ដោយ៖ ទូច សុខា | ថ្ងៃសុក្រ ទី29 ឧសភា 2015
http://vodhotnews.com
ក្រសួងសេដ្ឋកិច្ច និងហិរញ្ញវត្ថុ បានចេញសេចក្តីណែនាំមួយឲ្យមន្ត្រីរបស់ខ្លួនប្រើប្រាស់រថយន្តរបស់រដ្ឋឲ្យបានត្រឹមត្រូវ និងមិនត្រូវប្រើប្រាស់នៅក្រៅម៉ោងដែលខ្លួនបំពេញភារកិច្ចនោះទេ។
យោងតាមសេចក្តីណែនាំ ចេញផ្សាយកាលពីថ្ងៃព្រហស្បតិ៍ ក្រសួងសេដ្ឋកិច្ចបានក្រើនរំឭកមន្ត្រីក្រោមឱវាទក្រសួងឲ្យបើកបររថយន្តដែលមានស្លាកលេខរដ្ឋ ដោយគោរពភ្លើងចរាចរណ៍ និងស្លាកសញ្ញាចរាចរណ៍ឲ្យបានត្រឹមត្រូវ។ ក្នុងសេចក្តីណែនាំដដែល ក្រសួងក៏បានណែនាំមន្ត្រីក្រោមឱវាទក្រសួងទាំងអស់មិនត្រូវអនុញ្ញាតឲ្យបុគ្គលដទៃប្រើប្រាស់រថយន្តនេះ ក្នុងគោលបំណងផ្សេងក្រៅពីបំពេញភារកិច្ចរបស់ខ្លួនឡើយ។
សេចក្តីណែនាំដដែលបន្តថា មន្ត្រីដែលប្រើប្រាស់រថយន្តមានស្លាកលេខរដ្ឋទាំងអស់មិនត្រូវបើបររថយន្តទាំងនោះទៅកន្លែងកំសាន្តដូចជា កន្លែងក្លឹបកំសាន្ត កន្លែងខារ៉ាអូខេ និងកន្លែងម៉ាស្យាជាដើម។
អ្នកសម្របសម្រួលបណ្តាញរួបរួមដើម្បីគណនេយ្យភាពសង្គម នៅអាស៊ីបូព៌ា និងប៉ាស៊ីហ្វិក ប្រចាំកម្ពុជាលោក សន ជ័យ មានប្រសាសន៍ថាក្រសួងស្ថាប័ននីមួយៗ ត្រូវចេញសេចក្តីណែនាំឲ្យបានច្បាស់លាស់ទៅមន្ត្រីរបស់ខ្លួនក្នុងការប្រើប្រាស់រថយន្តរបស់រដ្ឋ។ លោកថាការណែនាំ គឺដើម្បីចៀសវាងការដែលមន្រ្តីរបស់ខ្លួនយករថយន្តរដ្ឋទៅប្រើប្រាស់ក្រៅម៉ោងធ្វើការ ដែលអាចធ្វើឲ្យកើតមានទំនាស់ផលប្រយោជន៍ និងខាតបង់ដល់ថវិការបស់រដ្ឋក្នុងការចំណាយលើថ្លៃជួសជុល។
លោក សន ជ័យ បានបន្ថែមថា«ចំណុចហ្នឹងបើនិយាយពីប្រព័ន្ធរបស់រដ្ឋវិញ រដ្ឋខ្វះគោលការណ៍ណែនាំនៃការប្រើប្រាស់ទ្រព្យសម្បត្តិរដ្ឋឲ្យមាននិរន្តរភាព ហើយបើសិនជាកិច្ចការហ្នឹងអនុវត្តបែបនឹងតទៅទៀត នៅតែបណ្តោយឲ្យមានការប្រើប្រាស់ទ្រព្យសម្បតិ្តរដ្ឋសម្រាប់បុព្វហេតុបុគ្គលហ្នឹងទៀត ពេលនោះរដ្ឋនឹងត្រូវប្រឈមនឹងការចំណាយច្រើនទៅលើសម្ភារៈបែបនេះ ហើយអ្វីដែលខាតប្រយោជន៍ គឺប្រជាពលរដ្ឋ នៅពេលដែលយើងចង់ឲ្យមានកញ្ចប់ថវិកាច្រើនសម្រាប់ប្រជាពលរដ្ឋ»។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ឲ្យដឹងថានៅប្រទេសដែលមាននីតិរដ្ឋត្រឹមត្រូវគេមិនអាចយករថយន្តរបស់រដ្ឋទៅប្រើប្រាស់សម្រាប់ប្រយោជន៍ឯកជននោះទេ។ ប៉ុន្តែលោកថានៅប្រទេសកម្ពុជា លោកសង្កេតឃើញមន្ត្រីសាធារណៈរបស់រដ្ឋមួយចំនួនបានយករថយន្តរបស់រដ្ឋមកប្រើសម្រាប់ប្រយោជន៍ផ្ទាល់ខ្លួន។
លោក យឹម សុវណ្ណ ឲ្យដឹងដែរថានៅកម្ពុជាការគ្រប់គ្រងការចេញស្លាកលេខរដ្ឋទៅឲ្យបុគ្គលឯកជនប្រើប្រាស់ក៏នៅតែកើតមានដែរ។ លោកថាករណីបែបនេះអាចធ្វើឲ្យជនទាំងនេះយករថយន្តនោះទៅប្រព្រឹត្តបទល្មើសផ្សេងៗបាន។ លោកស្នើឲ្យក្រសួងពាក់ព័ន្ធរឹតបន្តឹងទៅលើការចេញស្លាកលេខរដ្ឋនេះ៕
សរសេរមកកាន់លោក ទូច សុខា តាមរយៈ sokha@vodhotnews.com
លោករដ្ឋមន្រ្តីត្រូវធ្វើគំរូគេ កំុយករថយន្តរដ្ឋដឹកប្រពន្ឋទៅផ្សារឬដឹកកូនទៅរៀនមិនល្អមើលទេខ្មាស់រាស្រ្ត!