ដោយ៖ ណាត សុភាព | ថ្ងៃអាទិត្យ ទី29 វិច្ឆិកា 2015
http://vodhotnews.com
អង្គការដែលធ្វើការការពារសិទ្ធិស្ត្រីអំពាវនាវឲ្យសាធារណៈជនទាំងអស់ ចូលរួមចែករំលែកពីកង្វល់ និងបទពិសោធន៍នានាពីអំពើហិង្សាក្នុងគ្រួសារ ដើម្បីជំរុញឲ្យមានការធ្វើវិសោធនកម្មច្បាប់ ស្តីពីការទប់ស្កាត់អំពើហិង្សាក្នុងគ្រួសារ ដោយសារច្បាប់នេះនៅមានភាពខ្វះចន្លោះ។
ការអំពាវនាវនេះ ធ្វើឡើងអំឡុងពេលយុទ្ធនាការប្រឆាំងនឹងអំពើហិង្សាលើស្ត្រីចំនួន១៦ថ្ងៃ ដែលនឹង ប្រារព្ធឡើងរៀងរាល់ឆ្នាំចាប់ពីថ្ងៃទី២៥ ខែវិច្ឆិកា ដល់ថ្ងៃទី១០ ខែធ្នូ ឆ្នាំ២០១៥។
សេចក្តីប្រកាសព័ត៌មានរបស់គណៈកម្មាធិការនៃអង្គការមិនមែនរដ្ឋាភិបាលកម្ពុជា ដើម្បីអនុសញ្ញាលុបបំបាត់រាល់ទំរង់នៃការរើសអើងលើស្ត្រីភេទ ហៅថា “NGO-CEDAW” ឲ្យដឹងថា ការប្រើអំពើហិង្សានៅក្នុងគ្រួសារមិនមែនជាកំហុសរបស់ជនរងគ្រោះទេ ហេតុនេះអំពើហិង្សាលើស្ត្រីជាទង្វើមិនអាចទទួលយកបាន និងមិនអាចទម្លាក់កំហុសដល់ជនរងគ្រោះបានឡើយ។ សេចក្តីប្រកាសព័ត៌មានក៏អំពាវនាវទៅសាធារណៈជនទាំងអស់ចូលរួមពិភាក្សាពីកង្វល់ និងចែករំលែកបទពិសោធន៍នានា ដើម្បីជំរុញឲ្យមានវិសោធនកម្មច្បាប់ ស្តីពីការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ។
សេចក្តីប្រកាសព័ត៌មានបញ្ជាក់ថា៖ “ស្ត្រីគ្រប់រូបមានសិទ្ធិរាយការណ៍ពីអំពើហិង្សាដែលពួកគេជួបប្រទះ និងទទួលបានមកវិញនូវ ការលើកទឹកចិត្ត ការការពារពីសហគមន៍ និងអាជ្ញាធរមូលដ្ឋាន ដើម្បីជាបុព្វហេតុនៃការជំរុញឲ្យមានការធ្វើវិសោធនកម្មទៅលើច្បាប់ស្តីពី ការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ក៏ដូចជាការចូលរួមជំរុញឲ្យមានការប្រើប្រាស់ច្បាប់នេះឲ្យបានកាន់តែទូលំទូលាយបន្ថែមទៀតនៅក្នុងសហគមន៍”។
ទាក់ទងនឹងករណីស្ត្រីនេះ អង្គការ“NGO-CEDAW” ក៏បានបង្កើតគម្រោងមួយឈ្មោះថា “សេចក្តីថ្លៃថ្នូរ” ដែលគម្រោងនេះ បង្កើតជាស្នាដៃសិល្បៈរូបថតរបស់ជនរងគ្រោះពីអំពើហិង្សាក្នុងគ្រួសារ ដើម្បីលើកកម្ពស់ការយល់ដឹងពីសេចក្តីត្រូវការបន្ថែមទៀត ក្នុងការផ្តល់កិច្ចការពារដល់ជនរងគ្រោះ ដោយសារភាពខ្វះចន្លោះនៅក្នុងច្បាប់ស្តីពី ការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះដែលចូលជាធរមាន។
ការបង្កើតស្នាដៃសិល្បៈនេះ ផលិតឡើងដោយអ្នកថតជំនាញឈ្មោះកញ្ញា ម៉ូណា ស៊ីម៉ន់ ដែលក្នុងនោះមានដូចជា សិល្បៈរូបថតរបស់ជនរងគ្រោះពីអំពើហិង្សាក្នុងគ្រួសារចំនួន១០នាក់ ដោយមានអមជាមួយនឹងបទពិសោធន៍របស់ពួកគេ ព្រមទាំងការពន្យល់បកស្រាយពីភាពខ្វះចន្លោះក្នុងច្បាប់ស្តីពី ការទប់ស្កាត់អំពើហិង្សាក្នុងគ្រួសារ។
កម្មវិធីជួបជុំនេះ ធ្វើនៅវេលាម៉ោង៦ល្ងាច ថ្ងៃព្រហស្បិត៍ទី៣ ខែធ្នូ នៅMETA HOUSE។ ការដាក់តាំងបង្ហាញស្នាដៃសិល្បៈនេះក៏នឹងប្រព្រឹត្តទៅរៀងរាល់ថ្ងៃ គឺចាប់ពីថ្ងៃទី១ដល់១២ ខែធ្នូ នៅ META HOUSE ដែលមានអាសយដ្ឋាននៅផ្ទះលេខ២៧ ផ្លូវសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ៕
សូមសរសេរមកកាន់លោក ណាត សុភាព តាមរយៈ sopheap@vodhotnews.com