ដោយ៖ ឡាយ សាមាន | ថ្ងៃចន្ទ ទី6 កក្កដា 2015, 05:56 PM
http://vodhotnews.com
ស្តាប់សំឡេង៖ |
ចម្លងទុក |
ពលរដ្ឋខ្មែរដែលរស់នៅភូមិជើង ឃុំជាំ ស្រុកមេមត់ ខេត្តត្បូងឃុំ អះអាងថា ទាហានវៀតណាមបានចូលមកដកដំណាំពួកគាត់ជាថ្មីទៀតនៅម្តុំជាំប្រាំល្វែង កាលពីសប្តាហ៍មុន។
អ្នកស្រី ភី ស្រីណា ជាម្ចាស់ដំណាំរៀបរាប់ទាំងអួលដើមកថា កាលពីថ្ងៃទី៤ ខែមិថុនា វេលាម៉ោង៨ព្រឹក ទាហានវៀតណាមមានគ្នា៣នាក់ ប្រដាប់ដោយកាំភ្លើង និងដំបងឆក់ ចូលមកដកដំណាំគាត់នៅចំណុចជាំប្រាំល្វែង ដែលអ្នកស្រីអះអាងថាដីរបស់ខ្មែរតាំងពីដូនតា។ អ្នកស្រីបន្តថា បន្ទាប់ពីហេតុការណ៍នោះគាត់បានប្តឹងទៅអាជ្ញាធរឃុំដើម្បីជួយអន្តរាគមន៍។ អ្នកស្រីបញ្ជាក់ថា «ខ្ញុំខឹងណាស់ ខ្ញុំឈឺចាប់ណាស់ ខ្ញុំមិនមែនដាំលើដីយួនទេ ខ្ញុំដាំលើដីរបស់ខ្ញុំពិតប្រាកដ បើខ្ញុំទៅបាញ់ថ្នាំចូលដីមានជម្លោះនោះ ក្មួយមកនោះនឹងឃើញហើយ ខ្ញុំធ្វើដីគោកទេ។ ប្រជាពលរដ្ឋដាំអីអត់កើតទេ សូម្បីដំណាំននោង ពពាយ ក៏វាមកដកបំផ្លាញដែរ។ ខ្ញុំដាំដីគោក ក្បែរស្រះខ្ញុំនេះ ។ អ៊ីចឹងខ្ញុំអត់ហ៊ានថា សូមអំពាវនាវដល់រដ្ឋាភិបាលឲ្យជួយខ្ញុំផង។ យួនរុករាន ខ្ញុំថាប្រជាពលរដ្ឋខ្មែរមិនដែរចង់រករឿងជាមួយយួនទេ តែយួនមករុករាន សូម្បីខ្ញុំដាំអីបន្តិចបន្តួចក៏អត់នៅដែរ សូម្បីននោងមួយគុម្ពពីរគុម្ពក៏អត់នៅដែរ»។
ទោះយ៉ាងណាក៏ដោយ អ្នកស្រី ភី ស្រីណា អំពាវនាវដល់រដ្ឋាភិបាលឲ្យយកចិត្តទុកពលរដ្ឋខ្មែរដែលរស់នៅតាមបន្ទាត់ព្រំដែន ជាពិសេសពួកគាត់ដែលរស់នៅភូមិជើងដោយអះអាងថា វៀតណាមចូលដកដំណាំពួកគាត់ជារឿយៗ។ បើតាមពលរដ្ឋរូបនេះ ទាហានវៀតណាមមិនត្រឹមតែដកដំណាំគ្រួសារគាត់នោះទេ គឺថែមដកដំណាំរបស់គ្រួសារដទៃផងដែររួមមាន ដើមធូរេន ម្រេច និងវល្លិ៍ធម្មជាតិជាដើម។
សមាជិកក្រុមប្រឹក្សាស្រុកមេមត់លោក គង់ សំអាន ចាត់ទុកទង្វើរបស់ទាហានវៀតណាមនាពេលនេះ ជាការឈ្លានពានអធិបតេយ្យភាពកម្ពុជា។ យ៉ាងណាក៏ដោយ លោកស្នើឲ្យអាជ្ញាពាក់ព័ន្ធទប់ស្កាត់ករណីនេះ ធ្វើយ៉ាងណាធានាថា ដំណាំរបស់ពលរដ្ឋមិនត្រូវបានទាហានវៀតណាមចូលបំផ្លាញម្តងហើយម្តងទៀត។ លោកថា «អាហ្នឹងជាការរំលោភបំពានហើយ ដោយសំដីរបស់ថ្នាក់ដឹកនាំយើង គាត់និយាយថា ដីរបស់គេអ៊ីចឹងវាធ្វើឲ្យចេះតែរំលោភមកបន្តទៀត វាអត់ខ្លាចញញើតអីទេ ណាមួយប៉ូលីសយើងសព្វថ្ងៃ ខ្ញុំមើលទៅអត់មានកាំភ្លើងកាន់ផងហ្នឹង ហើយបើខាងគេមានកាំភ្លើងស្ពាយដើរ»។
បើតាមលោក គង់ សំអាន កាលពីព្រឹកមិញវេលាម៉ោង៩ព្រឹក ខាងជំទប់ទី១បានធ្វើរបាយការណ៍នេះជូនអភិបាលស្រុករួចរាល់ហើយ។
ទាក់ទងនឹងករណីនេះ អភិបាលស្រុកមេមត់ លោក ចេង ប៊ុណ្ណារ៉ា ប្រាប់ VOD ថាលោកមិនទាន់បានទទួលរបាយការណ៍នោះទេ។ តែលោកថានៅពេលទទួលបាន លោកនឹងមានវិធានការតាមក្រោយ។ លោកបញ្ជាក់ថា «ចាំមើលខ្ញុំស្រាវជ្រាវមើលយ៉ាងម៉េច អត់មានអ្នកណារាយការណ៍មកទេ។ ចាំមើលរបាយការណ៍គេមកសិន ចេះតែបញ្ជូនៗទៅ ប្រុងឲ្យវ៉ៃគ្នាឬយ៉ាងម៉េច?»។
កាលពីថ្ងៃទី១៩ ខែមេសា ឆ្នាំ ២០១៥ កម្លាំងសមត្ថកិច្ចវៀតណាមក៏បាននាំពលរដ្ឋខ្លួនចុះធ្វើសកម្មភាពបាញ់ថ្នាំពុលបំផ្លាញដំណាំរបស់កសិករខ្មែរ នៅភូមិជើង ឃុំជាំ ស្រុកមេមត់ ខេត្តត្បូងឃ្មុំផងដែរ។
ករណីនោះមន្ត្រីជាន់ខ្ពស់រដ្ឋាភិបាលកម្ពុជា លោក ហោ ណាំហុង និងលោក វ៉ា គឹមហុង អះអាងថា ដីដែលអាជ្ញាធរវៀតណាមបាញ់ថ្នាំពុលបំផ្លាញដំណាំកសិករខ្មែរនោះជាដីរបស់វៀតណាម ដែលភាគីទាំងពីរបានព្រមព្រៀងគ្នាតាំងពីឆ្នាំ២០១១។ លោកថា អ្នកភូមិទាំងនោះទើបនឹងទៅធ្វើស្រែចម្ការ លើដីវៀតណាមនៅឆ្នាំ២០១៥នេះ។
ទោះជាយ៉ាងនេះក្តី ពលរដ្ឋខ្មែរអះអាងថា ដីដែលវៀតណាមចូលបាញ់ថ្មាំពុលបំផ្លាញដំណាំនោះ ជាដីរបស់ខ្មែរតាំងពីដូនតាមកម្ល៉េះ៕
សូមសរសេរមកលោក ឡាយ សាមាន តាមរយៈ samean@vodhotnews.com