សទាំងហ្នឹងទៅ ហើយដោះស្រាយបញ្ហាជាតិដោយយកគោលការណ៍រួមឲ្យបានច្រើន។ ទោះបីករណីហ្នឹងជារឿងចាស់ក៏ដោយ មិនអាចចេះតែកោះហៅដែរ។ វាអត់មានអីតុលាការចេះតែកោះហៅ ព្រោះមានអភ័យឯកសិទ្ធិណាមួយវាមានចែងក្នុងរដ្ឋធម្មនុញ្ញ ថាអំណាចដាច់ពីគ្នា ម្ល៉ោះហើយសមាជិកនៃអំណាចទាំងបីហ្នឹងមិនអាចចេះតែប្រើអំណាចរំលោភលើគ្នាបានទេ»។
ដីកាកោះហៅ លោក កឹម សុខា នេះធ្វើឡើងក្រោយពី លោក ហ៊ុន សែន ព្រមានថា លោក កឹម សុខា នឹងមិនអាចរួចខ្លួនឡើយ មិនថាមានឋានៈណាឡើយ រឿងក្ដីរបស់លោកនៅតុលាការពាក់ព័ន្ធនឹងការប៉ុនប៉ងផ្ដួលរំលំរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- បក្សទាំងពីរជ្រើសរើសយកលោក ហង្ស ពុទ្ធា ធ្វើជាបេក្ខភាពទី៩នៃគ.ជ.ប
- “រដ្ឋាភិបាលប្រើប្រាស់ធនធានរដ្ឋមិនត្រឹមត្រូវនិងពុករលួយក្នុងវិស័យនយោបាយ”
- កម្ពុជា-វៀតណាមសហការរុករកអដ្ឋិធាតុទាហានវៀតណាមស្លាប់ក្នុងសង្គ្រាមនៅសៀមរាប
- លោក កឹម សុខា សន្យារកយុត្តិធម៌ដល់អ្នកស្លាប់ដោយគប់គ្រាប់បែកនៅមុខអាគាររដ្ឋសភាចាស់
- បក្សប្រឆាំងនឹងប្រារព្ធពិធីរំឭកវិញ្ញាណក្ខន្ធអ្នកស្លាប់ដោយការគប់គ្រាប់បែកឆ្នាំ១៩៩៧
- នាយករដ្ឋមន្ត្រីស្នើឲ្យម្ចាស់សណ្ឋាគាររៀបចំកន្លែងថ្វាយបង្គំសម្រាប់អ្នកកាន់សាសនាឥស្លាម
- អគ្គលេខាធិការដ្ឋានរដ្ឋសភាប្រកាសជ្រើសរើសសមាជិក គ.ជ.ប ថ្មី
- លោក កឹម សុខា ត្រឡប់មកដល់កម្ពុជាវិញ
- លោក ហ៊ុន សែន ខកបំណងចំពោះដំណើរទស្សនកិច្ចរបស់អ្នកស្រី មីស៊្ហែល អូបាម៉ា
Personally, I think Kem Sokha must not go to the court as summoned because he has a parliamentary immunity which legally protects him from any arrest or prosecution except for his acts of flagrant de licto. At the meantime, he should file a complaint against the summons with the constititution and seek an intervention from the NA President. if kem Sokha complies with the summons, it means that he is doing an illegal act.
There are a number of consequences before reaching to the point of arresting Khem Sokha! However if Khem Sokha does not love power and wishes to seek for justice, let abandoning his immunity and walking into the court room to show your bravery and cleanesss. I believe that Khem Sokha will wait until the situation turned to shit hits fan than he will drop everything and run away!! Wait and see? មនុស្សគេយកសំដី ដំរីគេភ្លុក ហើយឈើកំបាក់ពុកមិនអាចយកទៅឆ្លាក់ធ្វើជាព្រះបានទេ!