Wed, 27 May 2015
ឃុត សុភចរិយា
ភ្នំពេញប៉ុស្តិ៍
បន្ទាយមានជ័យៈ អភិបាលខេត្ដបន្ទាយមានជ័យលោក គោស៊ុំ សារឿត កាលពីម្សិលមិញ បានបញ្ជាឲ្យកម្លាំងសមត្ថកិច្ចចុះធ្វើការស្រាវជ្រាវជាបន្ទាន់ ចំពោះករណីប៉ះទង្គិចដោយហិង្សា រវាងក្រុមកម្មករអូសរទេះ និងសមត្ថកិច្ចចម្រុះ នៅមុខការិយាល័យគយ និងរដ្ឋាករ កាលពីថ្ងៃចន្ទ ដែលបានធ្វើឲ្យមានមនុស្សយ៉ាងតិចបួននាក់រងរបួស និងខាតបង់ប្រាក់ចំណូលពន្ធប្រមាណ ១៥០០ លានរៀល។
ការចេញបញ្ជានេះ ធ្វើឡើងបន្ទាប់ពីលោក ង៉ោ ម៉េងជ្រួន អភិបាលក្រុងប៉ោយប៉ែត បានចេញរបាយការណ៍មួយ ដោយចោទប្រកាន់លោក ចៅ វាសនា ជំទប់ទី ២ សង្កាត់ប៉ោយប៉ែត និង លោក ឌិន ពុទ្ធី ប្រធានសមាគមអភិវឌ្ឍន៍សេដ្ឋកិច្ចក្រៅប្រព័ន្ធ និងគូកនមួយចំនួនថា បានដឹកនាំកម្មករអូសរទេះជាង ១០០ នាក់ ធ្វើការតវ៉ា និង បំផុសការញុះញង់បង្កហិង្សា។
លោក សារឿត បានប្រាប់ភ្នំពេញប៉ុស្តិ៍ កាលពីម្សិលមិញ ដោយចាត់ទុករបាយការណ៍នោះថា ជាផ្នែកមួយនៃរបាយការណ៍រដ្ឋបាល សម្រាប់បញ្ជូនជាព័ត៌មានបន្តទៅក្រសួងមហាផ្ទៃ ដើម្បីពិនិត្យ និងចាត់បញ្ជូនមន្ត្រីជំនាញមកសហការស្រាវជ្រាវ បន្ថែមលើករណីនេះ។
លោកបានថ្លែងថា៖ «យើងមិនអាចធ្វើចំណាត់ការណាមួយទៅលើបុគ្គលដែលត្រូវបានចោទក្នុងរបាយការណ៍នោះ ដោយគ្មានភ័ស្ដុតាងបញ្ជាក់ច្បាស់លាស់នោះទេ។ យ៉ាងណាក៏ដោយការផ្ទុះហិង្សានៅក្នុងការតវ៉ាកាលពីថ្ងៃចន្ទ គឺពិតជាមានជនបំផុសព័ត៌មានអុជអាល ដែលយើងចាំបាច់ត្រូវធ្វើការស្រាវជ្រាវ ស៊ើបអង្កេតលើករណីនេះឲ្យបានច្បាស់លាស់ ដើម្បីមានវិធានការតាមផ្លូវច្បាប់»។
កាលពីម្សិលមិញ លោក ចៅ វាសនា ជំទប់ទី ២ សង្កាត់ប៉ោយប៉ែត មកពីគណបក្សសង្គ្រោះជាតិ ដែលរងការចោទប្រកាន់ពីលោកអភិបាលក្រុងប៉ោយប៉ែត ង៉ោ ម៉េងជ្រួន បានច្រានចោលនូវការចោទប្រកាន់នោះ ដោយថ្លែងថា ការមានវត្តមានរបស់លោកនៅកន្លែងកើតហេតុនោះ ក៏ព្រោះលោកជាមន្ត្រីក្រុមប្រឹក្សាសង្កាត់ ដែលត្រូវចុះឃ្លាំមើលអំពីព្រឹត្តិការណ៍នោះ និងជួយសម្របសម្រួលឲ្យមានការដោះស្រាយដោយសន្តិវិធី មិនមែនទៅញុះញង់ដូចការចោទប្រកាន់នោះទេ។
លោកថ្លែងថា៖ «ខ្ញុំយល់ថា របាយការណ៍នោះមានលក្ខណៈលាបពណ៌ មួលបង្កាច់ និងបំភិតបំភ័យ ប៉ុន្តែខ្ញុំមិនបានប្រព្រឹត្តខុសឆ្គងនឹងច្បាប់ ខ្ញុំមិនព្រួយបារម្ភ និងភ័យខ្លាចនោះទេ»។ ជាមួយគ្នានេះ គណបក្សសង្គ្រោះជាតិ កាលពីម្សិលមិញ ក៏បានចេញសេចក្ដីថ្លែងការណ៍មួយផងដែរ ដោយបានស្នើឲ្យមានការស៊ើបអង្កេតដោយឯករាជ្យ និងមិនលម្អៀងចំពោះអំពើហិង្សានេះ។
ការប៉ះទង្គិចកាលពីថ្ងៃចន្ទ រវាងក្រុមកម្មករអូសរទេះ និងសមត្ថកិច្ចចម្រុះ នៅមុខទីស្នាក់ការគយ និងរដ្ឋាករ ក្រុងប៉ោយប៉ែត ដែលនាំឲ្យកម្មករបីនាក់ និងសន្តិសុខម្នាក់រងរបួសធ្ងន់ស្រាល និងខូចរថយន្ត ៨ គ្រឿងរបស់មន្ត្រីគយ និងបែកបាក់ទ្វាររបង និងទ្វារបង្អួចកញ្ចក់នៃអគារទីស្នាក់ការគយ និងរដ្ឋាករនោះ បានកើតឡើងដោយសារមានអ្នកផ្សព្វផ្សាយព័ត៌មានចចាមអារ៉ាមថា កម្មករម្នាក់ឈ្មោះ ម៉ៅ សុន ហៅស្រស់ ដែលសមត្ថកិច្ចនគរបាល និងប៉េអឹមបានវាយឲ្យរងរបួស និងចាប់ដាក់ខ្នោះនោះបានស្លាប់នៅមន្ទីរពេទ្យ។
មកដល់ថ្ងៃអង្គារម្សិលមិញនេះ ជនរងគ្រោះឈ្មោះ ម៉ៅ សុន នោះកំពុងសម្រាកព្យាបាលនៅក្នុងមន្ទីរពេទ្យបង្អែកក្រុងប៉ោយប៉ែតនៅឡើយ តែបានធូរស្រាលបន្តិចហើយ។ នេះបើតាមភរិយារបស់គាត់ គឺអ្នកស្រី រ៉ាន់ ស្រីមុំ។
អ្នកស្រីបានឲ្យដឹងថា៖ «ក្រុមសមត្ថកិច្ចបានមកសួរនាំ និងបានដោះខ្នោះដៃប្ដីរបស់ខ្ញុំហើយ»។
ការផ្ទុះអំពើហិង្សាកាលពីថ្ងៃចន្ទនោះ ត្រូវបានលោក គោស៊ុំ សារឿត អះអាងថា បានបង្កឲ្យមានការខាតបង់នូវចំណូលពន្ធរដ្ឋប្រមាណជាង ១៥០០ លានរៀល ដែលបានមកពីការបង់ពន្ធ លើថ្លៃទំនិញនាំចូលពីប្រទេសថៃ តាមច្រកព្រំដែនអន្តរជាតិប៉ោយប៉ែត។
លោកបានអំពាវនាវដល់កម្មករអូសរទេះទាំងនោះឲ្យមានការសហការជាមួយសមត្ថកិច្ចគយ និងរដ្ឋាករ និងសមត្ថកិច្ចពាក់ព័ន្ធនានាក្នុងការប្រកាសអំពីប្រភេទទំនិញ និងម្ចាស់ទំនិញឲ្យបានច្បាស់លាស់ចៀសវាងការលួចបន្លំមិនព្រមបង់ពន្ធគយឲ្យបានត្រឹមត្រូវចូលរដ្ឋ៕