ដោយ៖ ស៊ុន ណារិន | ថ្ងៃសៅរ៍ ទី30 ឧសភា 2015
http://vodhotnews.com
ឧបការីរងក្រសួងការបរទេសសហរដ្ឋអាមេរិក ដែលទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ លោក Scott Busby (រូបភាពព្រីនស្រ្គីនពីវេបសាយក្រសួងការបរទេសអាមេរិក)
ឧបការីរងក្រសួងការបរទេសសហរដ្ឋអាមេរិក ដែលទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ លោក Scott Busby នឹងមកបំពេញទស្សនកិច្ចនៅកម្ពុជា នៅដើមសប្តាហ៍ក្រោយ ដោយគ្រោងនឹងពិភាក្សាលើសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល ដែលរដ្ឋាភិបាលនឹងដាក់ឆ្លងគណៈរដ្ឋមន្រ្តីនៅពេលខាងមុខនេះ។
សេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជា ចេញផ្សាយនៅថ្ងៃទី២៩ខែឧសភា ឲ្យដឹងថាលោក Scott Busbyនឹងមកធ្វើទស្សនកិច្ចនៅប្រទេសកម្ពុជា នៅថ្ងៃទី១ និងទី២ ខែមិថុនា ឆ្នាំ ២០១៥។ សេចក្តីប្រកាសបន្តថានៅក្នុងអំឡុងពេលទស្សនកិច្ចនេះ លោកឧបការីរងនឹងជួបជាមួយមន្រ្តីរាជរដ្ឋាភិបាល និងសង្គមស៊ីវិល ដើម្បីពិភាក្សាបញ្ហាមួយចំនួន ដូចជាសេចក្តីព្រាងច្បាប់សមាគម និងអង្គការក្រៅរដ្ឋាភិបាល សិទ្ធិការងារ និងប្រធានបទផ្សេងទៀតទាក់ទងនឹងសិទ្ធិមនុស្ស។ លោកឧបការីរងនឹងធ្វើសន្និសីទសារព័ត៌មាននៅ ថ្ងៃអង្គារ ទី២ ខែមិថុនា នៅស្ថានទូតសហរដ្ឋអាមេរិក ទាក់ទងនឹងដំណើរទស្សនកិច្ចរបស់លោក។
ដំណើរទស្សនកិច្ចរបស់លោកធ្វើឡើងស្របពេលដែលសង្គមស៊ីវិលកំពុងតែរិះគន់លើសេចក្តីព្រាងច្បាប់សមាគម និងអង្គការក្រៅរដ្ឋាភិបាល ដោយសង្គមស៊ីវិលបានទាមទារឲ្យរដ្ឋាភិបាលបញ្ចេញសេចក្តីព្រាងជាសាធារណៈ ដើម្បីខ្លួនអាចផ្តល់យោបល់។ ដំណើរទស្សនកិច្ចនេះក៏ធ្វើឡើងស្របពេលដែលសហជីពកំពុងតែទាមទារឲ្យរដ្ឋាភិបាលកម្ពុជាបញ្ឈប់ការធ្វើសេចក្តីព្រាងច្បាប់ស្តីពីសហជីព ដោយចាត់ទុកថាច្បាប់នេះនឹងរឹតត្បិតសេរីភាពសហជីព។
អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន ឲ្យដឹងថារដ្ឋាភិបាលនឹងឆ្លងសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល នៅថ្ងៃសុក្រ ទី០៥ ខែមិថុនា សប្តាហ៍ក្រោយ។ លោកបន្តថាប្រសិនបើគណៈរដ្ឋមន្រ្តីមិនមានកែប្រែអ្វី ហើយសម្រេចឆ្លងលើសេចក្តីព្រាងច្បាប់នេះ រដ្ឋាភិបាលនឹងដាក់សេចក្តីព្រាងនេះទៅរដ្ឋសភា ដើម្បីពិនិត្យនៅពីរបីថ្ងៃបន្ទាប់ពីថ្ងៃទី០៥ ខែមិថុនា។
ថ្មីៗនេះ ក្រសួងមហាផ្ទៃបានអះអាងសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលត្រូវបានធ្វើឡើងផ្អែកលើមូលដ្ឋានរដ្ឋធម្មនុញ្ញកម្ពុជា និងកតិកាសញ្ញាអន្តរជាតិ ដោយអំពាវនាវកុំឲ្យមានការព្រួយបារម្ភពាក់ព័ន្ធនឹងការរឹតត្បិតសេរីភាព។
គួររំឭកថា ថ្មីៗនេះ ក្រសួងការបរទេសកម្ពុជាបានផ្ញើលិខិតមួយទៅស្ថានទូតអាមេរិកប្រចាំកម្ពុជា ដោយក្រើនរំឭកលោក វាលៀម ថដ ពីការជ្រៀតជ្រែកកិច្ចការកម្ពុជាពាក់ព័ន្ធនឹងការទិតៀនសេចក្តីព្រាងច្បាប់អង្គការ។ ក្រសួងការបរទេសកម្ពុជាចាត់ទុកថាការរិះគន់នេះមានលក្ខណៈ« ព្រហើនខ្លាំង»។
កាលពីថ្ងៃទី១៩ ខែឧសភា លោកនាយករដ្ឋមន្រ្តី ហ៊ុន សែន បានថ្លែងថារដ្ឋសភាកម្ពុជានឹងអនុម័តច្បាប់នានាតាមការគ្រោងទុក បើទោះជាមានការរិះគន់ពីសំណាក់សង្គមស៊ីវិលនានា និងទូតបរទេសក្នុងដំណើរការអនុម័តច្បាប់អ្វីមួយ។ លោកបានលើកឡើងថាសង្គមស៊ីវិល និងអង្គទូតមិនមែនជាអ្នកអនុម័តច្បាប់នោះទេ ប៉ុន្តែលោកថារដ្ឋាភិបាលស្វាគមន៍នឹងការចូលរួមជាយោបល់។ លោកបានថ្លែងថា«យើងនឹងបន្តចេញច្បាប់តាមដែលការកំណត់របស់យើង ព្រោះមានតែរដ្ឋសភាទេ ដែលមានសិទ្ធិអនុម័តច្បាប់ មិនមែនអង្គការក្រៅរដ្ឋាភិបាល មិនមែនទូតបរទេសទេ ដែលមានសិទ្ធិអនុម័តច្បាប់នោះ។ ពិតមែនហើយ យើងស្តាប់មតិយោបល់ផ្សេងៗពីមជ្ឈដ្ឋាននានា ដើម្បីឈានទៅដល់ការកសាងនូវច្បាប់ ព្រោះច្បាប់មួយវាមិនពាក់ព័ន្ធតែរដ្ឋាភិបាលប៉ុណ្ណោះទេ ប៉ុន្តែវាពាក់ព័ន្ធនឹងតួអង្គទាំងអស់ក្នុងប្រទេស»៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
Very glad to see international communities continue to participate in democratic process of Cambodia. Open minded in learning more about democracy and serving people is the best attitude towards changing ,for betterment of Cambodians and Cambodia.
Samneang
Wait to see what will happen if the Diputy Assistant Secretary of the US visiting Cambodia in the coming day. Does the Cambodian Govt. still stubborn to pass this new controversial law, while the International Community as well as the outside world’s eyes being carefully watched to the stubborn behaviour of Cambodian Govt.
that was important cases that right world community have to intervene . I do not think just HUN SEN leadership came up whit this controversial law. it have to come from their main process of secret leadership in this region. in democracy world if there is no association involve it can be a straight democracy. it mean those leaders or regime can do whatever they think they following democracy policy. it is the attitude of a stubborn person that trying to hole his powers forever. I knew that was an advice from their master it was not come up from this acknowledge leader. peace for all Cambodian