ដោយ៖ ញឹម សុខន | ថ្ងៃអង្គារ ទី30 មិថុនា 2015, 02:37 PM
http://vodhotnews.com
ស្តាប់សំឡេង៖ |
ចម្លងទុក |
អ្នកវិភាគ និងសាស្ត្រាចារ្យប្រវត្តិសាស្ត្រលើកឡើងថា ការដែលវៀតណាមរារាំងពលរដ្ឋខ្មែរ មិនឲ្យទៅពិនិត្យខ្សែបន្ទាត់ព្រំដែន នៅខេត្តស្វាយរៀងនាពេលថ្មីៗនេះបង្ហាញថា ប្រទេសជិតខាងមួយនេះ នូវតែចិញ្ចឹមចិត្តរំលោភយកទឹកដីកម្ពុជា ខណៈអ្នកនយោបាយខ្មែរកំពុងខ្វែងគំនិតគ្នា ពីការកំណត់ខ្សែបន្ទាត់ព្រំដែន ។
កាលពីថ្ងៃទី២៨ ខែមិថុនា ឆ្នាំ២០១៥ តំណាងរាស្ត្រគណបក្សសង្គ្រោះជាតិ លោក រៀល ខេមរិន្ទ្រ និងពលរដ្ឋមួយចំនួនទៀតប្រមាណជា១០នាក់បានរងរបួស ដែលតំណាងរាស្ត្របក្សប្រឆាំងអះអាងថា ក្រុមជនវៀតណាមទាំងនោះមានកាន់ដំបង កាំភ្លើង ចូលមកក្នុងដីខ្មែរជិត៣គីឡូម៉ែត្រ នៅចំណុចភូមិគោកធ្លក ឃុំត្នោត ស្រុកកំពង់រោទិ៍ ខេត្តស្វាយរៀង ហើយវាយលើពលរដ្ឋខ្មែរ ។
សាស្ត្រាចារ្យប្រវត្តិសាស្ត្រនយោបាយ លោក សូ ចន្ថា ឲ្យ VOD ដឹងនៅថ្ងៃទី៣០ ខែមិថុនានេះថា បើគេសិក្សាពីប្រវត្តិសាស្ត្រ ការដែលវៀតណាមរារាំងនេះ លោកថាមិនមែនជារឿងចម្លែកទេ ដែលវៀតណាមធ្លាប់ដណ្តើមយកទឹកដីកម្ពុជាក្រោម និងទីក្រុងចំប៉ាកន្លងទៅ ។
លោក សូចន្ថា យល់ថា សកម្មភាពរារាំងរបស់វៀតណាមលើទឹកដីខ្មែរ ហើយគ្មានកិច្ចអន្តរាគមន៍ ទាន់ពេលពីអាជ្ញាធរខ្មែរដើម្បីទប់ស្កាត់អំពើហិង្សានោះបង្ហាញថា អាជ្ញាកម្ពុជាហាក់ខ្វះស្មារតីការពារបូរណភាពទឹកដី ។ លោកថា «យើងមើលឃើញហើយជាក់ស្តែង សេចក្តីប្រកាសព័ត៌មានរបស់អភិបាលខេត្តស្វាយរៀង ដែលលើកឡើងថា មិនបានជូនដំណឹងទៅអាជ្ញាធរជាមុខ ហើយមិនបានជូនដំណឹងទៅវៀតណាមជាមុន ។ យើងចាំបាច់អី ដែលជូនដំណឹងទៅវៀតណាមព្រោះហ្នឹងជាដែនអធិបតេយ្យភាពកម្ពុជា ។ អ៊ីចឹងវាឆ្លុះបញ្ចាំងថា កន្លែងហ្នឹងអាជ្ញាធរមិនប្រើអ្វីដែលជាកាតព្វកិច្ចរបស់ខ្លួន ក្នុងការការពារនោះទេ វាឆ្លុះបញ្ចាំងកាន់តែច្បាស់ថា អធិបតេយ្យភាពរបស់កម្ពុជា មានតែក្នុងក្រដាសទេ ធាតុពិតគ្មាន» ។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានស្វាគមន៍នឹងគំនិតជាតិនិយម ប៉ុន្តែលោកបានថ្កោលទោសចំពោះហិង្សាដែលបង្ករដោយភាគីទាំងសងខាងនេះ ។ មន្ត្រីជាន់ខ្ពស់រូបនោះ បានអំពាវនាវឲ្យពលរដ្ឋខ្មែរចូលរួមជាមួយរាជរដ្ឋាភិបាលដើម្បីដោះស្រាយបញ្ហាព្រំដែននេះ ។
បណ្ឌិតវិទ្យាសាស្ត្រនយោបាយ លោក សុខ ទូច លើកឡើងថា បូរណភាពទឹកដីគ្មានប្រទេសណា អាចរំលោភបានសូម្បីតែមួយចង្អាម ។ លោកថា បើសិនជាវៀតណាមពិតជាបានចូលមកធ្វើសកម្មភាពលើទឹកដីខ្មែរដូចការអះអាងមែននោះ លោកថាសកម្មភាពនេះបង្ហាញពីអសមត្ថភាពរបស់អាជ្ញាធរព្រំដែនកម្ពុជា ។ ប៉ុន្តែលោកថា បើការលើកឡើងជារឿងមិនពិត នោះជាការបំប៉ោងដើម្បីផលប្រយោជន៍នយោបាយ ។ លោកថា «បើសិនជាប៉ូលីសព្រំដែនធ្វើមិនដឹងមិនឮ ហើយគេមកឈ្លានពានសល់ពីរបីគីឡូម៉ែត្រដូចគេថាមែននោះ អាហ្នឹងជារឿងអាក្រក់បំផុតសម្រាប់អាជ្ញាធរដែលពាក់ព័ន្ធ ។ អ៊ីចឹងយើងត្រូវមានលិខិតរដ្ឋបាលដើម្បីបង្ហាញការពិតទៅប្រជាជន ទៅអាជ្ញាធរដែលពាក់ព័ន្ធ» ។
ប្រធានគណបក្សសង្គ្រោះជាតិ លោក សម រង្ស៊ី ក៏បានថ្កោលទោសករណីវៀតណាម បង្កហិង្សាលើសកម្មជន និងតំណាងរាស្ត្រដែលគ្រាន់តែទៅពិនិត្យព្រំដែននៅខេត្តស្វាយរៀងនោះ ។
ប៉ុន្តែលោក សុខ ទូច យល់ថាភាពចម្រូងច្រាសបញ្ហាព្រំដែនកម្ពុជាវៀតណាមនេះ ទាំងបក្សប្រឆាំង ទាំងបក្សកាន់អំណាចកំពុងតែទាញយកប្រជាប្រិយភាពរៀងៗខ្លួន ។ លោកថាបក្សទាំងពីរគួរតែមានជំហរួមគ្នាលើបញ្ហាព្រំដែនដើម្បីបង្ហាញទៅប្រទេសវៀតណាមថា ខ្មែរកំពុងពួតដៃគ្នាប្រឆាំងនឹងការឈ្លានពាននេះ ។ លោកថា «យើងត្រូវមានមូលដ្ឋានមួយឲ្យច្បាស់លាស់ ថាយើងមានជាតិត្រឹមត្រូវ ទាំងការរស់នៅជាក់ស្តែង ទាំងឯកសារ ទាំងការយល់ព្រមបោះបង្គោលព្រំដែននៅក្នុងទឹកដីរបស់យើង អាហ្នឹងបានយើងមានភាពរឹងមាំជាមួយវៀតណាម ហើយជម្រាបទៅវៀតណាមថា អ្នកកុំបង្កើតប្រវត្តិសាស្ត្រឡើងវិញ នៅក្នុងដំណាក់កាលនេះកម្ពុជាមិនផ្តល់ឱកាសឲ្យអ្នកឯងធ្វើដូចខ្មែរកម្ពុជាក្រោមទៀតទេ» ។
យ៉ាងណាមក៏ដោយ មេដឹកនាំគណបក្សសង្គ្រោះជាតិ បានយកផែនទីខ្នាត១លើមួយរយពាន់ ចំនួន២៦ផ្ទាំង ដែលកម្ពុជាបានតម្កល់ទុកនៅអង្គការសហប្រជាតិ សម្រាប់តតាំងជាមួយវៀតណាមពីការបោះបង្គោលព្រំដែននេះ ។
ចំណែកគណបក្សកាន់អំណាចវិញ បានផ្ញើកំណត់ទូតជាង១០ដងហើយ តវ៉ាចំពោះវៀតណាម ដែលរំលោភបំពានបូរភាពទឹកដីនេះ ប៉ុន្តែមកដល់ពេលនេះវៀតណាមនៅតែមិនទាន់ឆ្លើយតប ៕
សូមសរសេរមកលោក ញឹម សុខន តាមរយៈ sokhorn@vodhotnews.com
ពួក អាចោរ យួនវៀតណាម លួចទឹកដី កម្ពុជា វាមិនហ៊ាន អោយ យើងចូលមើល ទេ ខ្លាចបែកការ !
យើងជាខ្មែរទាំងអស់គ្នា មិនបណ្តោយឪ្យជនបរទេសណាបំពានលើបូរណភាពទឹកដីរបស់យើងទេ។