ដោយ ជិន ជេដ្ឋា
2015-05-02
RFA
ពលរដ្ឋច្រើនភូមិ នៃឃុំអូរតាប៉ោង ស្រុកបាកាន ខេត្តពោធិ៍សាត់ ត្អូញត្អែរពីបញ្ហាផ្លូវខូចលំបាកធ្វើដំណើរទៅមន្ទីរពេទ្យ សាលារៀន និងដឹកកសិផលជាដើម។ ក្រុមពលរដ្ឋ និងអាជ្ញាធរឃុំអូរតាប៉ោង ខ្លះ ចង់ឲ្យរដ្ឋាភិបាល និងស្ថាប័នពាក់ព័ន្ធ រូតរះស្ថាបនាផ្លូវលំក្នុងមូលដ្ឋាននេះឲ្យបានឆាប់ ដោយសារនៅរដូវវស្សាផ្លូវមានភក់ជ្រាំ និងរអិលលំបាកធ្វើដំណើរខ្លាំង។
ផ្លូវលំក្រាលក្រួសក្រហមប្រវែង ១៧គីឡូម៉ែត្រ តភ្ជាប់ពីផ្លូវជាតិលេខ៥ ត្រង់ចំណុចភូមិអូរតាប៉ោង ទៅដល់ភូមិតាណៃ ជាប់ព្រំប្រទល់ខេត្តបាត់ដំបង ឆ្លងកាត់ភូមិចំនួន១១ នៃឃុំអូរតាប៉ោង បានខូចទាំងស្រុងជាង ២ឆ្នាំហើយ។ ផ្លូវដែលខូចដោយគ្រោះទឹកជំនន់ និងសកម្មភាពដឹកជញ្ជូនកសិផលរបស់ពលរដ្ឋនេះ ធ្លាប់មានមន្ត្រីរដ្ឋាភិបាលសន្យាស្ដារឡើងវិញ ប៉ុន្តែមកដល់បច្ចុប្បន្នមិនទាន់ធ្វើនៅឡើយ។
ប្រជាពលរដ្ឋម្នាក់រស់នៅភូមិស្រះម្កាក់ លោក អែល កាន មានប្រសាសន៍នៅថ្ងៃទី១ ខែឧសភា ថា អ្នកភូមិរង់ចាំមើលការសន្យារបស់មន្ត្រីរដ្ឋាភិបាល និងអាជ្ញាធរមូលដ្ឋាន ដែលថាផ្លូវនេះនឹងស្ដារឡើងវិញក្នុងពេលឆាប់ៗ ប៉ុន្តែពលរដ្ឋត្អូញត្អែរច្រើនឆ្នាំហើយ មិនទាន់ឃើញអនុវត្តតាមការសន្យាសោះ។ លោកថា ផ្លូវនេះបានប៉ះពាល់យ៉ាងខ្លាំងដល់ការធ្វើដំណើរទៅមន្ទីរពេទ្យ សាលារៀន និងដឹកសម្ភារៈកសិកម្ម ឬកសិផលសម្រាប់ពលរដ្ឋក្នុងឃុំរបស់លោក៖ «លំបាកហ្នឹងវាហួសហេតុលំបាកហើយ លោកគ្រូអើយ! ធ្វើដំណើរឡើងទៅផ្លូវជាតិជាតិលេខ៥ វាទៅមិនរួច ដូចម្សិលមិញភ្លៀងអ៊ីចឹងទៅផ្សារអីលិចត្រឹមណាណី។ ចង់ជំរុញ (ធ្វើផ្លូវលំ) ឲ្យលឿន ព្រោះសេវាសុខភាពអីលំបាកណាស់ ដូចថា ឈឺថ្កាត់យប់ព្រលប់អីទៅមិនរួចតែម្ដង។ បើខែប្រាំងអាចទៅរួចគ្រាន់ថាយឺត ដោយសារជង្ហុងយើងចេះតែទៅៗ តែដល់ខែវស្សាដឹងតែទៅលែងទៅរួចបណ្ដោយ»។
ប្រភពពីពលរដ្ឋ និងអាជ្ញាធរឃុំអូរតាប៉ោង បញ្ជាក់ថា ផ្លូវលំប្រវែង ១៧គីឡូម៉ែត្រ មានទំហំទទឹង ៥ម៉ែត្រ គ្មានជើងទេរ ឬប្រឡាយអមសងខាងផ្លូវ បានកសាងតាំងពីឆ្នាំ១៩៩៣ ដោយថវិការបស់ឃុំ។ នៅអំឡុងឆ្នាំ២០០០ ផ្លូវនេះត្រូវបានមន្ទីរអភិវឌ្ឍន៍ជនបទ រាប់បញ្ចូលជាផ្លូវសំខាន់តភ្ជាប់ពីទីរួមខេត្តទៅជនបទ ហើយបានក្រាលក្រួសក្រហមដោយរក្សាទំហំផ្លូវដដែល។ ប៉ុន្តែការស្ដារឡើងវិញនាពេលខាងមុខនេះ នឹងពង្រីកទំហំផ្លូវបន្ថែម ហើយពេលនោះអាចនឹងប៉ះពាល់ដល់ដីស្រែចម្ការ និងដីលំនៅឋានរបស់ពលរដ្ឋចំនួន ១១ភូមិ នៃឃុំអូរតាប៉ោង ស្រុកបាកាន ខេត្តពោធិ៍សាត់ ដែលនៅជាប់មាត់ផ្លូវ។
ឆ្លើយតបបញ្ហានេះ ប្រធានមន្ទីរអភិវឌ្ឍន៍ជនបទខេត្តពោធិ៍សាត់ លោក ហួន បូនិត អល់អែកក្នុងការផ្ដល់បទសម្ភាសន៍ដល់វិទ្យុអាស៊ីសេរី ដោយលោកប្រាប់ថា មិនចង់សម្ភាសតាមទូរស័ព្ទ ប៉ុន្តែលោកថា បច្ចុប្បន្នមានក្រុមហ៊ុនដេញថ្លៃបានលើគម្រោងស្ថាបនាផ្លូវនេះ បានចុះសិក្សារួចហើយ គឺនៅតែថ្ងៃដាក់គ្រឿងចក្រធ្វើប៉ុណ្ណោះ។ ចំពោះទំហំទឹកប្រាក់ និងរយៈពេលនៃការស្ថាបនាផ្លូវរួចរាល់នៅពេលណានោះ លោកបដិសេធមិនបញ្ជាក់ឡើយ៖ «អារឿងនិយាយគាត់ចេះតែនិយាយហើយតាមពិតគ្រោះទឹកជំនន់ឆ្នាំ២០១៣ ដែលវាខូចខាតខ្លាំង។ កត្តាទីមួយ គឺទឹកជំនន់ដែលយើងរងគ្រោះទឹកជំនន់មកពីលើ ហើយអារឿងគ្មានការថែទាំ និងគ្មានការចូលរួមពីអាជ្ញាធរហ្នឹងតែម្ដងឲ្យមានការដឹកលើសទម្ងន់វាមានតែប៉ុណ្ណឹង។ នីតិវិធីលទ្ធកម្មចប់ហើយ ហើយគេនឹងចាត់ចែងខាងក្រុមហ៊ុនដែលដេញថ្លៃបានគេបានចុះមកមើលទីតាំងរួចអស់ហើយ ខ្ញុំបានជូនទៅពីរលើកហើយ»។
យ៉ាងណា មន្ត្រីក្រុមប្រឹក្សា និងជំទប់ទី២ ឃុំអូរតាប៉ោង អះអាងថា រដ្ឋមន្ត្រីក្រសួងរ៉ែ និងថាមពល និងជាតំណាងរាស្ត្រមណ្ឌលខេត្តពោធិ៍សាត់ លោក ស៊ុយ សែម កាលពីឆ្នាំ២០១៤ ធ្លាប់សន្យានៅចំពោះមុខប្រជាពលរដ្ឋឃុំអូរតាប៉ោង ថា ផ្លូវដែលបានខូចខាតនេះ នឹងត្រូវស្ថាបនាឡើងវិញនាចុងឆ្នាំ២០១៥ ឬដើមឆ្នាំ២០១៦ ខាងមុខ ខណៈពលរដ្ឋនៅតាមភូមិជាច្រើនត្រូវការផ្លូវនេះចាំបាច់ ដើម្បីប្រើប្រាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- អ្នកភូមិនៅខេត្តមណ្ឌលគិរីចោទមន្ត្រីកងរាជអាវុធហត្ថវាយកូនឲ្យរបួស
- ពលរដ្ឋខេត្តកំពង់ឆ្នាំងស្នើរដ្ឋាភិបាលអន្តរាគមន៍ជួសជុលផ្លូវលំនិងស្ពានឈើចាស់
- អាជ្ញាធរខេត្តកំពង់ឆ្នាំងព្រមានផាកពិន័យអាជីវករលក់ដូរគ្មានសណ្ដាប់ធ្នាប់
- អាជ្ញាធរខេត្តរតនគិរីសង្គ្រោះគ្រួសារជនជាតិដើមភាគតិចចារ៉ាយជាប់ចោទចេះអាបធ្មប់
- កម្មករត្រឡប់ពីស្វាយរៀងនិងព្រៃវែងត្អូញពីការលំបាកជិះឡានមកភ្នំពេញ
- អាជ្ញាធរខេត្តតាកែវគ្រោងប្រមូលជនវិកលចរិតតាមផ្លូវដាក់ក្នុងវត្តអារាម
- ពលរដ្ឋ១គ្រួសារនៅកំពង់ធំបារម្ភពីសុវត្ថិភាពបន្ទាប់ពីមានការចោទថាចេះធ្វើអំពើ
- ក្រសួងសាធារណការនិងដឹកជញ្ជូនបារម្ភរថយន្តប្រភេទធំៗឆ្លងស្ពានអ្នកលឿង
- ស្នងការខេត្តព្រះសីហនុថ្មីប្ដេជ្ញាបង្ក្រាបបទល្មើសនានានៅខេត្តនេះឲ្យបានជាស្ថាពរ