ដោយ៖ ឡាយ សាមាន | ថ្ងៃសៅរ៍ ទី18 មេសា 2015
http://vodhotnews.com
ក្នុងរយៈពេល៣ថ្ងៃនៃពិធីបុណ្យចូលឆ្នាំប្រពៃណីខ្មែរ អាជ្ញាធរថៃបានចាប់បញ្ជូនពលករខ្មែរមកកម្ពុជាវិញមានចំនួន ៣៤៧ នាក់ រួមទាំងកុមារផងដែរ ។
យោងតាមរបាយការណ៍របស់នាយកដ្ឋានសរុប-ផែនការ នៃអគ្គស្នងការដ្ឋាននគរបាលជាតិ ចុះថ្ងៃទី១៧ ខែមេសា ឲ្យដឹងថា ក្នុងរយៈពេល ៣ថ្ងៃ ពោលថ្ងៃទី ១៤ ដល់ថ្ងៃទី ១៦ មេសា មានពលករខ្មែរសរុបចំនួន ៣៤៧នាក់ ត្រូវបានភាគីថៃចាប់បញ្ជូនឲ្យត្រឡប់មកវិញ ក្នុងនោះប្រុស១៩៩ នាក់ ស្រី១២០នាក់ និងកុមារ ២៨នាក់ ។
គួរបញ្ជាក់ថា កាលពីឆ្នាំ២០១៤ អាជ្ញាធរថៃធ្លាប់ចាប់បញ្ជូនពលករខ្មែរខុសច្បាប់ និងស្របច្បាប់ប្រមាណ២៥ម៉ឺននាក់ មកស្រុកកំណើតវិញ ដោយដឹកតាមរថយន្តទ្រុងមកទម្លាក់ចោលនៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ឧត្តរមានជ័យ បាត់ដំបង និងខេត្តប៉ៃលិន ។ ចំណាត់ការនេះ អាជ្ញាធរយោធាថៃធ្វើឡើងក្រោមហេតុផលពង្រឹងការអនុវត្តច្បាប់ ក្នុងប្រទេស និងចៀសវាងការជួញដូរមនុស្ស ៕
សរសេរមកកាន់លោក ឡាយ សាមាន តាមរយៈsamean@vodhotnews.com