Fri, 3 July 2015
ប៉ាន់ រិទ្ធា
ភ្នំពេញប៉ុស្តិ៍
ភ្នំពេញ: មហោស្រពភាពយន្តខ្នាតខ្លីចតុមុខ ឆ្នាំ ២០១៥ ឬ CSFF 2015 បានចាប់ផ្តើមទទួលយកស្នាដៃរបស់ផលិតករខ្មែរវ័យក្មេងទៀតហើយ។
សន្និសីទសារព័ត៌មានស្តីពីមហោស្រពភាពយន្តខ្នាតខ្លីចតុមុខឆ្នាំ ២០១៥ ដែលរៀបចំដោយ «កុនខ្មែរ កូនខ្មែរ» សហការជាមួយផលិតកម្ម 802AD នៅឯរោងភាពយន្ត Major Cineplex ផ្សារទំនើបអ៊ីអន កាលព្រឹកថ្ងៃទី ១ ខែកក្កដា ប្រារឰឡើងដើម្បីផ្តល់ឱកាសដល់ផលិតករវ័យក្មេងៗ បញ្ជូនស្នាដៃខ្លួនមកប្រកួតប្រជែងយកពានរង្វាន់ប្រចាំឆ្នាំ ២០១៥ ។
លោក លឹម សុភ័ណ្ឌ អ្នករៀបចំកម្មវិធីមហោស្រព CSFF ប្រាប់ឲ្យដឹងពីលក្ខខណ្ឌ និងដំណើរការនៃការប្រកួតនៅរដូវកាលឆ្នាំ ២០១៥ ថា៖ «បន្ទាប់ពីឆ្លងកាត់បទពិសោធប៉ុន្មានឆ្នាំដែលមានជោគជ័យគួរឲ្យកត់សម្គាល់មកនោះ មហោស្រពភាពយន្តខ្នាតខ្លីចតុមុខក៏បានធ្វើបច្ចុប្បន្នភាពខ្លួនឯងកាន់តែខ្លាំងទ្បើងៗ ខណៈឆ្នាំនេះ CSFF នឹងប្រព្រឹត្តទៅចាប់ពីថ្ងៃទី ០៦ ដល់ទី ០៨ ខែវិច្ឆិកា ឆ្នាំ ២១០៥ ខាងមុខ។ សម្រាប់ភាពយន្តខ្នាតខ្លីនឹងចាប់ផ្តើមទទួលចុះឈ្មោះពីថ្ងៃទី ០១ ខែកក្កដា ដល់ថ្ងៃទី ១ ខែកញ្ញា ឆ្នាំ ២០១៥។ បេក្ខជនជាផលិតករត្រូវបង្កើតជាក្រុមខ្លួនហើយការថតរឿងខ្លីៗមិនអាចលើស ៣០ នាទីឡើយ»។
ការផ្តល់ឱកាសដល់ផលិករវ័យក្មេងដែលមានទេពកោសល្យផលិតភាពយន្តខ្នាតខ្លីតាមរយៈការប្រកួតប្រជែងយកពានរង្វាន់នេះជាមហោស្រពភាពយន្តខ្នាតខ្លីដំបូងគេបំផុតនៅកម្ពុជាចាប់តំាងពីឆ្នាំ ២០១២ ។
លោក សុខ វិសាល នាយករៀបចំកម្មវិធី និងជាចាងហ្វាងផលិតកម្ម 802AD ដែលធ្លាប់បានដឹកនាំរឿងប្រភេទខ្នាតវែងរឿង «គ្រាប់ពេជ្រ» នោះថ្លែងថា៖ «យើងព្យាយាមត្រួសត្រាយផ្លូវដល់ក្រុមផលិតករវ័យក្មេងខ្មែរដោយផ្តល់ឱកាសពួកគេបង្ហាញសមត្ថភាព។ ពួកគេក៏មានឱកាសជួបតួអង្គសំខាន់ៗក្នុងវិស័យភាពយន្តទាំងក្នុងស្រុក និងក្រៅស្រុកដែរ»។
កាលពីឆ្នាំមុន CSFF ទទួលបានរឿងខ្លី ៦០ រឿងមកពីកម្ពុជា និងជុំវិញពិភពលោកដែលគាំទ្រដោយស្ថាប័នជាង ១៥ រួមមានក្រសួងព័ត៌មាន និងនាយកដ្ឋានភាពយន្ត។ ក្រៅពីនេះគេក៏ឃើញមានការរៀបចំនូវកម្មវិធី «ជំរំភាពយន្ត» ដែលមានអ្នកចូលរួមជាង ៥០០ រូប និងវាគ្មិនជាង ២០ រូប។
កម្មវិធី Film Camp Marathon នៅក្រុងភំ្នពេញក៏បានបណ្តុះបណ្តាលបេក្ខជន ២១ រូបដែលផលិតបាន ៣ រឿង មានរយៈពេល ៥ នាទី។ ចំណែក Film Camp Trip នៅកោះរ៉ុង ផលិតបាន ៦ រឿង មានរយៈពេល ៣ នាទី ដឹកនំាដោយអ្នកចូលរួមចំនួន ២៤ រូប។
ពានរង្វាន់ឆ្នាំនេះមានពីរប្រភេទ គឺពានរង្វាន់ Festival Award ដែលសម្រេចដោយក្រុមគណៈកម្មការផ្តល់ពិន្ទុ និង Audience Award សម្រេចដោយក្រុមទស្សនិកជនផ្ទាល់៕