លោកតា ស៊ិន ស៊ាត លើកដៃប្រណម្យសំពះសុំជំនួយពីសប្បុរសជនដើម្បីព្យាបាលប្រពន្ធ។ រូបថត សហការី
Wed, 29 July 2015
ស៊ូ វុទ្ធី
ភ្នំពេញប៉ុស្តិ៍
កំពង់ធំ: ពុំមានឱកាសបានស្គាល់ឡើយវត្តវ៉ា ថ្ងៃសីល ៨ កើតខ្នើតរនោច ថ្ងៃកោរ ឬពេញបូណ៌មីខែដាច់អីនោះ។ ពីរនាក់ប្តីប្រពន្ធតា វ័យ ៧០ ឆ្នាំយាយ វ័យ ៧៥ ឆ្នាំ មានតែកម្លាំងជរាទទីមទទើមធ្វើការក្នុងចម្ការដំឡូងប្តូរបានត្រឹមតែបាយមួយថ្ងៃក៏សឹងមិនបានពេញក្រពះ។ ប៉ុន្តែអនិច្ចាទេវតាមើលរំលងកូនក៏គ្មានសល់មួយគ្រាប់ទ្រព្យក៏ខ្សត់ពេលនេះយាយក៏ធ្លាក់ខ្លួនឈឺរង់ចាំតែថ្ងៃស្លាប់។
លោកតា ស៊ិន ស៊ាត វ័យ ៧០ឆ្នាំ និងលោកយាយ ឈីន ឆាន អាយុ ៧៥ ឆ្នាំទាំងពីរនាក់ប្តីប្រពន្ធភ្នែកស្រវាំងស្តាប់មិនសូវឮ ដើរអូសអាត្មាមិនចង់រួចរស់ដោយការស៊ីឈ្នួលកាប់ឆ្ការព្រៃដាំដំឡូង និងចាំដីឲ្យគេក្នុងព្រៃជ្រៅដាច់ឆ្ងាយពីភូមិឋានអ្នកស្រុកលើភូមិសាស្រ្តឃុំបឹងល្វា ស្រុកសន្ទុក ខេត្តកំពង់ធំ យប់ព្រលប់ក្តៅរងាភ្លៀងខ្យល់អាស្រ័យក្នុងខ្ទមតូចធ្លុះធ្លាយម៉ង់ៗដូចសត្វព្រៃ។
រៀបរាប់ពីជីវិតកម្សត់ពីរនាក់ប្ដីប្រពន្ធនេះស្រ្តីឈ្មោះ ឯក ស្រីល័ក្ខណ៍ ប្រាប់ថា៖ «ជាង ១០ ឆ្នាំហើយដែលតាយាយស៊ីអត់ស៊ីឃ្លានទ្រាំរស់នៅម៉ង់ៗតែក្នុងចម្ការដំឡូងធ្វើស្មៅថែដំឡូងឲ្យគេបានមួយថ្ងៃរស់មួយថ្ងៃដោយគ្មានសាច់ញាតិហើយកូនៗចាកចោលទៅធ្វើការនៅប្រទេសថៃជាង ១០ ឆ្នាំបាត់ដំណឹងឈឹង»។
លោកយាយ ឆាន បានអ្នកជិតខាងនាំមកព្យាបាលនៅមន្ទីរពេទ្យដែលត្រូវការប្រាក់វះកាត់។ រូបថត សហការី
បដិសេធមិនមានជាប់សាច់ឈាមយាយតា ស្រីល័ក្ខណ៍ បន្តថា៖ «យូរៗ យាយតាចេញពីព្រៃម្តងមករកទិញអង្ករ ប្រហុក អំបិល ទឹកត្រីយកទុកបរិភោគហើយពេលនោះខ្ញុំក៏អាណិតក៏ចេះតែឲ្យទៅ។ នឹកឃើញថាកាលពីម្តាយឪពុកខ្ញុំនៅមានជីវិតពួកគាត់រាប់អានហើយពេលនេះឃើញយាយធ្លាក់ខ្លួនឈឺ ខ្ញុំជួយនាំគាត់មកពេទ្យ»។
អ្នកភូមិចិត្តធម៌រូបនេះបានបញ្ជាក់ថា៖ «យាយ ឆាន ធ្លាក់ខ្លួនឈឺច្រើនខែហើយ ហើយគាត់មានជំងឺទឹកដក់ក្នុងសួតដែលត្រូវការប្រាក់ព្យាបាល។ ខ្ញុំនាំគាត់មកសម្រាកព្យាបាលនៅពេទ្យរុស្ស៊ីជិត ២ ខែហើយពេលនេះនាំចេញមកសម្រាកផ្ទះបងស្រីនៅម្តុំទួលគោក»។
យ៉ាងណាមិញ ស្រីល័ក្ខណ៍ បានឲ្យដឹងថា៖ «ជិតពីរខែមកនេះខ្ញុំសុខចិត្តទុកមុខរបរ ទុកកូន ទុកប្តីមួយអន្លើរ នាំយាយ ឆាន មកសម្រាកព្យាបាល និងចេញលុយថ្លៃព្យាបាលទៀត។ ប៉ុន្តែជំងឺគាត់នៅតែស្ថិតក្នុងដំណាក់កាលពិបាកសង្គ្រោះទៀតសង្ឃឹមតិចណាស់»។
ស្រីចិត្តធម៌ដែលពិបាកមើលទុក្ខវេទនារបស់ដូនចាស់ឈឺជរារូបនេះបាននិយាយបន្ដទៀតថា៖ «តាមគ្រូពេទ្យប្រាប់មកថាជំងឺគាត់មានតែវះកាត់ទេទើបអាចសង្គ្រោះជីវិតបាន។ ប្រសិនបើមិនវះកាត់ទេគាត់មានសង្ឃឹមតិចណាស់មានតែនាំយកធាតុទៅជួបតារង់ចាំនៅចម្ការដំឡូងវិញទេ»៕
សូមអរគុណបងស្រីមានសន្តានចិត្តល្ងណាស់។សូមគាំទ្របងស្រីចុះកាកបាតក្រហមទៅណាអស់ហើយ????មេត្តាជួយដល់លោកតានិងលោកយាយផង៕
អង្គការច្រើនណាស់ តើមានអង្គការណាអាចជួយរំលែកការលំបាករបស់គាត់បានដែរឬទេ?