ដោយ៖ ឡាយ សាមាន | ថ្ងៃអង្គារ ទី31 មិនា 2015
http://vodhotnews.com
សង្គមស៊ីវិលដែលធ្វើការផ្នែកតស៊ូមតិ បង្ហាញការព្រួយបារម្ភថា ភាពមិនប្រក្រតីខាងនយោបាយ និងបក្សពួកនិយមនៅក្នុងស្ថាប័នរដ្ឋធំៗ ធ្វើឲ្យរាំងស្ទះកាន់តែធ្ងន់ធ្ងរដល់ដំណើរការលទ្ធិប្រជាធិបតេយ្យនៅកម្ពុជា និងការអភិវឌ្ឍជាតិ។
ការបង្ហាញនេះ ធ្វើឡើងក្នុងកិច្ចពិភាក្សាតុមូលស្តីពីប្រជាធិបតេយ្យ និងភាពមិនប្រក្រតីខាងនយោបាយនៅកម្ពុជា នៅថ្ងៃទី ៣១ ខែមីនា ដែលរៀបចំដោយអង្គការខុមហ្វ្រែល។
នាយកប្រតិបត្តិអង្គការឃ្លាំមើលការបោះឆ្នោតហៅកាត់ខុមហ្វ្រែល លោក គល់ បញ្ញា មានប្រសាសន៍ថា អំពើពុករលួយដែលធំបំផុត គឺអំពើពុករលួយផ្នែកនយោបាយ ដែលធ្វើឲ្យប៉ះពាល់ដល់ដំណើរការប្រជាធិបតេយ្យ និងការអភិវឌ្ឍសង្គមជាតិទាំងមូល។ លោកថាអំពើពុករលួយផ្នែកនយោបាយនេះ មានន័យថា រដ្ឋាភិបាលមិនបានប្រើប្រាស់ច្បាប់យកមកអនុវត្ត តែបែរជាប្រើប្រាស់កម្លាំងប្រដាប់អាវុធរបស់រដ្ឋាភិបាលក្នុងការទប់ស្កាត់រាល់ការសម្តែងមតិ និងសិទិ្ធជួបប្រជុំកន្លងមក។
លោក គល់ បញ្ញា មានប្រសាសន៍ថា «បើប៉ុស្តិ៍ទីប្រឹក្សាវិញរាប់រយ អនុប្រធានរដ្ឋសភា ប្រធានរដ្ឋសភារាប់រយ ៦០ទៅ ៧០នាក់ ដោយសារអត់ច្បាប់។ ចឹងបានចេះតែបង្កើត ហើយការរំលោភអំណាច ការប្រើប្រាស់អំណាចដើម្បីផលប្រយោជន៍នយោបាយទេ អត់មានទាក់ទិនផលប្រយោជន៍ជាតិទេ អត់មានថាបង្កើតក្រសួងនេះ ដំណែងនេះដើម្បីធ្វើកិច្ចការសម្រាប់ជាតិអត់ទេ គឺសម្រាប់ពួកខាងចុះចូល គឺឲ្យតំណែងមួយ ឬក៏ខាងណាសុទ្ធតែផលប្រយោជន៍នយោបាយទាំងអស់ ហ្នឹងទាក់ទិននឹងបញ្ហារំលោភអំណាច» ។
លោកគល់ បញ្ញា បន្ថែមថា ជាពិសេសរដ្ឋាភិបាល បានបង្កើតឲ្យមានសមាជិករដ្ឋាភិបាលច្រើនលើសលុប តែប្រើខុសតួនាទី និងខុសទិសដៅ ដែលធ្វើឲ្យការចំណាយរបស់រដ្ឋមិនមានតម្លាភាព។
នាយកប្រតិបត្តិអង្គការតម្លាភាពកម្ពុជា លោកព្រាប កុល បានឲ្យនិយមន័យថាកម្ពុជាមានអំពើពុករលួយមាន៦ប្រភេទរួមមាន ការសូកប៉ាន់ជាការដូរ ឬលុយ ការប្រើអំណាចជម្រិតយកលុយ ការក្លែងបន្លំឯកសារដើម្បីបានផលចំណេញ ឃុបឃិតគ្នាប្រកបអាជីវកម្មធំដោយអ្នកមានអំណាចនៅពីក្រោយ សាច់ញាតិ និងគ្រួសារនិយម និងពុករលួយផ្នែកនយោបាយដែលជៀតជ្រែកលើប្រព័ន្ធតុលាការ និងកងកម្លាំងប្រដាប់អាវុធ។ លោក បន្តថា តាមរយៈការសិក្សាស្រាវជ្រាវរបស់អង្គការតម្លាភាពរកឃើញថា ស្ថាប័នជាតិធំៗចំនួន១៣ មានជំងឺពុករលួយ និងបក្សពួកនិយម។ លោកមានប្រសាសន៍ថា «ស្ថាប័នដែលមានជម្ងឺខ្លាំងជាងគេ គឺស្ថាប័នតុលាការនេះឯង ជម្ងឺឈឺធ្ងន់ជាងគេ ប្រព័ន្ធសុច្ចរិតភាពខ្សោយជាងគេ បន្ទាប់មកស្ថាប័នប៉ូលីស ឈឺបន្ទាប់ពីតុលាការមកហើយប្រព័ន្ធតុលាការយើងមានបញ្ហាធ្ងន់ធ្ងរ។ប៉ុន្តែដល់ពេលដែលយើងជម្រាបដោយមានជូនដោយមានចេញរបាយការណ៍អីផ្សេងៗហ្នឹង ស្ថាប័នជាតិមួយចំនួន ឬរដ្ឋាភិបាលអត់មានបានឈឺអីទេ ចឹងជម្ងឺដែរយើងរកឃើញហ្នឹងអត់បានទទួលស្គាល់ថាឈឺទេ ពេលខ្លះទៅគាត់បដិសេធចោល» ។
VOD មិនអាចសុំការអត្ថាធិប្បាយពីអ្នកនាំពាក្យទីស្តីការគណៈរដ្ឋមន្រ្តីលោក ផៃ ស៊ីផាន បានទេ ដោយទូរស័ព្ទចូលគ្មានអ្នកទទួល។
ដូចគ្នានេះដែរ ប្រធានផ្នែកស៊ើបអង្កេតនៃអង្គការអាដហុក លោក នី ចរិយា យល់ថាបច្ចុប្បន្នដំណើរការលទ្ធិប្រជាធិបតេយ្យនៅកម្ពុជា ហាក់បីដូចជាដើរទៅមុខបន្តិច និងថយក្រោយបន្តិច។ លោកបន្តថាមូលហេតុដំណើរការប្រជាធិបតេយ្យមានការយឺតយ៉ាវ ដោយសារការគ្រប់គ្រងអំណាចមានការប្រមូលផ្តុំ ជាពិសេសប្រព័ន្ធតុលាការ និងកងម្លាំងប្រដាប់អាវុធមិនឯករាជ្យ។ លោកថា «គឺមានតែកម្លាំងមហាជនដែលត្រូវតែចូលរួមក្នុងការរុញនាវាកម្ពុជាយើងនេះឲ្យទៅក្នុងគន្លងប្រជាធិបតេយ្យឲ្យបាន។ ចឹងដើម្បីរុញច្រានប្រទេសយើងឲ្យទៅគន្លងប្រជាធិបតេយ្យលើកលែងតែប្រជាជនយល់ដឹង ចឹងអ្វីដែលជាលទ្ធភាពរបស់ប្រជាពលរដ្ឋខ្មែរក្នុងការរុញប្រទេសកម្ពុជាឲ្យទៅជាប្រទេសប្រជាធិបតេយ្យបាន គឺអំណាចរបស់ប្រជាពលរដ្ឋនៅក្នុងពេលបោះឆ្នោត» ។
ទាក់ទងនឹងភាពមិនប្រក្រតីនេះ សង្គមស៊ីវិលផ្តល់អនុសាសន៍មួយចំនួនដល់រដ្ឋាភិបាលរួមមាន អនុម័តច្បាប់ស្តីសិទ្ធិទទួលបានព័ត៌មានឲ្យបានឆាប់ បង្កើតច្បាប់ស្តីពីហិរញ្ញវត្ថុគណបក្សនយោបាយ វិសោធនកម្មមានត្រាមួយចំនួនក្នុងច្បាប់ប្រឆាំងអំពើពុករលួយ និងបង្កើតយន្តការរបស់រដ្ឋសភាក្នុងការសួរដេញដោលអំពីការរំលោភអំណាច ដើម្បីធ្វើឲ្យដំណើរប្រជាធិបតេយ្យនៅកម្ពុជាឆ្ពោះទៅមុខ។
របាយការណ៍របស់អង្គការខុមហ្វ្រែលស្តីពីប្រជាធិបតេយ្យប្រចាំឆ្នាំ និងភាពមិនប្រក្រតីផ្នែកនយោបាយ ឲ្យដឹងថា ប្រជាធិបតេយ្យរូបនីយកម្មនៅកម្ពុជាឆ្នាំ ២០១៤ បានបន្តដំណើរទៅមុខយឺត ជាមួយគុណវិបត្តិដ៏ច្រើនដែកជាឧបសគ្គ និងរារាំងដល់ជំហាននៃដំណើរការឆ្ពោះទៅកាន់ប្រជាធិបតេយ្យ។ ចំណែកការប្រើប្រាស់ធនធានរដ្ឋមានភាពមិនប្រក្រតី រួមទាំងប្រព័ន្ធផ្សព្វផ្សាយរបស់រដ្ឋ ជាពិសេសទូរទស្សន៍(ទទក) បម្រើផលប្រយោជន៍ឲ្យគណបក្សកាន់អំណាច៕
សរសេរមកកាន់លោក ឡាយ សាមាន តាមរយៈsamean@vodhotnews.com
king dumb of in-justic king dumb of corruption king dumb of rubbish’place king dumb of puppet king dumb of leech king dumb of communist king dumb of dictator king dumb of vampire king dumb of people’tear.king dumb of cambodia led by veitrcong’dog.people must wake up and if the leech give a sarong or small bag of seasoning just take it but vote to CNRP .GOD bless all cambodian people’