ដោយ ដែន អយុធ្យា
2015-08-01
RFA
អាណាព្យាបាលកុមារីរងគ្រោះករណីរំលោភផ្លូវភេទ ដែលមានជនជាប់ចោទជាមន្ត្រីនគរបាលខេត្តព្រះសីហនុ អះអាងថា កូនស្រីអាយុ ១១ឆ្នាំរបស់គាត់បានរង់ចាំយុត្តិធម៌ពីប្រព័ន្ធតុលាការ ដែលអូសបន្លាយពេលច្រើនឆ្នាំមកហើយ ប៉ុន្តែមិនទាន់មានដំណោះស្រាយ។
បទល្មើសនេះ ត្រូវឪពុកកុមារីរងគ្រោះ និងមន្ត្រីសង្គមស៊ីវិលអះអាងថា ជនល្មើសរំលោភផ្លូវភេទអនីតិជន ដែលមន្ត្រីប៉ូលិសរូបនោះមិនត្រូវនៅមានសេរីភាពក្រៅសំណាញ់ច្បាប់ និងកំពុងបន្តការងារនៅស្នងការដ្ឋាននគរបាលខេត្តព្រះសីហនុ ជាធម្មតាបែបនេះឡើយ។
ឪពុកកុមារីរងគ្រោះ គឺលោក យ៉ុង ប៊ុនលី មានលំនៅឋានក្នុងក្រុមទី៩ ភូមិ៣ សង្កាត់៣ ក្រុង និងខេត្តព្រះសីហនុ បានប្រាប់វិទ្យុអាស៊ីសេរី នៅថ្ងៃសុក្រ ទី៣១ ខែកក្កដា ថា គ្រួសារគាត់បានទន្ទឹងរង់ចាំតុលាការខេត្តព្រះសីហនុ ជួយរកយុត្តិធម៌ជូនកូនស្រីអស់រយៈពេល ៥ឆ្នាំមកហើយ នៅពេលដែលជនសង្ស័យនៅមានសេរីភាព។
លោកឲ្យដឹងថា កូនស្រីរបស់លោកដែលទើបមានអាយុ ១១ឆ្នាំ ត្រូវឈ្មោះ កង សុផាត ជាមន្ត្រីនគរបាលផ្នែកការិយាល័យកណ្ដាលសន្តិសុខផ្ទៃក្នុងនៃស្នងការដ្ឋាននគរបាលខេត្តព្រះសីហនុ ចាប់រំលោភកាលពីថ្ងៃទី១៥ ខែសីហា ឆ្នាំ២០១០។ ប៉ុន្តែគិតមកដល់ថ្ងៃទី៣១ ខែកក្កដា ឆ្នាំ២០១៥ ជនសង្ស័យនៅមានសេរីភាពដើរហើរ និងប្រកបការងារដូចធម្មតា នៅក្រៅសំណាញ់ច្បាប់។
ឪពុកកុមារីរងគ្រោះបានស្នើដល់ស្ថាប័នពាក់ព័ន្ធ ពិសេសលោកនាយករដ្ឋមន្ត្រី ហ៊ុន សែន និងភរិយា ជួយអង្កេតតាមដានដំណើរការក្តីលើសំណុំរឿងព្រហ្មទណ្ឌរំលោភផ្លូវភេទដែលជនប្រព្រឹត្តល្មើសឈ្មោះ កង សុផាត ដើម្បីផ្ដល់យុត្តិធម៌ជូនកូនស្រីអាយុ ១១ឆ្នាំ ដែលត្រូវជនល្មើសរូបនេះល្បួងរំលោភ៖ «ខ្ញុំរង់ចាំរកយុត្តិធម៌ជូនកូនស្រីខ្ញុំ ៥ឆ្នាំមកហើយ ហើយឥឡូវតុលាការបានប្រកាសសាលក្រមរួចហើយដែរ ប៉ុន្តែជនល្មើសកំពុងរស់នៅក្រៅឃុំដដែល។ សូមវិទ្យុអាស៊ីសេរី ជួយផ្សព្វផ្សាយដើម្បីឲ្យរឿងក្តីមួយនេះ បានឮដល់សម្ដេច ហ៊ុន សែន និងលោកជំទាវគតិព្រឹទ្ធបណ្ឌិត ប៊ុន រ៉ានី ជួយរកយុត្តិធម៌ជូនកូនស្រីខ្ញុំផង»។
វិទ្យុអាស៊ីសេរី មិនទាន់អាចសុំការបំភ្លឺទៅលើសំណុំរឿងព្រហ្មទណ្ឌ ចុះថ្ងៃទី១៨ ខែសីហា ឆ្នាំ២០១០ ពីលោក ម៉ុង មុន្នីចរិយា ប្រធានតុលាការសាលាដំបូងខេត្តព្រះសីហនុ បានទេ នៅថ្ងៃសុក្រ ទី៣១ ខែកក្កដា។ ឯកសារតុលាការសាលាដំបូងខេត្តនេះបានបង្ហាញថា សំណុំរឿងនេះសមាសភាពចៅក្រមជំនុំជម្រះក្តីមាន លោក ម៉ុង មុន្នីចរិយា លោក គឹម អេង និងលោក លិ សុខា ហើយលោក យូ ទិត្យវឌ្ឍនៈ ជាតំណាងអយ្យការ ហើយថា សំណុំរឿងនេះ ក្រោយឆ្លងកាត់សវនាការជំនុំជម្រះក្តីជាបន្តបន្ទាប់ទៅលើសំណុំរឿងព្រហ្មទណ្ឌរំលោភសេពសន្ថវៈអនីតិជនប្រព្រឹត្តនៅភូមិ៣ សង្កាត់៣ កាលពីថ្ងៃទី១៥ ខែសីហា ឆ្នាំ២០១០ តុលាការក៏បានប្រកាសសាលក្រមសំណុំរឿងនេះ កាលពីថ្ងៃទី៩ ខែមេសា ឆ្នាំ២០១៥ ដោយកាត់ឲ្យជនត្រូវចោទឈ្មោះ កង សុផាត តួនាទីជាមន្ត្រីប៉ូលិសខេត្តព្រះសីហនុ មានទោសជាប់គុក ៥ឆ្នាំ និងពិន័យប្រាក់ ៤០លានរៀលទៅឲ្យកុមារីរងគ្រោះ។
ទោះយ៉ាងណា ឪពុកកុមារីរងគ្រោះ លោក យ៉ុង ប៊ុនលី បញ្ជាក់ថា រហូតមកដល់ថ្ងៃទី៣១ ខែកក្កដា ជនល្មើសបន្តនៅមានសេរីភាព និងបម្រើការងារជាធម្មតា ហើយគ្រួសារលោកមិនទាន់ទទួលបានសំណងអ្វីទេ។ រីឯតុលាការសាលាដំបូងខេត្តព្រះសីហនុ ទៀតសោត ក៏មិនបានផ្ដល់ ឬប្រគល់សម្រង់សាលក្រមលើសំណុំរឿងព្រហ្មទណ្ឌនេះជូនទេ ទោះបីរូបលោក និងមេធាវីបានធ្វើលិខិតស្នើសុំសម្រង់សាលក្រមនេះ ទុកប្រើប្រាស់ក្នុងភាពចាំបាច់ ឬដាក់ពាក្យបណ្ដឹងទៅកាន់ស្ថាប័នពាក់ព័ន្ធបន្តទៀតបែបណាក្តី៖ «ឥឡូវហ្នឹងពេលខ្ញុំទៅយកសាលក្រមឮថា តុលាការបានប្ដូរបទចោទពីរំលោភសេពសន្ថវៈ ទៅទិញពេស្យាចារកុមារទៅវិញ»។
ទាក់ទិនបញ្ហានេះ អ្នកស្រី ជា សុផល មេធាវីការពារក្ដីឲ្យកុមារីរងគ្រោះ ឈ្មោះ យ៉ុង ជា ឲ្យដឹងដែរថា តុលាការខេត្តព្រះសីហនុ មិនទាន់ផ្ដល់សម្រង់សាលក្រមលើសំណុំរឿងកូនក្តីរបស់ខ្លួនពិតមែន ទោះបីបានដាក់ពាក្យស្នើសុំដើម្បីទុកប្រើប្រាស់បន្តបែបណាក៏ដោយ។ អ្នកស្រីបន្តថា បើគិតពីថ្ងៃប្រកាសសាលក្រមថ្ងៃទី៩ ខែមេសា មកដល់ថ្ងៃទី៣១ ខែកក្កដា មានរយៈពេលជិត ៤ខែទៅហើយ នៅឡើយសម្រង់សាលក្រមសំណុំរឿងព្រហ្មទណ្ឌមួយនេះ តុលាការខេត្តព្រះសីហនុ មិនទាន់ផ្តល់ជូនទេ។
អ្នកស្រីចាត់ទុកភាពយឺតយ៉ាវនៃការផ្ដល់ជូនសម្រង់សាលក្រមលើសំណុំរឿងរំលោភផ្លូវភេទអនីតិជន ដែលមានជនជាប់ចោទឈ្មោះ កង សុផាត ជាមន្ត្រីប៉ូលិសនៃស្នងការនគរបាលខេត្តព្រះសីហនុ ថា ទំនងអាចមានអាថ៌កំបាំងអ្វីមួយនៅពីក្រោយសាលក្រមនេះ៖ «សំណូមពរឲ្យតុលាការខេត្តព្រះសីហនុ ឆាប់បញ្ចប់នីតិវិធីលើសំណុំរឿងព្រហ្មទណ្ឌមួយនេះឲ្យបានឆាប់ ដើម្បីឲ្យមានយុត្តិធម៌ត្រឹមត្រូវទៅតាមច្បាប់ទៅលើជនរងគ្រោះ ព្រោះថា ករណីនេះខ្ញុំឮព័ត៌មានក្រៅផ្លូវការមកថា សាលក្រមដែលបានប្រកាសកាលពីខែមេសា គឺត្រូវតុលាការប្ដូរបទចោទពីរំលោភផ្លូវភេទអនីតិជន ប្ដូរទៅបទចោទទិញពេស្យាចារកុមារវិញ»។
បញ្ហានេះ មន្ត្រីក្រឡាបញ្ជីតុលាការសាលាដំបូងខេត្តព្រះសីហនុ លោក ទៀង សំណាង ក៏មិនលើកទូរស័ព្ទដើម្បីបំភ្លឺជុំវិញភាពយឺតយ៉ាវនៃការផ្ដល់សម្រង់សាលក្រមលើសំណុំរឿងព្រហ្មទណ្ឌជូនឪពុក ឬមេធាវីកុមារីរងគ្រោះនោះទេ នៅថ្ងៃសុក្រ ទី៣១ ខែកក្កដា។
ត្រង់ចំណុចនេះ មន្ត្រីអង្គការសង្គមស៊ីវិលមួយចំនួនប្រចាំខេត្តព្រះសីហនុ បានលើកជាចម្ងល់ថា បទល្មើសព្រហ្មទណ្ឌរំលោភផ្លូវភេទអនីតិជនមួយនេះ ហេតុអ្វីតុលាការអាចលៃលក ឬក៏អនុញ្ញាតឲ្យជនល្មើសមានសេរីភាពនៅក្រៅមន្ទីរឃុំឃាំងបានទៅវិញ។
បញ្ហានេះ លោក ប៊ួន ណារិទ្ធ មន្ត្រីសម្របសម្រួលអង្គការលីកាដូ ខេត្តព្រះសីហនុ មានមន្ទិលថា ដំណើរការក្តីលើសំណុំរឿងក្តីរំលោភផ្លូវភេទអនីតិជនដែលជនប្រព្រឹត្តល្មើសឈ្មោះ កង សុផាត និងមានតួនាទីជាប៉ូលិស ទំនងជាអាចមានភាពមិនប្រក្រតី ឬសំណូកពុករលួយអ្វីមួយក៏ថាបាន។ មន្ត្រីសិទ្ធិមនុស្សរូបនេះ ស្នើដល់ផ្នែកពាក់ព័ន្ធឲ្យជួយតាមដានដំណើរការលើសំណុំរឿងព្រហ្មទណ្ឌរំលោភផ្លូវភេទកុមារីទើបមានអាយុ ១១ឆ្នាំ ដើម្បីផ្ដល់យុត្តិធម៌ជូនជនរងគ្រោះ ហើយដែលសំណុំរឿងព្រហ្មទណ្ឌមួយនេះ ជនល្មើស ឬជនសង្ស័យ បន្តមានសេរីភាពនៅក្រៅសំណាញ់ច្បាប់ និងប្រកបការងារដូចមនុស្សធម្មតា។
លោក ប៊ួន ណារិទ្ធ៖ «ករណីនេះ អាចជនជាប់ចោទដាក់ពាក្យបណ្ដឹងប្ដឹងទៅសាលាឧទ្ធរណ៍។ ដូច្នេះសំណូមពរដល់តុលាការខេត្តព្រះសីហនុ គួរតែផ្ដល់សម្រង់សាលក្រមជូនគ្រួសារជនរងគ្រោះដើម្បីឲ្យគាត់ពិនិត្យថា តើសាលក្រមនេះអាចទទួលបាយអំពីការវិនិច្ឆ័យរបស់តុលាការខេត្តព្រះសីហនុ ពេលនេះ»។
ចំណែកអ្នកស្រី ជៀប សុធារី មន្ត្រីសម្របសម្រួលសមាគមអាដហុក ខេត្តព្រះសីហនុ ក៏បានចាត់ទុកដំណើរការក្តីរឿងព្រហ្មទណ្ឌមួយនេះថា មានភាពអយុត្តិធម៌ចំពោះកុមារីរងគ្រោះ ព្រោះបទល្មើសកើតតាំងពីខែសីហា ឆ្នាំ២០១០ និងមកដល់ដាច់ខែកក្កដា ឆ្នាំ២០១៥ ដែលមានរយៈពេល ៥ឆ្នាំទៅហើយ នៅឡើយកុមារីរងគ្រោះមិនទាន់ទទួលបានយុត្តិធម៌ទៀត។ ជាងនេះ ជនប្រព្រឹត្តល្មើសឈ្មោះ កង សុផាត ជាមន្ត្រីប៉ូលិស នៅមានសេរីភាពដើរហើរ ឬធ្វើការងារដោយមិនខ្វល់ពីទោសកំហុសរបស់ខ្លួនទេ៖ «សាលក្រមដែលក្រោយប្រកាសយ៉ាងយូរ ១ខែ តុលាការត្រូវផ្ដល់ជូនទៅភាគីលើរឿងក្តីនីមួយៗ។ ប៉ុន្តែតុលាការខេត្តព្រះសីហនុ រហូតដល់មានមេធាវីស្នើសុំសម្រង់សាលក្រមនេះហើយ នៅតែមិនផ្ដល់ជូនទៀត»។
ទាក់ទិនបញ្ហានេះ ឱពុកកុមារីរងគ្រោះបានឲ្យដឹងថា សំណុំរឿងនេះ លោកធ្លាប់ដាក់ពាក្យបណ្តឹងសុំកិច្ចអន្តរាគមន៍ទៅកាន់ថ្នាក់ដឹកនាំស្ថាប័នពាក់ព័ន្ធមួយចំនួន មានអង្គភាពប្រឆាំងអំពើពុករលួយ និងក្រសួងយុត្តិធម៌ជាដើម ដើម្បីស្នើជួយស្រាវជ្រាវ ឬអង្កេតទៅលើសំណុំរឿងព្រហ្មទណ្ឌលេខ ៣១១ ចុះថ្ងៃទី១៨ ខែសីហា ពីឆ្នាំ២០១០ របស់សាលាដំបូងខេត្តព្រះសីហនុ ដើម្បីផ្ដល់យុត្តិធម៌ជូនកូនស្រីមានអាយុ ១១ឆ្នាំ ដែលត្រូវជនល្មើសឈ្មោះ កង សុផាត ចាប់រំលោភយ៉ាងព្រៃផ្សៃ។ ប៉ុន្តែមកដល់ពេលនេះ ជនល្មើសអាចមានលទ្ធភាពរស់នៅក្រៅមន្ទីរឃុំឃាំង និងមានសេរីភាពធ្វើការងារដូចមនុស្សធម្មតា។
នៅក្នុងបទសម្ភាសន៍ជាមួយវិទ្យុអាស៊ីសេរី កាលពីព្រឹកថ្ងៃសុក្រ ទី៣១ ខែកក្កដា ឱពុកកុមារីរងគ្រោះដែលមានសម្បុរខ្មៅ និងរាងកាយស្គមស្គាំង ឈ្មោះ យ៉ុង ប៊ុនលី បានលើកដៃសំពះអំពាវនាវដល់លោកនាយករដ្ឋមន្ត្រី ហ៊ុន សែន និងភរិយា ឲ្យជួយពិនិត្យតាមដានលើសំណុំរឿងព្រហ្មទណ្ឌមួយនេះ ដើម្បីដល់ផ្ដល់យុត្តិធម៌ជូនកូនស្រីអាយុ ១១ឆ្នាំ ដែលត្រូវជនល្មើសឈ្មោះ កង សុផាត ជាមន្ត្រីនគរបាលចាប់រំលោភបានសម្រេច និងកំពុងរស់នៅមានសេរីភាពដោយអនុគ្រោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- CCHR ថ្វាយលិខិតចំពោះព្រះមហាក្សត្រសុំព្រះអង្គមានព្រះរាជតម្រិះលើច្បាប់អង្គការ
- បុរស១៨នាក់ដែលមេខ្យល់ប៉ុនប៉ងនាំទៅចិនទទួលស្គាល់ថាចាញ់បោកមេខ្យល់
- ម៉ុងតាញ៉ាវៀតណាម១៣នាក់ភៀសខ្លួនពីវៀតណាមចូលមកភ្នំពេញ
- ប៉ូលិសបញ្ជូនជនជាតិចិនម្នាក់ទៅតុលាការពីបទជួញដូរខ្មែរ១៨នាក់ទៅធ្វើការនៅចិន
- អង្គការលើកលែងទោសអន្តរជាតិអំពាវនាវឲ្យអាជ្ញាធរដោះលែងសកម្មជនបក្សប្រឆាំង
- អ្នកកាសែតស្ត្រីបារម្ភពីបញ្ហាប្រឈមក្នុងវិស័យសារព័ត៌មាន
- អាដហុកប្រតិកម្មនឹងគណៈមេធាវីដែលចោទសមាគមថាជ្រៀតជ្រែកកិច្ចការមេធាវី
- ទីស្ដីការគណៈរដ្ឋមន្ត្រីប្រតិកម្មនឹងអ្នកនាំពាក្យឧត្តមស្នងការអង្គការសហប្រជាជាតិ
- របាយការណ៍អាមេរិកថាកម្ពុជាពុំបានប្រឹងប្រែងពេញលេញប្រយុទ្ធនឹងអំពើជួញដូរមនុស្ស
មន្ត្រីរបស់ ហ៊ុន សែន សុទ្ធតែពូជថោកទាបដូច ហ៊ុន សែនអញ្ចឹង
ចាប់រំលោភស្រ្តីភេទ ! ក្បត់ជាតិបំផ្លាញទឹកដី ! ពុករលួយលួចជាតិ !
បំផ្លាញព្រៃឈើ រ៉ែ ! និងរឹបអូសប្លន់ដីធ្លីប្រជាជនខ្មែរជាដើម ! ។
The poors rarely receive justice in cambodia.