ដោយ៖ ពៅ មេត្តា | ថ្ងៃពុធ ទី5 សីហា 2015
http://vodhotnews.com
ស្តាប់សំឡេង៖ |
ចម្លងទុក |
(រូបថត៖ ពៅ មេត្តា)
ក្នុងពេលប្រកាសសមាសភាពរចនាសម្ព័ន្ធ បណ្តាញសហគមន៍ព្រៃឈើទូទាំងខេត្ត លោក លី លីម ដែលជាប់ឆ្នោតជាប្រធានបណ្តាញ បានប្រកាសពីគោលបំណងនៃការចងបណ្តាញនេះ គឺដើម្បីទប់ស្តាត់ការកាប់បំផ្លាញព្រៃឈើពីសំណាក់ឈ្មួញ និងទប់ស្តាត់ប្រជាពលរដ្ឋកុំឲ្យរានព្រៃអភិរក្សយកទៅធ្វើស្រែចម្ការ។
រចនាសម្ព័ន្ធបណ្តាញសហគមន៍ព្រៃឈើនៅខេត្តក្រចេះ ចងក្រងជាបណ្តាញពីសហគមន៍ផ្សេងៗគ្នា ទាំងអស់ក្នុងខេត្តមានចំនួន៤៥សហគមន៍។ រចនាសម្ព័ន្ធនេះ បានប្រកាសឡើងកាលពីថ្ងៃទី៣០ ខែកក្កដា ឆ្នាំ២១៥ ដែលមានការចូលរួមពីអាជ្ញាធរដែនដី មន្ត្រីរដ្ឋបាលព្រៃឈើ អង្គការម្ចាស់ជំនួយ រួមទាំងប្រជាសហគមន៍ប្រមាណ៤០ ទៅ៥០នាក់។ ពិធីប្រកាសធ្វើនៅក្នុងឃុំកន្ទួត ស្រុកចិត្របុរី ខេត្តក្រចេះ។
លោក លី លីម បញ្ជាក់ថា រចនាសម្ព័ន្ធនោះកើតឡើង ដោយមានការប្រជុំ និងបោះឆ្នោតមិនមែនចេះតែចាត់តាំងនោះទេ។ លោកថា៖ “អ៊ីចឹងគណៈកម្មការតំណែងសហគមន៍ព្រៃឈើខេត្ត យើងមានរូបភាពបែបនេះ ។ ទី១ ប្រធាន ទី២ អនុប្រធាន ទី៣ យើងរកឃើញថាមានសមាជិក៣ តួនាទីមានលេខាធិការ១ ហិរញ្ញិក១ មានការទំនាក់ទំនង១។ អ៊ីចឹងយើនបោះឆ្នោតទាំងអស់ យើងបានការទទួលស្គាល់ទាំងអស់ នៅក្នុងខេត្ត”។
ប្រធានបណ្តាញសហគមន៍ព្រៃឈើ ដែលទើបទទួលបានតំណែងថ្មីៗនេះបញ្ជាក់ថា លោកបានបញ្ជាក់ទៅសមាជិកទាំងអស់ធ្វើការ សហការជាមួយអាជ្ញាធរ ដើម្បីទប់ស្កាត់បទល្មើសព្រៃឈើ គឺគ្មានសិទ្ធិចាប់ចង ឬទារលុយពីឈ្មួញកាប់ឈើនោះទេ។ លោកថ្លែងថា៖ “គ្រាន់តែជាតំណាងតើ គ្មានបុណ្យស័ក្តិអ្វីសម្រាប់គ្រប់សង្កត់ទៅលើគេមួយស្រុកទេ អត់ទេ ព្រោះខ្ញុំបានប្រជុំរួចស្រេចហើយ ព្រោះតួនាទីរបស់យើងអត់មានត្រូវការ អូហ៍! ចាប់ឈើ ទៅយកលុយ អត់មានទេ”។
បើតាមខ្លឹមសារដែលបានលើកឡើង ក្នុងពិធីប្រកាសរចនាសម្ព័ន្ធនោះ គឺបណ្តាញសហគមន៍ព្រៃឈើក្នុងខេត្តក្រចេះ បានសហការគ្នាក្នុងការទប់ស្តាប់បទល្មើសព្រៃឈើតាំងពីឆ្នាំ២០១២ តែមិនទាន់ចងជាបណ្តាញទេ ក្រោយមកទើបពួកគេចងជាបណ្តាញ ដោយមានរចនាសម្ព័ន្ធច្បាស់លាស់ ដើម្បីឲ្យការបំពេញការងាររបស់ពួកគេឲ្យកាន់តែមានប្រសិទ្ធភាព។
ប្រធានសហគមន៍ព្រៃឈើនៅស្រុកសំបួរ ជាសហគមន៍មួយក្នុងចំណោមសហគមន៍៤៥ផ្សេងទៀត លោក ហ៊ា សំអឿន បានឲ្យដឹងថា សហគមន៍របស់លោកបានចុះល្បាត៤ដងក្នុងមួយខែ ដោយបែងចែកជាក្រុមៗ។ ពេលនិយាយពីការចុះល្បាត លោក ហ៊ា សំអឿន ក៏បានលើកឡើងពីផលលំបាកដែរ គឺលំបាកដោយមិនមានថវិកាគ្រប់គ្រាន់ ក្នុងការធ្វើដំណើរល្បាត ឬចំណាយផ្សេងៗរបស់ក្រុមសហគមន៍ នាំសមាជិកមួយចំនួនទទួលភារកិច្ចហើយក៏លាឈប់វិញ។
មាត្រា៤៣នៃច្បាប់ស្តីពីព្រៃឈើបានចែងថា ព្រៃសហគមន៍ត្រូវបានគ្រប់គ្រងជាលក្ខណៈសេដ្ឋកិច្ច ដោយធានានិរន្តរភាពដោយសហគមន៍មូលដ្ឋាន ស្របទៅទៅផែនការណ៍គ្រប់គ្រងព្រៃសហគមន៍ វិធានការណ៍សហគមន៍ព្រៃឈើ និងគោលការណ៍ស្តីពីសហគមន៍ព្រៃឈើ។ រដ្ឋបាលព្រៃឈើត្រូវផ្តល់ជំនួយបច្ចេកទេសតាមសហគមន៍មូលដ្ឋាន និងត្រូវតាមដានត្រូតពិនិត្យការអនុវត្ត ផែនការគ្រប់គ្រងព្រៃសហគមន៍។
បទយកការណ៍ផ្សេងទៀត
មាត្រាដដែលបញ្ជាក់ថា ផែនការគ្រប់គ្រងព្រៃសហគមន៍ត្រូវរៀបចំដោយសហគមន៍មូលដ្ឋាន និងមានការយល់ព្រមពីថ្នាក់ខណ្ឌរដ្ឋបាលព្រៃឈើ។ ផែនការនេះ ត្រូវផ្ញើជូនថ្នាក់កណ្តាលរដ្ឋបាលព្រៃឈើ៥ឆ្នាំម្តង ឬមុនពេលកំណត់ក្នុងករណីចាំបាច់។
អនុប្រធាននាយកដ្ឋានព្រៃឈើ និងព្រៃសហគមន៍នៃរដ្ឋបាលព្រៃឈើ លោក ឡុង រតនៈកុមារ លើកទឹកចិត្តឲ្យប្រជាសហគមន៍ព្រៃឈើទាំងនោះ ឲ្យយកចិត្តទុកដាក់ក្នុងការថែរក្សាព្រៃឈើកុំឲ្យបាត់បង់ដូចនៅសហគមន៍ផ្សេងទៀត។ លោកក៏ជំរុញឲ្យបណ្តាញសហគមន៍ព្រៃឈើនៅខេត្តក្រចេះនេះ ដាក់លិខិតសុំការទទួលស្គាល់ពីអាជ្ញាធរថ្នាក់ខេត្តជាផ្លូវការ ដើម្បីឲ្យការបំពេញការងារកាន់តែមានប្រសិទ្ធភាព។
របាយការណ៍ស្រាវជ្រាវរបស់ Forest Trends ចេញផ្សាយកាលពីខែកក្កដាកន្លងទៅ ឲ្យដឹងថា ក្នុងឆ្នាំ២០១៣ ផ្ទៃដីទំហំ២លាន៦សែនហិកតា ឬ១៤ភាគរយនៃផ្ទៃដីប្រទេសទាំងមូល ត្រូវបានកំណត់ដីសម្បទានសេដ្ឋកិច្ចគឺជិតបួនដងលើទំហំដែលក្រុមហ៊ុនកាន់កាប់នៅឆ្នាំ២០០៤។ Forest Trends បារម្ភពីការពីការបាត់បង់ព្រៃឈើនៅកម្ពុជា ដោយសារតែការប្រគល់ដីព្រៃ ធ្វើជាដីសម្បទានសេដ្ឋកិច្ចទៅឲ្យក្រុមហ៊ុនអភិវឌ្ឍន៍នេះ។
លោក លី លីម វ័យ៦៣ បានឲ្យដឹងថា លោកបានបង្កើតជាសហគមន៍ការពារព្រៃឈើតាំងពីឆ្នាំ២០០៨។ លោកបន្តថា បើទោះជាលោកត្រូវចំណាយពេល និងថវិកាផ្ទាល់ខ្លួនខ្លះដើម្បីការពារព្រៃឈើ តែលោកពេញចិត្តនឹងធ្វើព្រោះបារម្ភខ្លាចបាត់បង់ព្រៃដែលនៅសេសសល់៖ “ដោយយើងមើលឃើញថា ព្រៃឈើមានការបាត់បង់ចេះតែអស់ទៅៗ យើងមិនមានអ្នកជួយដើម្បីជាអ្នកសម្របសម្រួលក្នុងកម្មវិធីហ្នឹង វាឃើញថា ការងារហ្នឹងវាកាន់តែអន្តរាយទៅ បាត់បង់ទៅ។ ដូច្នេះយើងខ្ញុំក៏មានការគិតឃើញថា យើងនឹងគួរតែថែរក្សា ទោះបីជាយើងមិនថែរក្សាផល ក៏យើងជួយសម្របសម្រួលដល់ក្រុមរបស់យើងដើម្បីឲ្យគេមានការថែរក្សា ដោយសារតែការយល់ដឹងរបស់សហគមន៍នៅមានកម្រិតទាប”៕
សូមសរសេរមកលោក ពៅ មេត្តា តាមរយៈ minpov@vodhotnews.com