ដោយ ម៉ម មុនីរតន៍
2015-11-30
RFA
លោកមេធាវី ជូង ជូងី ថ្លែងប្រាប់អ្នកកាសែតនៅមុខសាលាឧទ្ធរណ៍ នៅថ្ងៃទី៣០ ខែវិច្ឆិកា ឆ្នាំ២០១៥។ RFA/Morm Moniroth
ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ សម្រេចទម្លាក់ចោលបណ្ដឹងទាស់របស់មេធាវីការពារក្ដីឲ្យ លោក ហុង សុខហួរ ដោយពុំបានបញ្ជាក់ពីមូលហេតុណាមួយនោះទេ។ លោក ជូង ជូងី ចាត់ទុកការច្រានចោលបណ្ដឹងរបស់ខ្លួន ដែលប្រឆាំងនឹងសាលក្រមរបៀបរបស់ចៅក្រមស៊ើបសួរ នៃតុលាការក្រុងភ្នំពេញនេះ ថាជាការធ្វើបុរេវិនិច្ឆ័យមុនអង្គសេចក្ដីទៅទៀត របស់ក្រុមប្រឹក្សាជំនុំជម្រះនៃសភាព្រហ្មទណ្ឌ។ ហេតុនេះ ការសម្រេច គឺមានភាពលម្អៀងរួចជាស្រេចបាត់ទៅហើយ។
អង្គការមិនមែនរដ្ឋាភិបាលដែលឃ្លាំមើលសវនាការ បង្ហាញការសោកស្ដាយចំពោះសេចក្ដីសម្រេចនៅពេលនេះរបស់ក្រុមប្រឹក្សាជំនុំជម្រះនៃសាលាឧទ្ធរណ៍ ដោយចាត់ទុកថា នេះជារបៀបបោះបាល់ដាក់គ្នាទៅវិញទៅមករវាងសាលាដំបូងរាជធានីភ្នំពេញ និងសភាព្រហ្មទណ្ឌ លើសំណុំរឿងសមាជិកព្រឹទ្ធសភារបស់គណបក្សជំទាស់។
សវនាការចាប់ផ្ដើមកាលពីព្រឹកថ្ងៃទី៣០ វិច្ឆិកា មិនទាន់ទាំងបានប៉ុន្មាននាទីស្រួលបួលនៅឡើយផង ស្រាប់តែប្រធានក្រុមប្រឹក្សាជំនុំជម្រះ លោក ប្លង់ សំណាង បានផ្ដល់នាទីជូនព្រះរាជអាជ្ញាមុន ដើម្បីធ្វើសេចក្ដីសន្និដ្ឋាន។ ភ្លាមនោះ តំណាងមហាអយ្យការនៃសាលាឧទ្ធរណ៍ គឺកញ្ញា យិន សុគន្ធារី បានជំទាស់ និងស្នើឲ្យក្រុមប្រឹក្សាជំនុំជម្រះ ទម្លាក់ចោលបណ្ដឹងទាស់របស់ លោក ជូង ជូងី ហើយចាត់ទុកថាជាបណ្ដឹងខុសទម្រង់។ ម្យ៉ាងវិញទៀត មិនដឹងជាត្រូវចេញសាលដីកាដោយរបៀបណាកើតទេ បើសិនជាសវនាការលើអង្គសេចក្ដី មិនទាន់ទាំងបានបិទបញ្ចប់នៅឡើយផងនោះ។ ហេតុនេះ កញ្ញា យិន សុគន្ធារី ស្នើឲ្យក្រុមប្រឹក្សាជំនុំជម្រះ ត្រូវទាត់ចោលបណ្ដឹងឧទ្ធរណ៍នេះទុកជាមោឃៈ។
នៅក្នុងអង្គសវនាការ មុនអង្គប្រធានក្រុមប្រឹក្សាជំនុំជម្រះ លោក ប្លង់ សំណាង សម្រេចបដិសេធបណ្ដឹងទាស់ ដោយពុំបានបញ្ជាក់មូលហេតុអ្វីសោះនោះ លោក ជូង ជូងី បានពន្យល់យ៉ាងពិស្ដារ ប្រៀបដូចសាស្ត្រាចារ្យដែលបង្រៀនពីរបៀបបច្ចេកទេសច្បាប់។ បន្ថែមពីលើនេះ លោក ជូង ជូងី ចាត់ទុកថា ព្រោះតែការសម្រេចរបស់តុលាការដោយពុំបានផ្អែកលើបច្ចេកទេស និងមានការបកស្រាយច្បាប់ខុសៗគ្នានេះហើយ ធ្វើឲ្យមានភាពអយុត្តិធម៌សង្គម ដែលលោកមើលឃើញក្នុងអាជីពជាមេធាវីរបស់លោកអស់ពេលជាង ១០ឆ្នាំមកនេះ។
បន្ថែមលើការដេញដោលផ្ទាល់មាត់នៅក្នុងអង្គសវនាការ លោក ជូង ជូងី ឲ្យដឹងក្រោយបញ្ចប់ការជំនុំជម្រះថា ការទាត់ចោលបណ្ដឹងរបស់លោកនេះ គឺជារបៀបដែលចៅក្រមធ្វើសេចក្ដីសន្និដ្ឋានទុកជាមុន ហើយការសម្រេចដូចនេះ បានផ្ដល់ភាពអយុត្តិធម៌រួចទៅហើយសម្រាប់កូនក្ដីរបស់ខ្លួន។ លោកបន្តថា «ពេលដែលចាប់ផ្ដើម គាត់ថាបណ្ដឹងឧទ្ធរណ៍ គឺឥតត្រឹមត្រូវតាមទម្រង់។ ដូច្នេះគាត់ធ្វើបុរេវិនិច្ឆ័យរួចទៅហើយ ធ្វើម្ដេចគាត់ផ្ដល់សេចក្ដីមួយដោយយុត្តិធម៌បាន។ អ៊ីចឹងទោះបីសវនាការដេញដោលប៉ុន្មានម៉ោងនេះ គឺសេចក្ដីសម្រេចរបស់គាត់ គាត់រកហេតុផលសំអាងទៅរកបុរេវិនិច្ឆ័យរបស់គាត់នោះ។ គាត់ឥតបានស្ដាប់យកហេតុផល ដែលមេធាវីលើកយកទៅពិចារណាទេ»។
កាលពីថ្ងៃទី២២ តុលា ចៅក្រមស៊ើបសួរនៃតុលាការក្រុងភ្នំពេញ លោក រស់ ពិសិដ្ឋ បានចេញដីកាបង្គាប់ឲ្យ លោក ជូង ជូងី និងជនជាប់ចោទ ដាក់ឯកសារដែលពាក់ព័ន្ធនឹងការទាញយកសន្ធិសញ្ញា ១៩៧៩ និងឧបករណ៍អេឡិចត្រូនិកមកតុលាការ ដើម្បីបន្តនីតិវិធីស៊ើបសួរបន្ថែម។ ដីកាសរសេរទៀតថា ក៏ប៉ុន្តែរហូតមកដល់ពេលនេះ នៅតែពុំទាន់ឃើញដាក់ឯកសារពាក់ព័ន្ធ ដែលជាមូលហេតុពុំអាចបន្តស៊ើបសួរបានឡើយ។
ដីកាបង្គាប់បន្ថែមទៀតថា ក្នុងករណីមិនអនុវត្តតាម តុលាការនឹងកំណត់កាលបរិច្ឆេទបន្តនីតិវិធី ហើយនឹងមិនទទួលយកភស្តុតាងមកពិនិត្យពេលក្រោយឡើយ។
ឆ្លើយតបរឿងនេះ លោក ជូង ជូងី យល់ឃើញថា នេះជាការបង្ខំដែលផ្ទុយពីច្បាប់។
លោក ហុង សុខហួរ ត្រូវបានសមត្ថកិច្ចចាប់ខ្លួនកាលពីថ្ងៃទី១៤ សីហា បន្ទាប់ពី លោក ហ៊ុន សែន បញ្ជាឲ្យចាប់ខ្លួន ដោយចោទប្រកាន់ថា លោក ហុង សុខហួរ ក្បត់ជាតិ ដែលហ៊ានលួចក្លែងឯកសារសន្ធិសញ្ញាព្រំដែនកម្ពុជា-វៀតណាម ឆ្នាំ១៩៧៩ ថាជាសន្ធិសញ្ញារំលាយព្រំដែនរវាងប្រទេសទាំងពីរ។
មន្ត្រីជាន់ខ្ពស់អង្គការលីដូកា (LICADHO) លោក អំ សំអាត បង្ហាញការសោកស្ដាយចំពោះសេចក្ដីសម្រេចនៅពេលនេះរបស់ក្រុមប្រឹក្សាជំនុំជម្រះ នៃសាលាឧទ្ធរណ៍។ លោកបន្តថា ការទម្លាក់ចោលបណ្ដឹងទាស់នេះ មិនខុសពីរបៀបលេងបាល់ឡើយ។ ម្យ៉ាងវិញទៀត ការបញ្ជូនសំណុំរឿងទៅវិញទៅមកនេះ គឺមិនខុសពីឆាកល្ខោននយោបាយនោះថែមទៀតផង។ លោកបន្តថា «ខ្ញុំយល់ថានេះហាក់ដូចលេងល្បែងរុញទៅរុញមក។ យើងដឹងហើយករណីនេះដែលមតិជាតិ និងអន្តរជាតិ គេគិតថា វាករណីនយោបាយ។ អ៊ីចឹងវាហាក់ដូចជាបោះបាល់ដាក់គ្នាទៅវិញទៅមក ហើយរង់ចាំពន្យារពេលការចរចាផ្នែកនយោបាយតែប៉ុណ្ណោះទេ»។
លោក ជូង ជូងី ឲ្យដឹងថា លោកនឹងប្ដឹងសារទុក្ខទៅតុលាការកំពូលបន្តទៀត ប្រសិនបើកូនក្តីរបស់ខ្លួនយល់ព្រមឲ្យមានបណ្ដឹងជាថ្មីទៀត ប្រឆាំងសេចក្ដីសម្រេចរបស់សភាព្រហ្មទណ្ឌនៅពេលនេះ។ ជុំវិញសំណុំរឿង លោក ហុង សុខហួរ នេះ សង្គមស៊ីវិលជាតិ និងអន្តរជាតិ ចាត់ទុកថា ជាបណ្ដឹងធ្វើឡើងក្រោមហេតុផលនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- លីកាដូ៖ សំណងក្រៅប្រព័ន្ធតុលាការជាមូលហេតុកើនឡើងនៃបទល្មើសសេពសន្ថវៈលើស្ត្រី
- សាលាឧទ្ធរណ៍នឹងបើកសវនាការលើបណ្ដឹងទាស់របស់លោក ហុង សុខហួរ នៅថ្ងៃទី៣០វិច្ឆិកា
- មេធាវីលោក ហុង សុខហួរ៖ សាលក្រមរបៀបតុលាការក្រុងភ្នំពេញប៉ះពាល់សិទ្ធិកូនក្ដី
- បក្សប្រឆាំងស្នើតុលាការខេត្តស្វាយរៀងដោះលែងសកម្មជន២រូបចេញពីពន្ធនាគារ
- តុលាការឃុំខ្លួនសកម្មជនបក្សប្រឆាំងពីរនាក់ចោទពាក់ព័ន្ធក្លែងសំបុត្របញ្ជាក់កំណើត
- សកម្មជនបក្សប្រឆាំងត្រូវបន្តឃុំនៅស្នងការខេត្តស្វាយរៀងបន្ទាប់ពីសាកសួរ
- តុលាការបង្គាប់ឲ្យលោក សម រង្ស៊ី ចូលខ្លួនបំភ្លឺករណីថ្មីទៀតនៅថ្ងៃ៤ ធ្នូ
- សាលាដំបូងរាជធានីភ្នំពេញចេញដីកាតាមចាប់ព្រះសង្ឃខ្មែរកម្ពុជាក្រោម សឺន ហាយ
- តំណាងរាស្ត្របក្សប្រឆាំងទទូចឲ្យតុលាការបន្ថែមល្បឿនស៊ើបអង្កេតករណីហិង្សា