ដោយ៖ អុិត សូធឿត | ថ្ងៃព្រហស្បតិ៍ ទី27 សីហា 2015, 06:39 PM
http://vodhotnews.com
ក្រសួងប្រៃសណីយ៍ និងទូរគមនាគមន៍អះអាងថា ខ្លួនគ្មានប្រព័ន្ធទិន្នន័យ ឬប្រព័ន្ធឌីជីថលសម្រាប់ថតសំឡេង និងតាមដានស្ដាប់ការសន្ទនាគ្នាតាមទូរស័ព្ទរបស់សាធារណជននោះទេ។
ការអះអាងនេះជាការបដិសេធទៅនឹងការលើកឡើងថា មានជនជាតិកូរ៉េបានជ្រៀតចូលក្នុងគេហទំព័រ និងប្រព័ន្ធទិន្នន័យរបស់ក្រសួង ដើម្បីលួចស្ដាប់ការសន្ទនាគ្នាតាមទូរស័ព្ទរបស់សាធារណជន។
សេចក្ដីបំភ្លឺរបស់ក្រសួងប្រៃសណីយ៍ចេញផ្សាយនៅថ្ងៃនេះ លើកឡើងថា ថ្មីៗនេះ មានសារព័ត៌មានមួយចំនួនបានចុះផ្សាយព័ត៌មានជុំវិញករណីជនជាតិកូរ៉េ១០នាក់ ដែលត្រូវបានសាលាដំបូងរាជធានីភ្នំពេញកាត់ទោសឲ្យជាប់ពន្ធនាគារម្នាក់មួយឆ្នាំ ពីបទ «ចូលរួមនៅក្នុងក្រុម ឬឃុបឃិតក្នុងការប្រព្រឹត្តបទល្មើស» កាលពីថ្ងៃទី២៦ ខែសីហា ឆ្នាំ២០១៥នេះ។
សេចក្ដីបំភ្លឺបានឲ្យដឹងថា កាលពីថ្ងៃទី១២ ខែវិច្ឆិកា ឆ្នាំ២០១៤ ក្រសួងប្រៃសណីយ៍ និងទូរសគមនាគមន៍ សហការជាមួយអាជ្ញាធរពាក់ព័ន្ធបានចុះឆែកឆេរ និងឃាត់ខ្លួនជនជាតិកូរ៉េ១០នាក់ (ស្រី៥នាក់) ដោយសង្ស័យថា ពួកគេប្រមូលផ្ដុំគ្នាប្រព្រឹត្តបទល្មើសតាមប្រព័ន្ធបច្ចេកវិទ្យាគមនាគមន៍ និងព័ត៌មាន។ អាជ្ញាធរក៏បានរឹបអូសវត្ថុតាងសម្រាប់ប្រព្រឹត្តបទល្មើសមានមួយចំនួនធំផងដែរ។ អ្នកទាំង១០ត្រូវបានសាលាដំបូងរាជធានីភ្នំពេញកាត់ទោសនៅថ្ងៃទី២៦ ខែសីហា ឆ្នាំ២០១៥នេះ។
សេចក្ដីបំភ្លឺបន្តទៀតថា ចំពោះការលើកឡើងថា ជនជាតិកូរ៉េទាំង១០នាក់បានជ្រៀតចូលក្នុងគេហទំព័រ និងប្រព័ន្ធទិន្នន័យរបស់ក្រសួងដើម្បីលួចស្ដាប់ការសន្ទនាគ្នាតាមទូរស័ព្ទរបស់សាធារណជន គឺជាការលើកឡើងដែលគ្មានការពិត។ សេចក្ដីបំភ្លឺបញ្ជាក់ថា៖ “ក្រសួងប្រៃសណីយ៍ និងទូរគមនាគមន៍គ្មានទេនូវរបស់ដែលហៅថា «ប្រព័ន្ធទិន្នន័យ ឬប្រព័ន្ធឌីជីថលសម្រាប់ថតសំឡេង និងតាមដានស្ដាប់ការសន្ទនាគ្នាតាមទូរស័ព្ទរបស់សាធារណជន» ហើយសកម្មភាពដូចបានលើកឡើងខាងលើនេះ មិនមែនជាអាណត្តិរបស់ក្រសួងឡើយ”។
ក្រសួងប្រៃសណីយ៍ក៏បានអះអាងដែរថា គេហទំព័រផ្លូវការរបស់ក្រសួងពុំធ្លាប់ត្រូវបានជ្រៀតចូល ឬវាយប្រហារពីមជ្ឈដ្ឋានណាមួយឡើយ៕
សរសេរមកលោក អុិត សូធឿត តាមរយៈ sothoeuth@vodhotnews.com