ដោយ៖ ណាត សុភាព | ថ្ងៃចន្ទ ទី20 មេសា 2015
http://vodhotnews.com
ស្តាប់សំឡេង៖ |
ចម្លងទុក |
ប្រជាពលរដ្ឋប្រកបមុខរបរលក់ដូរនៅឆ្នេរអូរឈើទាល ខេត្តព្រះសីហនុ ប្រមាណ៣២នាក់ នៅថ្ងៃចន្ទនេះបានយកញត្តិដាក់ទៅរដ្ឋសភាឲ្យជួយអន្តរាគមន៍ទៅអាជ្ញាធរខេត្ត ដោយសារអាជ្ញាធរបានចេញសេចក្តីជូនដំណឹងឲ្យពួកគេរុះរើតូបចេញពីតំបន់នោះ ។
តំណាងប្រជាពលរដ្ឋនៅឆ្នេរអូរឈើទាល អ្នកស្រី ភឿក សុខេន ប្រាប់ VOD នៅថ្ងៃនេះថា រៀងរាល់ថ្ងៃអាជ្ញាធរបានសហការជាមួយនឹងក្រុមហ៊ុន សុខ គង់ ដែលវិនិយោគនៅតំបន់នោះ ដោយបិទផ្លូវមិនឲ្យភ្ញៀវទេសចរណ៍ជិះរថយន្ត ម៉ូតូ ចូលទៅតំបន់ពួកគេលក់ដូរនោះទេ គឺមានតែអ្នកថ្មើជើងតិចតួចតែប៉ុណ្ណោះ ដែលចូលទៅជួលតូប និងទិញម្ហូបពួកគេ ។
អ្នកស្រី ភឿក សុខេន បញ្ជាក់ថា ដោយសារអាជ្ញាធរនិងក្រុមហ៊ុនធ្វើបែបនេះ ទើបពួកគាត់ឡើងមករដ្ឋសភា ដើម្បីស្នើសុំប្រធានសភាលោក ហេង សំរិន ជួយអន្តរាគមន៍ទៅអាជ្ញាធរខេត្តនេះ ឲ្យឈប់រារាំងប្រជាពលរដ្ឋដែលកំពុងលក់ដូរនៅតំបន់ឆ្នេរអូរឈើទាលនោះ ។
ប្រភពដដែលឲ្យដឹងទៀតថា នៅរសៀលថ្ងៃចន្ទនេះប្រធានរដ្ឋសភា លោក ហេង សំរិន បានទទួលយកញត្តិពីអាជីវករទាំងនោះ ព្រមទាំងបានបោះត្រាលើញត្តិនោះ ដោយឲ្យអាជ្ញាធរខេត្តព្រះសីហនុផ្អាកការរុះរើតូបរបស់ប្រជាពលរដ្ឋនៅតំបន់នោះផងដែរ ។
ប៉ុន្តែ VOD មិនអាចសុំការបំភ្លឺពីអភិបាលក្រុងព្រះសីហនុ លោក ជិន សារិន ដែលពលរដ្ឋអះអាងថា ជាអ្នកប្រាប់ឲ្យពលរដ្ឋរុះរើតូបចេញពីតំបន់នោះបានទេ ដោយទូរសព្ទចូលច្រើនដងមិនមានអ្នកទទួល ។ ចំណែក លោក ឈិត សុខន អភិបាលខេត្តនេះអះអាងថាជាប់ប្រជុំ ។
មន្ត្រីសម្របសម្រួលសមាគមអាដហុកប្រចាំខេត្តព្រះសីហនុ លោកស្រី ជាប សុធារី យល់ថា រដ្ឋាភិបាលត្រូវរក្សាតំបន់ឆ្នេរអូរឈើទាលដែលជាទ្រព្យសម្បត្តិរដ្ឋ គឺមិនត្រូវលក់ទៅឲ្យក្រុមហ៊ុនឯកជន ឬឲ្យបុគ្គលណាធ្វើជាកម្មសិទ្ធិផ្តាច់មុខនោះទេ ។ លោកស្រីបញ្ជាក់ថា បើរដ្ឋផ្តល់ទីតាំងនៅតំបន់នោះឲ្យទៅប្រជាពលរដ្ឋប្រកបមុខរបរ អាចធ្វើបានដោយធ្វើជាលក្ខណៈចល័ត មិនត្រូវធ្វើនៅអចិន្ត្រៃយ៍បែបនេះទេ ។
បើតាមក្រុមអាជីវករ នៅឆ្នាំ២០០៦ អាជ្ញាធរខេត្តព្រះសីហនុ បានបណ្ដេញពួកគេចេញពីឆ្នេរអូរឈើទាលម្តងហើយ ដោយយកដីនោះលក់ឲ្យក្រុមហ៊ុនអារីស្តុន បន្ទាប់មកផ្ទេរទៅឲ្យក្រុមហ៊ុន សុខ គង់ ។ ប្រភពដដែលឲ្យដឹងថា ក្នុងរយៈពេលជិត១០ឆ្នាំនេះ ពួកគាត់តវ៉ាជាបន្តបន្ទាប់ ដើម្បីបានប្រកបអាជីវកម្មចិញ្ចឹមជីវិតឡើងវិញ ហើយនៅរយៈពេលចុងក្រោយនេះ អភិបាលខេត្តបានសន្យាថានឹងដោះស្រាយជូនពួកគាត់ ប៉ុន្តែរហូតមកដល់ពេលនេះនៅតែមិនមានដំណោះស្រាយដដែល ទើបពួកគេនាំគ្នាបោះតង់នៅលើដីចាស់របស់ពួកគាត់វិញ ៕
សូមសរសេរមកលោក ណាត សុភាព តាមរយៈ sopheap@vodhotnews.com