ដោយ៖ ស៊ុន ណារិន | ថ្ងៃសុក្រ ទី9 តុលា 2015
http://vodhotnews.com
រដ្ឋាភិបាលបានចេញអនុក្រឹត្យមួយស្តីពីវិធានការសុខាភិបាល ដើម្បីទប់ស្កាត់និងឆ្លើយតបការឆ្លងរាលដាលជាអន្តរជាតិនៃជំងឺនៅតាមច្រកចេញចូល ដោយតម្រូវឲ្យអ្នកឆ្លងកាត់តាមច្រកព្រំដែនទាំងអស់សហការជាមួយមន្រ្តីជំនាញសុខាភិបាលនៅតាមព្រំដែន ក្នុងករណីសង្ស័យណាមួយ។
អនុក្រឹត្យចុះថ្ងៃទី១៧ខែកញ្ញាឲ្យដឹងថាការចេញអនុក្រឹត្យនេះមានគោលបំណងកំណត់អំពីវិធានការសុខាភិបាលអនុវត្តដោយមន្រ្តីត្រួតពិនិត្យតាមច្រកទ្វារអន្តរជាតិ ច្រកព្រំដែនទ្វេភាគី ច្រកតំបន់ព្រំដែននិងច្រកទ្វារកំពង់ផែសមុទ្រ ដើម្បីទប់ស្កាត់និងឆ្លើយតបគ្រោះអាសន្នបន្ទាន់ចំពោះសុខភាពសាធារណៈនៅតាមច្រកចេញចូល។ អនុក្រឹត្យនេះមានវិសាលភាពត្រួតពិនិត្យនិងអនាម័យ អនុវត្តចំពោះគ្រប់អ្នកដំណើរដែលសង្ស័យថាអាចចម្លងជំងឺដែលចេញចូលតាមច្រកព្រំដែន។
បើតាមអនុក្រឹត្យ ចំពោះយានដឹកជញ្ជូនដែលសង្ស័យថាអាចចម្លងជំងឺដែលចេញចូលតាមច្រកទ្វារខាងលើនឹងត្រូវបានត្រួតពិនិត្យផ្នែកអនាម័យនិងការចម្លងរោគ ដោយមន្រ្តីច្រកព្រំដែន ក្នុងករណីដែលមានការផ្ទុះការរាតត្បាតជំងឺឆ្លងក្នុងប្រទេសឬអន្តរជាតិ។ អនុក្រឹត្យចែងថាអ្នកដំណើរឬការីនៃយានដឹកជញ្ជូនណាដែលគេចវេះមិនឲ្យមន្រ្តីតាមព្រំដែនត្រួតពិនិត្យឬមិនសហការជាមួយមន្រ្តីក្នុងការអនុវត្តវិធានការសុខាភិបាលឬមិនបំពេញតាមបែបបទដែលមានកំណត់ក្នុងអនុក្រឹត្យនេះ ត្រូវទទួលពិន័យអន្តរការណ៍ជាប្រាក់ពី២០ម៉ឺនរៀលទៅ១លានរៀល ទៅតាមទំហំនៃបទល្មើសនិងតម្រូវឲ្យអនុវត្តវិធានការសុខាភិបាល។ អនុក្រឹត្យបន្ថែមថាការទទួលពិន័យអន្តរការណ៍នេះមិនធ្វើឲ្យជនដែលប្រព្រឹត្តលើ្មសរួចផុតពីការទទួលខុសត្រូវខាងព្រហ្មទណ្ឌដែលចែងនៅក្នុងច្បាប់និងបទប្បញ្ញត្តិព្រហ្មទណ្ឌជាធរមានឡើយ។
បើតាមអនុក្រឹត្យនេះ ជនណាដែលក្លែងបន្លំឯកសារពាក់ព័ន្ធសុខភាព ក្នុងគោលបំណងគេចវះពីការអនុវត្តរបស់មន្រ្តីជំនាញខាងសុខភាពនៅព្រំដែន ត្រូវផ្តន្ទាទោសតាមច្បាប់ព្រហ្មទណ្ឌជាធរមាន ហើយក្នុងករណីមិនសហការអនុវត្តតាម ជននោះនឹងត្រូវអាជ្ញាធរបដិសេធការចេញចូលកម្ពុជា។ ចំពោះមន្រ្តីអនុវត្តមិនគោរពតាមប្បញ្ញត្តិនៃអនុក្រឹត្យនេះ ត្រូវប្រឈមនឹងវិធានការរដ្ឋបាល។
អនុក្រឹត្យឲ្យដឹងទៀតថាកម្រៃសេវាត្រួតពិនិត្យនិងការអនុវត្តវិធានការសុខាភិបាលត្រូវកំណត់ដោយប្រកាសអន្តរក្រសួងរវាងរដ្ឋមន្រ្តីក្រសួងសុខាភិបាលនិងរដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com